ਰੂਪਨਗਰ, 6 ਅਪ੍ਰੈਲ (ਸਤਨਾਮ ਸਿੰਘ ਸੱਤੀ)-ਰੂਪਨਗਰ ਜ਼ਿਲ੍ਹੇ ਦੇ ਪਿੰਡ ਹਵੇਲੀ ਕਲਾਂ ਨਾਲ ਸੰਬੰਧਿਤ ਮਨਵੀਰ ਕੌਰ ਗਾਹੁਣੀਆ (ਪੁੱਤਰੀ ਗੁਰਮੀਤ ਸਿੰਘ ਗਹੁਣੀਆਂ) ਨੇ ਆਸਟਰੇਲੀਆ ਦੇ ਮੈਲਬੌਰਨ 'ਚ 3 ਤੋਂ 5 ਅਪ੍ਰੈਲ ਤੱਕ ਹੋਈਆਂ 38ਵੀਂ ਆਸਟਰੇਲੀਅਨ ਸਿੱਖ ਖੇਡਾਂ ਵਿਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਟਰਾਫ਼ੀ ਤੇ ਤਗਮਾ ਜਿੱਤਿਆ | ਇਸ ਦੀ ਜਾਣਕਾਰੀ ਗੁਰਮੀਤ ਸਿੰਘ ਗਹੁਣੀਆਂ ਨੇ ਦਿੱਤੀ | ਉਹਨਾਂ ਦੱਸਿਆ ਕਿ ਮਨਵੀਰ ਕੌਰ ਨੇ ਖੋ-ਖੋ ਮੁਕਾਬਲੇ ਵਿਚ ਵਿਕਟੋਰਿਅਨ ਇੰਗਲਿਸ਼ ਟੀਮ ਵਲੋਂ ਭਾਗ ਲੈਂਦਿਆਂ ਟੀਮ ਦੀ ਅਗਵਾਈ ਕੀਤੀ ਅਤੇ ਤੀਜਾ ਸਥਾਨ ਹਾਸਲ ਕੀਤਾ | ਇਸ ਖੇਡ ਸਮਾਗਮ ਵਿਚ ਆਸਟਰੇਲੀਆ ਦੀਆਂ ਸੱਤ ਸਟੇਟਾਂ ਅਤੇ ਮੈਲਬੌਰਨ ਦੇ ਸਿੱਖ ਖਿਡਾਰੀਆਂ ਸਮੇਤ ਕਰੀਬ 9000 ਖਿਡਾਰੀਆਂ ਨੇ ਭਾਗ ਲਿਆ | ਇਹ ਵੀ ਜ਼ਿਕਰਯੋਗ ਹੈ ਕਿ ਆਸਟਰੇਲੀਅਨ ਸਿੱਖ ਖੇਡਾਂ 1987 ਤੋਂ ਲਗਾਤਾਰ ਕਰਵਾਈਆਂ ਜਾ ਰਹੀਆਂ ਹਨ ਅਤੇ ਇਹ ਵਿਦੇਸ਼ਾਂ ਵਿਚ ਸਿੱਖ ਭਾਈਚਾਰੇ ਦਾ ਇੱਕ ਵੱਡਾ ਖੇਡ ਸਮਾਗਮ ਮੰਨਿਆ ਜਾਂਦਾ ਹੈ |
