ਡੇਰਾਬੱਸੀ, 14 ਜੂਨ (ਰਣਬੀਰ ਸਿੰਘ ਪੜ੍ਹੀ)-ਭਾਰਤ ਵਿਕਾਸ ਪਰਿਸ਼ਦ (ਵਿਵੇਕਾਨੰਦ ਸ਼ਾਖਾ ਡੇਰਾਬੱਸੀ) ਵਲੋਂ ਅੱਜ ਏ. ਟੀ. ਐਸ. ਵੈਲੀ ਸਕੂਲ ਵਿਖੇ ਇਕ ਵਿਸ਼ੇਸ਼ ਸਨਮਾਨ ਸਮਾਰੋਹ ਕਰਵਾਇਆ ਗਿਆ | ਇਸ ਦੌਰਾਨ 8ਵੀਂ ਨੈਸ਼ਨਲ ਕੇਟਲਬੈਲ ਲਿਫਟਿੰਗ ਚੈਂਪੀਅਨਸ਼ਿਪ 'ਚ ਸੋਨੇ, ਚਾਂਦੀ ਤੇ ਕਾਂਸੀ ਦੇ ਮੈਡਲ ਜਿੱਤ ਕੇ ਇਲਾਕੇ ਦਾ ਨਾਂਅ ਰੌਸ਼ਨ ਕਰਨ ਵਾਲੇ ਖਿਡਾਰੀਆਂ ਨੂੰ ਸਨਮਾਨਿਤ ਕੀਤਾ ਗਿਆ | ਇਸ ਸੰਬੰਧੀ ਪ੍ਰੀਸ਼ਦ ਦੇ ਪ੍ਰਧਾਨ ਨਿਤਿਨ ਜਿੰਦਲ ਨੇ ਦੱਸਿਆ ਕਿ ਇਹ ਰਾਸ਼ਟਰੀ ਪੱਧਰ ਦੀ ਚੈਂਪੀਅਨਸ਼ਿਪ ਮਹਾਰਾਸ਼ਟਰ ਦੇ ਪ੍ਰਸਿੱਧ ਸ਼ਹਿਰ ਸ਼ਿਰਡੀ ਵਿਖੇ ਕਰਵਾਈ ਗਈ ਸੀ ਜਿਥੇ ਡੇਰਾਬੱਸੀ ਦੇ ਖਿਡਾਰੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ | ਉਨ੍ਹਾਂ ਦੱਸਿਆ ਕਿ ਚੈਂਪੀਅਨਸ਼ਿਪ ਦੇ ਵੱਖ-ਵੱਖ ਵਰਗਾਂ ਵਿਚ ਮੈਡਲ ਜਿੱਤਣ ਵਾਲੇ ਜੇਤੂਆਂ 'ਚ ਜੂਨੀਅਰ ਵਰਗ (ਏ. ਟੀ. ਐਸ. ਵੈਲੀ ਸਕੂਲ ਦੇ ਵਿਦਿਆਰਥੀ) ਕੀਰਤਵੀਰ ਸਪੁੱਤਰੀ ਗੁਰਦੇਵ ਸਿੰਘ, ਪਰਿਆਂਸ਼ੀ ਸਪੁੱਤਰੀ ਰਮਨ ਪ੍ਰਕਾਸ਼ ਤੇ ਅਧਿ੍ਤ ਸਪੁੱਤਰ ਪ੍ਰਦੀਪ ਨੇ ਸੋਨ ਤਗਮਾ, ਦਿਵਿਸ਼ਾ ਸਪੁੱਤਰੀ ਸੰਦੀਪ ਨੇ ਚਾਂਦੀ ਤਗਮਾ ਤੇ ਸਮਰਿਤ ਸਪੁੱਤਰੀ ਗੁਰਜੰਟ ਸਿੰਘ ਨੇ ਕਾਂਸੀ ਦਾ ਤਗਮਾ, ਵੈਟਰਨ ਕੈਟੇਗਰੀ ਵਰਗ 'ਚ ਡੇਰਾਬੱਸੀ ਦੀਆਂ ਮਹਿਲਾ ਖਿਡਾਰਨਾਂ ਸੁਸ਼ਮਾ ਬਾਜਵਾ, ਸੰਦੀਪ ਕੌਰ ਤੇ ਜਸਕਰਨ ਕੌਰ ਨੇ ਸ਼ਾਨਦਾਰ ਖੇਡ ਦਾ ਮੁਜ਼ਾਹਰਾ ਕਰਦਿਆਂ ਸੋਨੇ ਦੇ ਮੈਡਲ ਜਿੱਤੇ | ਇਸ ਸਨਮਾਨ ਸਮਾਰੋਹ ਦੌਰਾਨ ਭਾਰਤ ਵਿਕਾਸ ਪ੍ਰੀਸ਼ਦ ਵਲੋਂ ਸਾਰੇ ਜੇਤੂ ਬੱਚਿਆਂ ਤੇ ਖਿਡਾਰੀਆਂ ਨੂੰ ਵਿਸ਼ੇਸ਼ ਸਨਮਾਨ ਚਿੰਨ੍ਹ ਤੇ ਤੋਹਫ਼ੇ ਦੇ ਕੇ ਹੌਸਲਾ ਅਫ਼ਜ਼ਾਈ ਕੀਤੀ ਗਈ | ਇਸ ਖ਼ੁਸ਼ੀ ਮੌਕੇ ਸਕੂਲ ਦੀ ਪਿ੍ੰਸੀਪਲ ਨੀਨਾ ਪਾਂਡੇ, ਡਾਇਰੈਕਟਰ ਜੇ. ਅਮਰਦੀਪ ਸਿੰਘ, ਬਰਖਾ ਰਾਮ, ਉਪੇਸ਼ ਬੰਸਲ, ਜੈ ਪ੍ਰਕਾਸ਼ ਸਮੇਤ ਸਮੂਹ ਜੇਤੂ ਬੱਚਿਆਂ ਦੇ ਮਾਪੇ ਤੇ ਪਤਵੰਤੇ ਸੱਜਣ ਹਾਜ਼ਰ ਸਨ |
