ਬੁੜੈਲ ਪਿੰਡ ਵਿਖੇ ਸਿਲੰਡਰ ਫਟਣ ਦੇ ਮਾਮਲੇ 'ਚ ਮੁਲਜ਼ਮ ਜ਼ੇਰੇ ਇਲਾਜ
ਅਜੀਤ ਡੈਸਕ
28-05-2026
ਚੰਡੀਗੜ੍ਹ, 27 ਮਈ (ਕਪਿਲ ਵਧਵਾ)- ਬੁੜੈਲ ਪਿੰਡ ਵਿਚ ਗੈਰ ਕਾਨੂੰਨੀ ਤਰੀਕੇ ਨਾਲ ਗੈਸ ਭਰਨ ਦੌਰਾਨ ਸਿਲੰਡਰ ਫਟਣ ਦੇ ਮਾਮਲੇ ਵਿਚ ਸੈਕਟਰ-34 ਥਾਣਾ ਪੁਲਿਸ ਨੇ ਮੁਲਜ਼ਮ ਵਿਜੇ ਕੁਮਾਰ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ | ਘਟਨਾ ਦੌਰਾਨ ਝੁਲਸੇ ਲੋਕਾਂ ਵਿਚੋਂ ਮੁੰਨਾ (33) ਦੀ ਮੌਤ ਹੋਣ ਕਾਰਨ ਮਾਮਲੇ ਵਿਚ ਗੈਰ-ਇਰਾਦਾ ਹੱਤਿਆ ਦੀ ਧਾਰਾ ਵੀ ਸ਼ਾਮਲ ਕੀਤੀ ਗਈ ਹੈ | ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਸਤੀਸ਼ ਕੁਮਾਰ ਵਾਸੀ ਬੁੜੈਲ ਨੇ ਦੱਸਿਆ ਕਿ 25 ਮਈ ਨੂੰ ਜਦੋਂ ਉਹ ਖਾਣਾ ਤਿਆਰ ਕਰ ਰਿਹਾ ਸੀ ਤਾਂ ਇਸ ਦੌਰਾਨ ਗੈਰ-ਕਾਨੂੰਨੀ ਤਰੀਕੇ ਨਾਲ ਗੈਸ ਰੀਫ਼ਿਲ ਕਰਨ ਸਮੇਂ ਸਿਲੰਡਰ 'ਚ ਧਮਾਕਾ ਹੋ ਗਿਆ | ਧਮਾਕੇ ਕਾਰਨ ਉਥੇ ਮੌਜੂਦ ਮੁੰਨਾ, ਮਹੇਸ਼ ਤੇ ਗੋਪੀ ਸਮੇਤ ਕਈ ਲੋਕ ਗੰਭੀਰ ਤੌਰ 'ਤੇ ਝੁਲਸ ਗਏ | ਥਾਣਾ ਮੁਖੀ ਸ਼ਾਦੀ ਲਾਲ ਦਾ ਕਹਿਣਾ ਹੈ ਕਿ ਘਟਨਾ ਵਿਚ ਮੁਲਜ਼ਮ ਵਿਜੇ ਕੁਮਾਰ ਵੀ ਸੜਨ ਕਾਰਨ ਜ਼ਖ਼ਮੀ ਹੋ ਗਿਆ ਜਿਸ ਨੂੰ ਇਲਾਜ ਲਈ ਪੀ.ਜੀ.ਆਈ. ਚੰਡੀਗੜ੍ਹ ਦਾਖ਼ਲ ਕਰਵਾਇਆ ਗਿਆ ਹੈ | ਪੁਲਿਸ ਅਧਿਕਾਰੀਆਂ ਵਲੋਂ ਮਾਮਲੇ ਦੀ ਜਾਂਚ ਜਾਰੀ ਹੈ |
