ਚੰਡੀਗੜ੍ਹ, 7 ਅਪ੍ਰੈਲ (ਵਿਕਰਮਜੀਤ ਸਿੰਘ ਮਾਨ)- ਚੰਡੀਗੜ੍ਹ ਕਾਂਗਰਸ ਦੇ ਕੌਂਸਲਰਾਂ ਦੀ ਇਕ ਅਹਿਮ ਮੀਟਿੰਗ ਅੱਜ ਪਾਰਟੀ ਪ੍ਰਧਾਨ ਐਚ.ਐਸ ਲੱਕੀ ਪ੍ਰਧਾਨਗੀ ਹੇਠ ਉਨ੍ਹਾਂ ਦੇ ਗ੍ਰਹਿ ਵਿਖੇ ਹੋਈ, ਜਿਸ ਵਿਚ ਨਗਰ ਨਿਗਮ ਦੀ ਮੀਟਿੰਗ ਵਿਚ ਭਾਜਪਾ ਨੂੰ ਘੇਰਨ ਦੀ ਰਣਨੀਤੀ ਉਲੀਕੀ ਗਈ | ਦੱਸਿਆ ਜਾ ਰਿਹਾ ਕਿ ਇਸ ਮੀਟਿੰਗ ਵਿਚ ਫ਼ੈਸਲਾ ਲਿਆ ਗਿਆ ਕਿ ਨਗਰ ਨਿਗਮ ਵਿਚ ਹੋਏ ਲਗਭਗ 116 ਕਰੋੜ ਦੇ ਕਥਿਤ ਘੋਟਾਲੇ ਨੂੰ ਕਾਂਗਰਸ ਪਾਰਟੀ ਹਾਊਸ ਵਿਚ ਜ਼ੋਰਦਾਰ ਢੰਗ ਨਾਲ ਉਠਾਏਗੀ | ਇਸ ਮੌਕੇ ਕਾਂਗਰਸੀ ਕੌਂਸਲਰਾਂ ਨੇ ਕਿਹਾ ਕਿ ਆਿਖ਼ਰ ਭਾਜਪਾ ਦੇ ਸ਼ਾਸਨ ਹੇਠ, ਉਨ੍ਹਾਂ ਦੀਆਂ ਅੱਖਾਂ ਦੇ ਸਾਹਮਣੇ ਏਨਾ ਵੱਡਾ ਘੋਟਾਲਾ ਕਿਵੇਂ ਹੋ ਗਿਆ? ਜੋ ਭਾਜਪਾ ਲਗਾਤਾਰ ਫ਼ੰਡਾਂ ਦੀ ਕਮੀ ਦਾ ਰੋਣਾ ਰੋਂਦੀ ਰਹੀ, ਉਸ ਨੂੰ ਇਸ ਵੱਡੀ ਵਿੱਤੀ ਗੜਬੜ ਦੀ ਖ਼ਬਰ ਤੱਕ ਕਿਵੇਂ ਨਾ ਲੱਗੀ? ਕਾਂਗਰਸ ਨੇ ਇਸ ਨੂੰ ਲੋਕਾਂ ਦੇ ਪੈਸੇ ਦੀ ਖੁੱਲ੍ਹੀ ਲੁੱਟ ਕਰਾਰ ਦਿੱਤਾ ਹੈ ਅਤੇ ਪੂਰੇ ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ ਹੈ | ਇਸ ਤੋਂ ਇਲਾਵਾ ਹਾਊਸਿੰਗ ਬੋਰਡ ਦੇ ਮਕਾਨਾਂ 'ਚ ਪਿਛਲੇ ਕੁੱਝ ਦਿਨਾਂ ਤੋਂ ਚੱਲ ਰਹੀ ਤੋੜਫੋੜ ਦਾ ਮੁੱਦਾ ਵੀ ਮੀਟਿੰਗ 'ਚ ਚੁੱਕਣ ਲਈ ਵਿਚਾਰਿਆ ਗਿਆ | ਕਾਂਗਰਸ ਕੌਂਸਲਰਾਂ ਨੇ ਫ਼ੈਸਲਾ ਕੀਤਾ ਕਿ ਇਸ ਮਾਮਲੇ 'ਤੇ ਹਾਊਸ ਦੇ ਅੰਦਰ ਜ਼ੋਰਦਾਰ ਵਿਰੋਧ ਕੀਤਾ ਜਾਵੇਗਾ | ਮੀਟਿੰਗ ਵਿਚ ਸ਼ਹਿਰਵਾਸੀਆਂ 'ਤੇ ਵੱਧ ਰਹੇ ਬਿਜਲੀ ਬਿੱਲਾਂ ਦੇ ਬੋਝ ਬਾਰੇ ਵੀ ਗੰਭੀਰ ਚਰਚਾ ਹੋਈ | ਸ਼ਹਿਰ ਦੇ ਵਿਕਾਸ ਕਾਰਜਾਂ ਖ਼ਾਸ ਕਰਕੇ ਸੜਕਾਂ ਦੀ ਖ਼ਰਾਬ ਹਾਲਤ ਨੂੰ ਲੈ ਕੇ ਵੀ ਭਾਜਪਾ ਸ਼ਾਸਿਤ ਨਗਰ ਨਿਗਮ ਨੂੰ ਘੇਰਿਆ ਜਾਵੇਗਾ |
