ਐੱਸ. ਏ. ਐੱਸ. ਨਗਰ, 11 ਜੂਨ (ਕਪਿਲ ਵਧਵਾ)- ਸਾਈਬਰ ਠੱਗਾਂ ਵਲੋਂ ਇਕ ਡਾਕਟਰ ਦੇ ਕ੍ਰੈਡਿਟ ਕਾਰਡ 'ਚੋਂ 2 ਲੱਖ 59 ਹਜ਼ਾਰ 761 ਰੁ. ਉਡਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਇਸ ਸੰਬੰਧੀ ਸਾਈਬਰ ਕ੍ਰਾਈਮ ਥਾਣਾ ਮੁਹਾਲੀ ਨੇ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ | ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਡਾ. ਅਗਮਰੂਪ ਸਿੰਘ ਰੰਧਾਵਾ ਮੂਲ ਵਾਸੀ ਜਲੰਧਰ ਅਤੇ ਹਾਲ ਵਾਸੀ ਸੈਕਟਰ-37ਸੀ ਚੰਡੀਗੜ੍ਹ ਨੇ ਦੱਸਿਆ ਕਿ ਉਹ ਇਕ ਪ੍ਰਾਈਵੇਟ ਡਾਕਟਰ ਵਜੋਂ ਪ੍ਰੈਕਟਿਸ ਕਰਦਾ ਹੈ | ਉਨ੍ਹਾਂ ਮੁਹਾਲੀ ਸਥਿਤ ਆਪਣੇ ਹਸਪਤਾਲ ਵਿਖੇ ਮੌਜੂਦ ਸੀ ਤੇ ਇਸੇ ਦੌਰਾਨ ਉਸ ਨੂੰ ਬੈਂਕ ਵਲੋਂ ਇਕ ਸੁਨੇਹਾ ਪ੍ਰਾਪਤ ਹੋਇਆ | ਸੁਨੇਹੇ ਵਿਚ ਦੱਸਿਆ ਗਿਆ ਸੀ ਕਿ ਉਸ ਦੇ ਕ੍ਰੈਡਿਟ ਕਾਰਡ ਤੋਂ ਤੜਕੇ ਕਰੀਬ 4 ਵਜੇ 2,59,761.26 ਰੁ. ਦੀ ਆਨਲਾਈਨ ਟਰਾਂਸਜੈਕਸ਼ਨ ਕੀਤੀ ਗਈ ਹੈ | ਸ਼ਿਕਾਇਤਕਰਤਾ ਅਨੁਸਾਰ ਰਾਤ ਸਮੇਂ ਉਸ ਦੇ ਮੋਬਾਈਲ ਫ਼ੋਨ 'ਤੇ ਇਕ ਵੈਰੀਫਿਕੇਸ਼ਨ ਕਾਲ ਵੀ ਆਈ ਸੀ ਪਰ ਉਸ ਨੇ ਉਸ ਕਾਲ ਦਾ ਕੋਈ ਜਵਾਬ ਨਹੀਂ ਦਿੱਤਾ ਸੀ | ਇਸ ਦੇ ਬਾਵਜੂਦ ਉਸ ਦੇ ਖਾਤੇ 'ਚੋਂ ਵੱਡੀ ਰਕਮ ਟਰਾਂਸਜੈਕਸ਼ਨ ਹੋ ਗਈ | ਪੀੜਤ ਨੇ ਇਸ ਧੋਖਾਧੜੀ ਸੰਬੰਧੀ ਨੈਸ਼ਨਲ ਸਾਈਬਰ ਕ੍ਰਾਈਮ ਰਿਪੋਰਟਿੰਗ ਪੋਰਟਲ 'ਤੇ ਵੀ ਸ਼ਿਕਾਇਤ ਦਰਜ ਕਰਵਾਈ ਸੀ | ਮਾਮਲੇ ਦੀ ਮੁੱਢਲੀ ਜਾਂਚ ਤੋਂ ਬਾਅਦ ਸਾਈਬਰ ਕ੍ਰਾਈਮ ਥਾਣਾ ਮੁਹਾਲੀ ਨੇ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ | ਪੁਲਿਸ ਵਲੋਂ ਸਾਈਬਰ ਠੱਗਾਂ ਦੀ ਪਛਾਣ ਤੇ ਧੋਖਾਧੜੀ ਨਾਲ ਕਢਾਈ ਗਈ ਰਕਮ ਸੰਬੰਧੀ ਸੁਰਾਗ ਲੱਭਣ ਲਈ ਅਗਲੇਰੀ ਜਾਂਚ ਕੀਤੀ ਜਾ ਰਹੀ ਹੈ |
