ਚੰਡੀਗੜ੍ਹ, 6 ਮਾਰਚ (ਕਪਿਲ ਵਧਵਾ)-ਮੌਲੀ ਜਾਗਰਾਂ ਇਲਾਕੇ 'ਚ ਹੋਲੀ ਦੇ ਦਿਨ ਹੋਏ ਕਤਲ ਮਾਮਲੇ ਵਿਚ ਚੰਡੀਗੜ੍ਹ ਪੁਲਿਸ ਨੂੰ ਵੱਡੀ ਕਾਮਯਾਬੀ ਮਿਲੀ ਹੈ | ਪੁਲਿਸ ਨੇ ਇਸ ਮਾਮਲੇ 'ਚ ਤਿੰਨ ਮੁਲਜ਼ਮਾਂ ਨੂੰ ਗਿ੍ਫ਼ਤਾਰ ਕਰ ਲਿਆ ਹੈ, ਜਦਕਿ ਦੋ ਨਾਬਾਲਗਾਂ ਨੂੰ ਵੀ ਕਾਬੂ ਕੀਤਾ ਗਿਆ ਹੈ | ਇਹ ਕਾਰਵਾਈ ਥਾਣਾ ਮੌਲੀ ਜਾਗਰਾਂ ਦੇ ਐਸ. ਐਚ. ਓ. ਹਰੀਓਮ ਸ਼ਰਮਾ ਦੀ ਦੇਖ-ਰੇਖ ਹੇਠ ਕੀਤੀ ਗਈ | ਥਾਣਾ ਮੌਲੀ ਜਾਗਰਾਂ ਦੀ ਟੀਮ ਨੇ ਏ. ਐਸ. ਆਈ. ਰਮੇਸ਼ ਕੁਮਾਰ ਦੀ ਅਗਵਾਈ ਵਿਚ ਕਾਰਵਾਈ ਕਰਦਿਆਂ ਮੁਲਜ਼ਮਾਂ ਨੂੰ ਕਾਬੂ ਕੀਤਾ | ਪੁਲਿਸ ਵਲੋਂ ਦਰਜ 4 ਮਾਰਚ ਨੂੰ ਦਰਜ ਐਫ਼. ਆਈ. ਆਰ. ਮੁਤਾਬਿਕ ਇਹ ਮਾਮਲਾ ਮਖਣ ਮਾਜਰਾ ਦੇ ਕਬਾੜੀ ਮਾਰਕੀਟ ਨਿਵਾਸੀ ਭਗਵਾਨ ਸਾਹਨੀ ਦੀ ਸ਼ਿਕਾਇਤ 'ਤੇ ਦਰਜ ਕੀਤਾ ਗਿਆ ਸੀ | ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ 4 ਮਾਰਚ ਨੂੰ ਕਰੀਬ ਦੁਪਹਿਰ 2 ਵਜੇ ਉਹ ਆਪਣੇ 21 ਸਾਲਾ ਪੁੱਤਰ ਅੰਕਿਤ ਨਾਲ ਕਬਾੜੀ ਮਾਰਕੀਟ 'ਚ ਬੈਠੇ ਹੋਏ ਸਨ ਜਦੋਂ ਹੋਲੀ ਖੇਡ ਰਹੇ ਕੁਝ ਨੌਜਵਾਨਾਂ ਵਿਚਾਲੇ ਝਗੜਾ ਹੋ ਗਿਆ | ਇਸ ਦੌਰਾਨ ਅਰਵਿੰਦ, ਉਸ ਦਾ ਪੁੱਤਰ ਕਰਨ, ਬਚਨ ਤੇ ਬੋਬੀ ਸਮੇਤ ਕੁਝ ਹੋਰ ਵਿਅਕਤੀ ਸੋਟੀਆਂ ਤੇ ਹੋਰ ਹਥਿਆਰ ਲੈ ਕੇ ਉਥੇ ਆ ਗਏ ਅਤੇ ਭਗਵਾਨ ਸਾਹਨੀ ਤੇ ਉਸ ਦੇ ਪੁੱਤਰ ਅੰਕਿਤ ਨੂੰ ਕੁੱਟਣਾ ਸ਼ੁਰੂ ਕਰ ਦਿੱਤਾ | ਕੁਝ ਸਮੇਂ ਬਾਅਦ ਹੋਰ ਨੌਜਵਾਨ ਮੋਟਰਸਾਈਕਲਾਂ ਤੇ ਪੈਦਲ ਹਥਿਆਰਾਂ ਨਾਲ ਆ ਗਏ ਅਤੇ ਹਮਲਾ ਕਰ ਦਿੱਤਾ | ਦੌਰਾਨ ਬੋਬੀ ਨੇ ਅੰਕਿਤ ਦੇ ਪੇਟ 'ਚ ਚਾਕੂ ਮਾਰ ਦਿੱਤਾ ਅਤੇ ਇਕ ਹੋਰ ਨੌਜਵਾਨ ਨੇ ਉਸ ਦੇ ਹੱਥ 'ਤੇ ਵਾਰ ਕੀਤਾ, ਜਿਸ ਨਾਲ ਅੰਕਿਤ ਮੌਕੇ 'ਤੇ ਹੀ ਡਿੱਗ ਗਿਆ | ਜ਼ਖ਼ਮੀ ਹਾਲਤ 'ਚ ਅੰਕਿਤ ਨੂੰ ਸਰਕਾਰੀ ਹਸਪਤਾਲ ਸੈਕਟਰ-32 ਲਿਜਾਇਆ, ਜਿਥੇ ਡਾਕਟਰਾਂ ਨੇ ਉਸ ਨੂੰ ਮਿ੍ਤਕ ਘੋਸ਼ਿਤ ਕਰ ਦਿੱਤਾ | ਹਮਲੇ ਦੌਰਾਨ ਸ਼ਿਕਾਇਤਕਰਤਾ ਭਗਵਾਨ ਸਾਹਨੀ 'ਤੇ ਵੀ ਚਾਕੂ ਨਾਲ ਹਮਲਾ ਕੀਤਾ | ਹਮਲੇ ਤੋਂ ਬਾਅਦ ਮੁਲਜ਼ਮ ਮੌਕੇ ਤੋਂ ਫ਼ਰਾਰ ਹੋ ਗਏ | ਜਾਂਚ ਦੌਰਾਨ ਪੁਲਿਸ ਨੇ ਸ਼ਿਕਾਇਤਕਰਤਾ ਦੇ ਬਿਆਨਾਂ ਦੇ ਆਧਾਰ 'ਤੇ ਫ਼ਰਾਰ ਚੱਲ ਰਹੇ ਅਰਵਿੰਦ (36), ਬੋਬੀ (24) ਤੇ ਸੋਨੂ (26) ਨੂੰ ਗਿ੍ਫ਼ਤਾਰ ਕਰ ਲਿਆ ਹੈ | ਇਹ ਸਾਰੇ ਮਖਣ ਮਾਜਰਾ ਦੇ ਕਬਾੜੀ ਮਾਰਕੀਟ ਇਲਾਕੇ ਦੇ ਰਹਿਣ ਵਾਲੇ ਹਨ ਤੇ ਕਬਾੜੀ ਦਾ ਕੰਮ ਕਰਦੇ ਹਨ | ਪੁਲਿਸ ਨੇ ਮੁਲਜ਼ਮਾਂ ਕੋਲੋਂ ਵਾਰਦਾਤ ਵਿਚ ਵਰਤੀਆਂ ਡਾਂਗਾਂ ਤੇ ਡੰਡੇ ਵੀ ਬਰਾਮਦ ਕਰ ਲਏ ਹਨ | ਇਸ ਤੋਂ ਇਲਾਵਾ ਦੋ ਨਾਬਾਲਗਾਂ ਨੂੰ ਵੀ ਕਾਬੂ ਕੀਤਾ ਗਿਆ ਹੈ ਤੇ ਉਨ੍ਹਾਂ ਕੋਲੋਂ ਵਾਰਦਾਤ ਵਿਚ ਵਰਤਿਆ ਚਾਕੂ ਬਰਾਮਦ ਕੀਤਾ ਗਿਆ ਹੈ | ਪੁਲਿਸ ਮੁਤਾਬਿਕ ਮਾਮਲੇ ਦੀ ਜਾਂਚ ਅਜੇ ਸ਼ੁਰੂਆਤੀ ਪੜਾਅ ਵਿਚ ਹੈ ਤੇ ਹੋਰ ਮੁਲਜ਼ਮਾਂ ਦੀ ਭਾਲ ਜਾਰੀ ਹੈ |
