ਰੂਪਨਗਰ, 25 ਫਰਵਰੀ (ਗੁਰਪ੍ਰੀਤ ਸਿੰਘ ਹੁੰਦਲ)-ਰੂਪਨਗਰ ਤੋਂ ਨੂਰਪੁਰ ਬੇਦੀ ਮਾਰਗ 'ਤੇ (ਭਿੰਡਰ ਨਗਰ) ਕੋਲ ਪਹਾੜੀ ਢਿੱਗਾਂ ਗਿਰਨ ਕਾਰਨ ਰੋਡ 'ਤੇ ਚਲਦੇ ਟੈਫ਼ਿਕ ਕਾਰਨ ਹਾਦਸਾ ਹੋਣ ਦਾ ਖ਼ਤਰਾ ਦਰਪੇਸ਼ ਹੈ। ਇਸ ਸਬੰਧੀ ਗੜਬਾਗਾ ਨਿਵਾਸੀ ਲਖਵਿੰਦਰ ਸਿੰਘ ਨੇ ਕਿਹਾ ਕਿ ਉਕਤ ਜਗ੍ਹਾਂ 'ਤੇ ਕੂਹਣੀ ਮੋੜ ਹੋਣ ਕਾਰਨ ਸਾਹਮਣਿਓਂ ਆ ਰਹੇ ਵਾਹਨ ਨਜ਼ਰ ਨਹੀਂ ਪੈਂਦੇ ਤੇ ਸੜਕ ਵਿਚ ਮਿੱਟੀ ਦੇ ਢੇਲੇ ਡਿੱਗਣ ਹੋਣ ਕਾਰਨ ਸੜਕ ਦੇ ਦੂਜੇ ਬੰਨੇ ਜਗ੍ਹਾਂ ਬਹੁਤ ਨੀਵੀਂ ਹੋਣ ਦੇ ਚਲਦਿਆਂ ਵਾਹਨਾਂ ਦੀ ਟੱਕਰ ਦੇ ਕਾਰਨ ਕੋਈ ਵੀ ਜਾਨਲੇਵਾ ਹਾਦਸਾ ਹੋ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਡਿੱਗੀਆਂ ਹੋਈਆਂ ਢਿੱਗਾਂ ਨੂੰ ਤਕਰੀਬਨ 8 ਦਿਨ ਦਾ ਸਮਾਂ ਹੋ ਗਿਆ ਹੈ ਤੇ ਛੋਟੇ ਮੋਟੇ ਹਾਦਸੇ ਵੀ ਹੋ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਪ੍ਰਸ਼ਾਸਨ ਵਲੋਂ ਇਸ ਸਬੰਧ ਵਿਚ ਕੋਈ ਵੀ ਕਾਰਵਾਈ ਅਮਲ ਵਿਚ ਨਹੀਂ ਲਿਆਂਦੀ ਗਈ। ਉਹਨਾਂ ਮੰਗ ਕੀਤੀ ਕਿ ਕੀਮਤੀ ਮਨੁੱਖੀ ਜਾਨਾਂ ਨੂੰ ਧਿਆਨ ਵਿਚ ਰੱਖਦਿਆਂ ਇਸ ਕੂਹਣੀ ਮੋੜ 'ਤੇ ਡਿੱਗੀਆਂ ਪਹਾੜੀ ਦੀਆਂ ਢਿਗਾਂ ਨੂੰ ਚੁਕਵਾਇਆ ਜਾਵੇ ਤੇ ਆਵਾਜਾਈ ਸੁਚਾਰੂ ਰੂਪ ਵਿਚ ਬਹਾਲ ਕੀਤੀ ਜਾਵੇ।