ਚੰਡੀਗੜ੍ਹ, 5 ਜੂਨ (ਕਪਿਲ ਵਧਵਾ)- ਚੰਡੀਗੜ੍ਹ ਸਥਿਤ ਪੀ. ਜੀ. ਆਈ. ਅੰਦਰ ਸ਼ੁੱਕਰਵਾਰ ਸਵੇਰ ਲਾਂਡਰੀ ਵਾਲੇ ਪਾਸੇ ਇਕ ਵਿਅਕਤੀ ਦੀ ਦਰੱਖਤ 'ਤੇ ਲਟਕਦੀ ਲਾਸ਼ ਮਿਲਣ ਨਾਲ ਇਲਾਕੇ ਵਿਚ ਸਨਸਨੀ ਫੈਲ ਗਈ | ਮਿ੍ਤਕ ਦੀ ਪਛਾਣ ਲਾਂਡਰੀ ਦੀ ਦੁਕਾਨ 'ਤੇ ਕੰਮ ਕਰਨ ਵਾਲੇ ਰਜਤ ਵਜੋਂ ਹੋਈ ਹੈ, ਜਿਸਦੀ ਦੋ ਸਾਲ ਪਹਿਲਾ ਲਵ-ਮੈਰਿਜ ਹੋਈ ਸੀ ਅਤੇ ਉਸਦਾ ਇਕ ਬੇਟਾ ਵੀ ਹੈ | ਜਾਣਕਾਰੀ ਅਨੁਸਾਰ ਮਿ੍ਤਕ ਨੌਜਵਾਨ ਉੱਤਰ-ਪ੍ਰਦੇਸ਼ ਦੇ ਬਿਜਨੌਰ ਦਾ ਰਹਿਣ ਵਾਲਾ ਹੈ ਅਤੇ ਵੀਰਵਾਰ ਰਾਤ ਆਪਣੇ ਮਾਤਾ-ਪਿਤਾ ਦੇ ਖਰੜ ਸਥਿਤ ਘਰ ਤੋਂ ਜੋ ਚੁੰਨੀ ਲੈ ਕੇ ਨਿਕਲਿਆ ਸੀ ਉਸੇ ਨਾਲ ਉਸ ਨੇ ਫਾਹਾ ਲਗਾ ਲਿਆ | ਲਾਸ਼ ਮਿਲਣ 'ਤੇ ਚਸ਼ਮਦੀਦਾਂ ਵਲੋਂ ਪੀ. ਜੀ. ਆਈ ਸਥਿਤ ਪੁਲਿਸ ਚੌਂਕੀ ਨੂੰ ਸੂਚਿਤ ਕੀਤਾ ਗਿਆ | ਪੁਲਿਸ ਅਧਿਕਾਰੀਆਂ ਨੇ ਮੌਕੇ 'ਤੇ ਪਹੁੰਚ ਕੇ ਲਾਸ਼ ਨੂੰ ਥੱਲੇ ਉਤਾਰ ਕੇ ਪਰਿਵਾਰ ਨੂੰ ਉਕਤ ਘਟਨਾ ਦੀ ਸੂਚਨਾ ਦਿੱਤੀ | ਪੁਲਿਸ ਦੀ ਸ਼ੁਰੂਆਤੀ ਜਾਂਚ ਦੌਰਾਨ ਸਾਹਮਣੇ ਆਇਆ ਹੈ ਕਿ ਰਜਤ ਦਾ ਉਸਦੀ ਘਰਵਾਲੀ ਨਾਲ ਵਿਵਾਦ ਚੱਲ ਰਿਹਾ ਸੀ ਜਿਸ ਕਾਰਨ ਉਹ ਅਕਸਰ ਤਣਾਅ ਵਿਚ ਰਹਿੰਦਾ ਸੀ | ਪੁਲਿਸ ਨੇ ਲਾਸ਼ ਨੂੰ ਮੁਰਦਾਘਰ ਵਿਖੇ ਰਖਵਾ ਦਿੱਤਾ ਹੈ ਅਤੇ ਸਨਿੱਚਰਵਾਰ ਨੂੰ ਲਾਸ਼ ਦਾ ਪੋਸਟਮਾਰਟਮ ਕਰਵਾਇਆ ਜਾਵੇਗਾ | ਫ਼ਿਲਹਾਲ ਥਾਣਾ ਸੈਕਟਰ-11 ਦੀ ਪੁਲਿਸ ਵਲੋਂ ਧਾਰਾ 196 ਤਹਿਤ ਜਾਂਚ ਕੀਤੀ ਜਾ ਰਹੀ ਹੈ |
