ਚੰਡੀਗੜ੍ਹ, 2 ਮਈ (ਮਾਰਕੰਡਾ)- ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਵਿਖੇ 5ਵਾਂ ਭਾਰਤੀ ਪਰੰਪਰਾਗਤ ਖੇਡ ਉਤਸਵ ਮਨਾਇਆ ਗਿਆ | ਜੋ ਭਾਰਤ ਦੀ ਸਵਦੇਸ਼ੀ ਖੇਡ ਵਿਰਾਸਤ ਨੂੰ ਮੁੜ ਸੁਰਜੀਤ ਕਰਨ ਅਤੇ ਉਤਸ਼ਾਹਿਤ ਕਰਨ ਨੂੰ ਸਮਰਪਿਤ ਰਿਹਾ | ਇਹ ਸਮਾਰੋਹ ਪੰਜਾਬ ਯੂਨੀਵਰਸਿਟੀ ਸਪੋਰਟਸ ਕੰਪਲੈਕਸ ਵਿਖੇ ਕਰਵਾਇਆ ਗਿਆ | ਇਸ ਵਿਚ ਦੇਸ਼ ਭਰ ਤੋਂ 1,500 ਤੋਂ ਵੱਧ ਖਿਡਾਰੀਆਂ ਨੇ ਹਿੱਸਾ ਲਿਆ | ਸਮਾਗਮ ਦਾ ਉਦਘਾਟਨ ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨੇ ਕੀਤਾ | ਇਹ ਸਮਾਗਮ ਖੇਡ ਡਾਇਰੈਕਟੋਰੇਟ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਤੇ ਪਰੰਪਰਾਗਤ ਖੇਡਾਂ ਤੇ ਖੇਡ ਫੈਡਰੇਸ਼ਨ ਇੰਡੀਆ ਦੁਆਰਾ ਸਪਤ ਸਿੰਧੂ, ਖੇਲੋ੍ਹ ਭਾਰਤ, ਕ੍ਰੀਦਾ ਭਾਰਤੀ, ਰਾਸ਼ਟਰੀ ਖੇਡ ਵਿਗਿਆਨ ਤੇ ਸਰੀਰਕ ਸਿੱਖਿਆ ਪ੍ਰੀਸ਼ਦ ਸਮੇਤ ਹੋਰਾਂ ਵਰਗਾ ਨਾਲ ਸਾਂਝੇ ਤੌਰ 'ਤੇ ਕਰਵਾਇਆ ਗਿਆ | ਸਮਾਗਮ ਨੂੰ ਏਸ਼ੀਅਨ ਪਰੰਪਰਾਗਤ ਖੇਡਾਂ, ਖੇਡ ਐਸੋਸੀਏਸ਼ਨ, ਅੰਤਰਰਾਸ਼ਟਰੀ ਪਰੰਪਰਾਗਤ ਖੇਡਾਂ ਤੇ ਖੇਡ ਐਸੋਸੀਏਸ਼ਨ ਦਾ ਸਮਰਥਨ ਪ੍ਰਾਪਤ ਰਿਹਾ | ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨੇ ਰਵਾਇਤੀ ਭਾਰਤੀ ਖੇਡਾਂ ਦੇਸ਼ ਦੀ ਸੱਭਿਆਚਾਰਕ ਪਛਾਣ ਦਾ ਇਕ ਅਨਿੱਖੜਵਾਂ ਅੰਗ ਦੱਸਿਆ | ਉਨ੍ਹਾਂ ਨੇ ਕਬੱਡੀ, ਖੋ-ਖੋ, ਗੁੱਲੀ ਡੰਡਾ, ਗੱਤਕਾ ਵਰਗੀਆਂ 17 ਰਵਾਇਤੀ ਤੇ ਸਵਦੇਸ਼ੀ ਖੇਡਾਂ ਦੀ ਮਹੱਤਤਾ 'ਤੇ ਚਾਨਣਾ ਪਾਇਆ | ਉਦਘਾਟਨੀ ਸਮਾਰੋਹ ਦੌਰਾਨ ਮੰਚ 'ਤੇ ਮੌਜੂਦ ਪਤਵੰਤਿਆਂ ਵਿਚ ਉਪ ਕੁਲਪਤੀ ਪ੍ਰੋ. ਰੇਨੂੰ ਵਿਗ, ਡੀਨ ਯੂਨੀਵਰਸਿਟੀ ਇੰਸਟੱ੍ਰਕਸ਼ਨ ਪ੍ਰੋ. ਮੀਨਾਕਸ਼ੀ ਗੋਇਲ, ਰਜਿਸਟਰਾਰ ਡਾ. ਵਾਈ.ਪੀ. ਵਰਮਾ, ਡੀਨ ਵਿਦਿਆਰਥੀ ਭਲਾਈ ਡਾ. ਯੋਗੇਸ਼ ਰਾਵਲ, ਡਾਇਰੈਕਟਰ ਸਰੀਰਕ ਸਿੱਖਿਆ ਤੇ ਖੇਡਾਂ ਡਾ. ਰਾਕੇਸ਼ ਮਲਿਕ ਤੇ ਨੈਸ਼ਨਲ ਕੌਂਸਲ ਆਫ਼ ਸਪੋਰਟਸ ਸਾਇੰਸਜ਼ ਐਂਡ ਫਿਜ਼ੀਕਲ ਐਜੂਕੇਸ਼ਨ ਨੀਰਜ ਕੁਮਾਰ ਮਹਿਰਾ ਸ਼ਾਮਲ ਸਨ | ਰਜਿਸਟਰਾਰ ਪ੍ਰੋ. ਵਾਈ.ਪੀ. ਵਰਮਾ ਨੇ ਯੂਨੀਵਰਸਿਟੀ ਦੀ ਪ੍ਰਸ਼ਾਸਕੀ ਤਿਆਰੀ ਤੇ ਬੁਨਿਆਦੀ ਢਾਂਚੇ ਦੇ ਸਮਰਥਨ 'ਤੇ ਚਾਨਣਾ ਪਾਇਆ ਜਿਸ ਨੇ ਤਿਉਹਾਰ ਦੇ ਸੁਚਾਰੂ ਸੰਚਾਲਨ ਨੂੰ ਯਕੀਨੀ ਬਣਾਇਆ ਅਤੇ ਪੰਜਾਬ ਯੂਨੀਵਰਸਿਟੀ ਵਲੋਂ ਸਾਰਿਆਂ ਦਾ ਧੰਨਵਾਦ ਕੀਤਾ |
