ਚੰਡੀਗੜ੍ਹ, 25 ਮਈ (ਕਪਿਲ ਵਧਵਾ) ਚੰਡੀਗੜ ਦੇ ਸੈਕਟਰ-37 ਅਤੇ ਸੈਕਟਰ-41 ਦੀ ਡਿਵਾਈਡਿੰਗ ਰੋਡ 'ਤੇ ਇਕ ਨੌਜਵਾਨ ਵਲੋਂ ਮਾਮੂਲੀ ਸੜਕ ਹਾਦਸੇ ਤੋਂ ਬਾਅਦ ਗੁੱਸੇ 'ਚ ਆ ਕੇ ਆਪਣੀ ਹੀ ਮੋਟਰਸਾਈਕਲ ਨੂੰ ਅੱਗ ਲਗਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਦੇਖਦੇ ਹੀ ਦੇਖਦੇ ਬਾਈਕ ਧੂ-ਧੂ ਕਰ ਸੜਨ ਲੱਗ ਪਈ ਅਤੇ ਪੂਰੀ ਤਰਾਂ ਖਾਕ ਹੋ ਗਈ | ਘਟਨਾ ਦੀ ਸੂਚਨਾ ਮਿਲਣ 'ਤੇ ਫਾਇਰ ਬਿ੍ਗੇਡ ਅਤੇ ਪੁਲਿਸ ਟੀਮ ਮੌਕੇ 'ਤੇ ਪੁੱਜੀ | ਹਾਲਾਂਕਿ ਇਸ ਘਟਨਾ ਦੌਰਾਨ ਕਿਸੇ ਵੀ ਤਰਾਂ ਦਾ ਜਾਨੀ ਨੁਕਸਾਨ ਹੋਣ ਤੋਂ ਬਚਾਅ ਰਿਹਾ | ਜਾਣਕਾਰੀ ਅਨੁਸਾਰ ਪੰਜਾਬ ਦੇ ਰੋਪੜ ਨਿਵਾਸੀ ਜਸਵਿੰਦਰ ਸਿੰਘ, ਜੋ ਕਿ ਚੰਡੀਗੜ ਵਿਚ ਮਿਸਤਰੀ ਦਾ ਕੰਮ ਕਰਦਾ ਹੈ, ਐਤਵਾਰ ਦਿਨ ਦੇ ਸਮੇਂ ਆਪਣੀ ਬਾਈਕ 'ਤੇ ਸੈਕਟਰ-37ਅਤੇ 41 ਵਾਲੀ ਸੜਕ ਤੋਂ ਲੰਘ ਰਿਹਾ ਸੀ | ਇਸ ਦੌਰਾਨ ਉਸਦੀ ਬਾਈਕ ਅੱਗੇ ਚੱਲ ਰਹੀ ਇਕ ਕਾਰ ਨਾਲ ਪਿੱਛੋਂ ਟਕਰਾ ਗਈ | ਟੱਕਰ ਤੋਂ ਬਾਅਦ ਦੋਹਾਂ ਧਿਰਾਂ ਵਿਚਾਲੇ ਸੜਕ 'ਤੇ ਹੀ ਤਕਰਾਰ ਸ਼ੁਰੂ ਹੋ ਗਈ | ਚਸ਼ਮਦੀਦਾਂ ਮੁਤਾਬਕ ਬਹਿਸ ਦੌਰਾਨ ਜਸਵਿੰਦਰ ਸਿੰਘ ਅਚਾਨਕ ਗੁੱਸੇ ਵਿਚ ਆ ਗਿਆ ਅਤੇ ਉਸ ਨੇ ਬਾਈਕ ਦੀ ਪੈਟਰੋਲ ਟੈਂਕੀ ਦਾ ਢੱਕਣ ਖੋਲ ਕੇ ਜੇਬ ਵਿਚੋਂ ਮਾਚਿਸ ਕੱਢੀ ਤੇ ਬਾਈਕ ਨੂੰ ਅੱਗ ਲਗਾ ਦਿੱਤੀ | ਅੱਗ ਲੱਗਦੇ ਹੀ ਬਾਈਕ ਵਿਚੋਂ ਉੱਚੀਆਂ ਲਪਟਾਂ ਉੱਠਣ ਲੱਗ ਪਈਆਂ | ਰਾਹਗੀਰਾਂ ਵਲੋਂ ਤੁਰੰਤ ਪੁਲਿਸ ਕੰਟਰੋਲ ਰੂਮ ਤੇ ਫਾਇਰ ਬਿ੍ਗੇਡ ਨੂੰ ਸੂਚਿਤ ਕੀਤਾ ਗਿਆ | ਫਾਇਰ ਬਿ੍ਗੇਡ ਦੀ ਟੀਮ ਮੌਕੇ 'ਤੇ ਪੁੱਜੀ ਪਰ ਉਦੋਂ ਤੱਕ ਬਾਈਕ ਪੂਰੀ ਤਰਾਂ ਸੜ ਚੁੱਕੀ ਸੀ | ਇਸ ਤੋਂ ਬਾਅਦ ਸੈਕਟਰ-39 ਥਾਣਾ ਪੁਲਿਸ ਨੇ ਮੌਕੇ 'ਤੇ ਪੁੱਜ ਕੇ ਉਕਤ ਨੌਜਵਾਨ ਨੂੰ ਕਾਬੂ ਕਰ ਲਿਆ | ਸੈਕਟਰ-39 ਥਾਣਾ ਮੁਖੀ ਇੰਸਪੈਕਟਰ ਰਾਜੀਵ ਕੁਮਾਰ ਨੇ ਦੱਸਿਆ ਕਿ ਦੋਸ਼ੀ ਖ਼ਿਲਾਫ਼ ਕਲੰਦਰਾ ਤਿਆਰ ਕੀਤਾ ਗਿਆ | ਪੁਲਿਸ ਜਾਂਚ ਵਿਚ ਸਾਹਮਣੇ ਆਇਆ ਕਿ ਉੱਥੇ ਨੌਜਵਾਨ ਜੋ ਕਿ ਸ਼ਰਾਬ ਦੇ ਪ੍ਰਭਾਵ ਹੇਠ ਸੀ, ਨੇ ਬਿਨਾਂ ਨਤੀਜੇ ਦੀ ਪਰਵਾਹ ਕੀਤੇ ਆਪਣੇ ਹੀ ਮੋਟਰਸਾਈਕਲ ਨੂੰ ਅੱਗ ਲਗਾ ਦਿੱਤੀ | ਉਨਾਂ ਦੱਸਿਆ ਕਿ ਉਸ ਨੂੰ ਅੱਜ ਸੋਮਵਾਰ ਨੂੰ ਐਸ. ਡੀ. ਐਮ. ਅੱਗੇ ਪੇਸ਼ ਕੀਤਾ ਜਿਸ ਤੋਂ ਬਾਅਦ ਜ਼ਮਾਨਤ 'ਤੇ ਰਿਹਾਅ ਕਰ ਦਿੱਤਾ |
