ਰੂਪਨਗਰ, 5 ਅਪ੍ਰੈਲ (ਸਤਨਾਮ ਸਿੰਘ ਸੱਤੀ)-ਜ਼ਿਲ੍ਹਾ ਲਿਖਾਰੀ ਸਭਾ ਦੀ ਮਾਸਿਕ ਇਕੱਤਰਤਾ ਸੁਰਜਨ ਸਿੰਘ ਦੇ ਗ੍ਰਹਿ ਵਿਖੇ ਸਭਾ ਦੇ ਪ੍ਰਧਾਨ ਐਡਵੋਕੇਟ ਸੁਰੇਸ਼ ਭਿਉਰਾ ਦੀ ਅਗਵਾਈ ਹੇਠ ਕਰਵਾਈ ਗਈ | ਸਾਹਿਤਕ ਇਕੱਤਰਤਾ ਦੌਰਾਨ ਕਵੀ ਦਰਬਾਰ ਵਿਚ ਵੱਖ-ਵੱਖ ਸਾਹਿਤਕਾਰਾਂ ਨੇ ਆਪਣੀਆਂ ਰਚਨਾਵਾਂ ਪੇਸ਼ ਕੀਤੀਆਂ | ਸ਼ੁਰੂਆਤ ਕੁਲਵਿੰਦਰ ਖੈਰਾਬਾਦੀ ਨੇ ਕੀਤੀ, ਜਦਕਿ ਹਰਦੀਪ ਗਿੱਲ ਨੇ ਤਰੰਨਮ ਵਿਚ ਗੀਤ ਪੇਸ਼ ਕੀਤਾ | ਛਿੱਬਰ ਸਹੇੜੀ ਨੇ ਧਾਰਮਿਕ ਗੀਤ, ਰਾਹੁਲ ਸ਼ੁਕਲਾ ਨੇ ਮਿੰਨੀ ਕਹਾਣੀ ਅਤੇ ਗਿਆਨੀ ਈਸ਼ਰ ਸਿੰਘ ਥਲੀ ਨੇ ਅਜੋਕੀ ਰਾਜਨੀਤੀ 'ਤੇ ਆਧਾਰਿਤ ਰਚਨਾ ਪੇਸ਼ ਕੀਤੀ | ਪ੍ਰੋ. ਕੁਲਵਿੰਦਰ ਸਿੰਘ ਬੱਬੂ ਨੇ ਆਧੁਨਿਕਤਾ ਅਤੇ ਮਨੁੱਖਤਾ ਵਿਚ ਵਧ ਰਹੀ ਸੰਕੁਚਿਤ ਸੋਚ 'ਤੇ ਕਵਿਤਾ ਪੜ੍ਹੀ, ਮੋਹਨ ਸਿੰਘ ਪਪਰਾਲਾ ਅਤੇ ਕੁਲਬੀਰ ਸਿੰਘ ਭੋਗਲ ਨੇ ਸਮਾਜਿਕ ਮਸਲਿਆਂ ਅਤੇ ਭਿ੍ਸ਼ਟਾਚਾਰ 'ਤੇ ਆਪਣੇ ਵਿਚਾਰ ਸਾਂਝੇ ਕੀਤੇ | ਇਸ ਤੋਂ ਇਲਾਵਾ ਮਿਥਿਹਾਸ ਅਤੇ ਸਾਹਿਤਕ ਪੱਖਾਂ 'ਤੇ ਵੀ ਗੰਭੀਰ ਵਿਚਾਰ-ਵਟਾਂਦਰਾ ਹੋਇਆ | ਸੁਰਜਨ ਸਿੰਘ ਨੇ ਵੀ ਆਪਣੀ ਕਵਿਤਾ ਰਾਹੀਂ ਹਾਜ਼ਰੀ ਲਗਵਾਈ ਅਤੇ ਸਟੇਜ ਸਕੱਤਰ ਦੀ ਭੂਮਿਕਾ ਨਿਭਾਈ | ਅਖੀਰ ਵਿਚ ਪ੍ਰਧਾਨ ਐਡਵੋਕੇਟ ਸੁਰੇਸ਼ ਭਿਉਰਾ ਨੇ ਸਭ ਦਾ ਧੰਨਵਾਦ ਕਰਦਿਆਂ ਆਪਣੀਆਂ ਕਵਿਤਾਵਾਂ ਪੇਸ਼ ਕੀਤੀਆਂ ਅਤੇ ਰਾਜਨੀਤੀ ਵਿਚ ਡਿਗਦੇ ਭਾਸ਼ਾਈ ਮਿਆਰ 'ਤੇ ਚਿੰਤਾ ਜਤਾਈ |
