ਖਰੜ, 14 ਜੁਲਾਈ (ਜੰਡਪੁਰੀ)-ਭਾਰਤੀ ਕਿਸਾਨ ਯੂਨੀਅਨ ਸਿੱਧੂਪੁਰ ਏਕਤਾ ਵਲੋਂ ਆਪਣੀਆਂ ਮੰਗਾਂ ਨੂੰ ਲੈ ਕੇ ਟੋਲ ਪਲਾਜਾ ਭਾਗੋਮਾਜਰਾ ਤੇ ਬਜਹੇੜੀ ਨੂੰ ਟੋਲ ਮੁਕਤ ਕਰਕੇ ਆਪਣੀਆਂ ਮੰਗਾਂ ਦੀ ਪੂਰਤੀ ਲਈ ਪੰਜਾਬ ਸਰਕਾਰ ਖ਼ਿਲਾਫ਼ ਰੋਸ ਪ੍ਰਦਰਸ਼ਨ ਕਰਦਿਆਂ ਧਰਨੇ ਲਗਾਏ ਗਏ। ਇਸ ਮੌਕੇ ਭਾਰਤੀ ਕਿਸਾਨ ਯੂਨੀਅਨ ਦੇ ਆਗੂ ਗੁਰਜੀਤ ਸਿੰਘ ਵਜੀਦਪੁਰ, ਗੁਰਿੰਦਰ ਸਿੰਘ ਗਰੇਵਾਲ ਮਲਕਪੁਰ, ਸੁਰਮੁੱਖ ਸਿੰਘ ਛੱਜੂਮਾਜਰਾ, ਗਿਆਨ ਸਿੰਘ ਧੜਾਕ ਅਤੇ ਪ੍ਰਕਾਸ਼ ਸਿੰਘ ਬੱਬਲ ਨੇ ਕਿਹਾ ਕਿ ਕੇਂਦਰ ਸਰਕਾਰ ਵਲੋਂ ਜੋ ਭਾਰਤ-ਅਮਰੀਕਾ ਵਪਾਰ ਮੁਕਤ ਸਮਝੌਤਾ ਕੀਤਾ ਗਿਆ ਹੈ, ਉਸ ‘ਚ ਕਿਸਾਨਾਂ ਅਤੇ ਦੇਸ਼ ਦਾ ਬਹੁਤ ਵੱਡਾ ਨੁਕਸਾਨ ਹੈ। ਉਨ੍ਹਾਂ ਪੰਜਾਬ ਸਰਕਾਰ ‘ਤੇ ਵਰ੍ਹਦਿਆਂ ਕਿਹਾ ਕਿ ਸੂਬਾ ਸਰਕਾਰ ਨੇ ਕਿਸਾਨਾਂ ਦੇ ਸੰਘਰਸ਼ ਨੂੰ ਦੇਖਦਿਆਂ ਜੋ ਪਹਿਲਾਂ ਨਵੀਂ ਲੈਂਡ ਪੂਲਿੰਗ ਪਾਲਿਸੀ ਰੱਦ ਕੀਤੀ ਸੀ, ਉਸ ਨੂੰ ਉਹ ਮੁੜ ਤੋਂ ਲਾਗੂ ਕਰਨਾ ਚਾਹੁੰਦੀ ਹੈ, ਪਰ ਕਿਸਾਨ ਜਥੇਬੰਦੀਆਂ ਇਸ ਨੂੰ ਕਿਸੇ ਵੀ ਰੂਪ ‘ਚ ਲਾਗੂ ਨਹੀਂ ਹੋਣ ਦੇਣਗੀਆਂ। ਇਸ ਮੌਕੇ ਪ੍ਰਕਾਸ਼ ਸਿੰਘ ਬੱਬਲ ਨੇ ਮੰਗ ਕੀਤੀ ਕਿ ਕਿਸਾਨਾਂ ਤੋਂ ਕਰਜੇ ਲੈਣ ਮੌਕੇ ਜੋ ਚੈੱਕ ਲਈ ਗਏ ਸਨ, ਉਨ੍ਹਾਂ ਦੀ ਦੁਰਵਰਤੋਂ ਹੋਈ ਹੈ, ਜਿਸ ਕਾਰਨ ਕਈ ਕਿਸਾਨਾਂ ਨੂੰ ਜੇਲ੍ਹਾਂ ਕੱਟਣੀਆਂ ਪਈਆਂ ਹਨ, ਜਦਕਿ ਕਈ ਕਿਸਾਨ ਬੈਂਕ ਮੈਨੇਜਰਾਂ ਦੀ ਘਪਲੇਬਾਜ਼ੀ ਦਾ ਸ਼ਿਕਾਰ ਹੋਏ। ਉਨ੍ਹਾਂ ਮੰਗ ਕੀਤੀ ਕਿ ਕਿਸਾਨਾਂ ਤੋਂ ਕਰਜੇ ਲੈਣ ਮੌਕੇ ਲਏ ਗਏ ਖਾਲੀ ਚੈੱਕ ਵਾਪਸ ਕੀਤੇ ਜਾਣ ਅਤੇ ਭਵਿੱਖ ‘ਚ ਕਿਸੇ ਵੀ ਕਿਸਾਨ ਤੋਂ ਖਾਲੀ ਚੈੱਕ ਨਾ ਲਿਆ ਜਾਵੇ। ਇਸ ਮੌਕੇ ਜਸਬੀਰ ਸਿੰਘ ਜੱਸੀ, ਰਣਧੀਰ ਸਿੰਘ ਛੱਜੂਮਾਜਰਾ, ਜਸਵੀਰ ਸਿੰਘ ਘੋਗਾ, ਹਰਪ੍ਰੀਤ ਸਿੰਘ ਛੱਜੂਮਾਜਰਾ, ਪੰਕਜ ਨਿਆਮੀਆਂ, ਹਰਵਿੰਦਰ ਸਿੰਘ ਮੱਕੜਾਂ, ਭਰਪੂਰ ਸਿੰਘ ਭਾਗੋਮਾਜਰਾ, ਦਿਲਬਾਗ ਸਿੰਘ ਭਾਗੋਮਾਜਰਾ, ਕ੍ਰਿਪਾਲ ਸਿੰਘ ਬਦੇਸ਼ਾ, ਸੁੱਚਾ ਸਿੰਘ ਭਾਗੋਮਾਜਰਾ, ਉੱਤਮ ਸਿੰਘ ਬਰਵਾਲੀ, ਯੁਵਰਾਜ ਸਿੰਘ, ਯਾਦਵਿੰਦਰ ਸਿੰਘ ਕਲੌੜ, ਸੁਖਦੀਪ ਸਿੰਘ ਬਠਿੰਡਾ, ਸੁਖਜਿੰਦਰ ਸਿੰਘ ਵਜੀਦਪੁਰ ਤੇ ਅਵਤਾਰ ਸਿੰਘ ਛੱਜੂਮਾਜਰਾ ਤੋਂ ਇਲਾਵਾ ਖੇਤਰ ਦੇ ਹੋਰ ਵੱਡੀ ਗਿਣਤੀ ‘ਚ ਕਿਸਾਨ ਹਾਜ਼ਰ ਸਨ।
