ਰਾਜਪੁਰਾ, 5 ਜਨਵਰੀ (ਜੀ.ਪੀ. ਸਿੰਘ)-ਲੋਕ ਸਾਹਿਤ ਸੰਗਮ ਰਾਜਪੁਰਾ ਦੀ ਸਾਹਿਤਕ ਬੈਠਕ ਸਥਾਨਕ ਰੋਟਰੀ ਭਵਨ 'ਚ ਡਾ. ਗੁਰਵਿੰਦਰ ਅਮਨ ਦੀ ਪ੍ਰਧਾਨਗੀ ਹੇਠ ਹੋਈ | ਨਵੇਂ ਸਾਲ ਦੀ ਆਮਦ ਅਤੇ ਠੰਢ ਦੇ ਮਾਹੌਲ 'ਚ ਕਵੀਆਂ ਨੇ ਆਪਣੀ ਕਵਿਤਾਵਾਂ ਰਾਹੀਂ ਗਰਮਾਇਸ਼ ਕੀਤੀ | ਸਭਾ ਦਾ ਆਗਾਜ਼ ਕਰਮ ਸਿੰਘ ਹਕੀਰ ਨੇ ਪਿਛਲੇ ਵਰ੍ਹੇ ਹੜ੍ਹਾਂ ਦੀ ਤਬਾਹੀ ਦੀ ਤ੍ਰਾਸਦੀ ਦਾ ਕਵਿਤਾ ਰਾਹੀਂ ਬਿਆਨ ਕੀਤਾ | ਕੁਲਵੰਤ ਸਿੰਘ ਜੱਸਲ ਨੇ ਨਵ ਵਰ੍ਹੇ ਤੇ ਲੋਕਾਂ ਨੂੰ ਨਸ਼ਿਆਂ ਨੂੰ ਤਿਆਗ ਕੇ ਪਿਆਰ ਵੰਡਣ ਦੀ ਕਵਿਤਾ ਸਾਂਝੀ ਕੀਤੀ | ਮਨਜੀਤ ਸਿੰਘ ਨਾਗਰਾ ਨੇ ਸੰਗੀਤਮਈ ਗੀਤ ਸੁਣਾ ਕੇ ਮਾਹੌਲ ਰੰਗੀਨ ਕੀਤਾ | ਰਾਕੇਸ਼ ਨਾਦਾਨ ਨੇ ਰੁਬਾਈ ਸੁਣਾ ਕੇ ਚੰਗਾ ਰੰਗ ਬੰਨਿ੍ਹਆ | ਸੁਨੀਤਾ ਦੇਸਰਾਜ ਨੇ ਕਵਿਤਾ 'ਮੈ ਸੁੱਕਿਆ ਬੂਟਾ ਵੇ ਸੱਜਣਾਂ, ਤੂੰ ਫੁੱਲਾਂ ਦੀ ਵੇਲ ਵੇ ਸੱਜਣਾਂ' ਸੁਣਾਇਆ | ਸੁਰਿੰਦਰ ਕੌਰ ਬਾੜਾ ਨੇ ਬੁਲੰਦ ਆਵਾਜ਼ ਵਿਚ 'ਤੇਰੇ ਇਸ਼ਕ 'ਚ ਜੋਗਨ ਹੋ ਗਈ ਆ' ਸੁਣਾ ਕੇ ਮਾਹੌਲ ਸਿਰਜਿਆ | ਹਰਪਾਲ ਸਿੰਘ ਪਾਲ ਨੇ 'ਕਰਨ ਵਾਸਤੇ ਕੌਮ ਦੀ ਧੋਣ ਉੱਚੀ' ਸੁਣਾ ਕੇ ਠੰਢ ਦੇ ਮੌਸਮ ਵਿਚ ਵੀ ਗਰਮਾਇਸ਼ ਪੈਦਾ ਕੀਤੀ | ਸੰਗਮ ਦੇ ਪ੍ਰਧਾਨ ਡਾ ਗੁਰਵਿੰਦਰ ਅਮਨ ਨੇ 'ਸਾਲ ਨਹੀਂ ਬਦਲਿਆ ਦੋਸਤੋ, ਸਿਰਫ਼ ਅੱਖਰਾਂ ਦਾ ਹੇਰ ਫੇਰ ਹੀ ਬਦਲਿਆ ਹੈ' ਅਤੇ ਮਿੰਨੀ ਕਹਾਣੀ 'ਮੁਬਾਰਕਬਾਦ' ਸੁਣਾ ਕੇ ਅਜੋਕੇ ਸਮਾਜ ਤੇ ਵਿਅੰਗ ਕੀਤਾ | ਸੁਰਿੰਦਰ ਸਿੰਘ ਸੋਹਣਾ ਨੇ ਆਸਟ੍ਰੇਲੀਆ ਤੋਂ ਫ਼ੋਨ ਰਾਹੀਂ ਭੇਜੀ ਕਵਿਤਾ ਦਾ ਵਿਖਿਆਨ ਕੀਤਾ ਗਿਆ ਅਤੇ ਯਾਦਵਿੰਦਰ ਸਿੰਘ ਕਲੋਲੀ ਦੀ ਕਵਿਤਾ ਵੀ ਪੜ੍ਹਦੇ ਸੁਣਾਈ ਗਈ | ਹਰਪਾਲ ਸਿੰਘ ਪਾਲ ਨੇ ਮੰਚ ਦੀ ਕਾਰਵਾਈ ਬਾਖ਼ੂਬੀ ਨਾਲ ਚਲਾਈ |