ਪਟਿਆਲਾ 5 ਮਾਰਚ (ਧਰਮਿੰਦਰ ਸਿੰਘ ਸਿੱਧੂ)-ਸਭਿਆਚਾਰਕ ਵਿਰਾਸਤ ਅਤੇ ਵਾਤਾਵਰਨ ਜਾਗਰੂਕਤਾ ਦੇ ਜੀਵੰਤ ਪ੍ਰਦਰਸ਼ਨ 'ਚ ਸਕਾਲਰਫੀਲਡਜ ਪਬਲਿਕ ਸਕੂਲ ਪਟਿਆਲਾ ਨੇ ਇਕ ਅਨੋਖੇ ਢੰਗ ਨਾਲ ਹੋਲੀ ਦਾ ਤਿਉਹਾਰ ਮਨਾਇਆ | ਇਸ ਮੌਕੇ ਸਕੂਲ ਵਲੋਂ ਰਵਾਇਤੀ ਰਸਾਇਣਿਕ ਰੰਗਾਂ ਨੂੰ ਛੱਡ ਕੇ, ਵਿਦਿਆਰਥੀਆਂ ਅਤੇ ਸਟਾਫ਼ ਨੇ ਗੇਂਦੇ, ਗੁਲਾਬ, ਚਮੇਲੀ ਆਦਿ ਵੱਖ-ਵੱਖ ਰੰਗਾਂ ਦੇ ਫੁੱਲਾਂ ਨਾਲ ਆਪਣੇ ਆਪ ਨੂੰ ਸਜਾਇਆ, ਜੋ ਸਥਾਈ ਭਾਵਨਾ ਨੂੰ ਦਰਸਾਉਂਦਾ ਹੈ | ਇਸ ਮੌਕੇ ਗੁਜੀਆ ਅਤੇ ਠੰਡਾਈ ਆਦਿ ਰਵਾਇਤੀ ਪਕਵਾਨਾਂ ਅਤੇ ਰੰਗੀਨ ਮਿਠਾਈਆਂ ਦਾ ਆਨੰਦ ਮਾਣਿਆ ਗਿਆ, ਜੋ ਫੁੱਲਾਂ ਦੀ ਸਜਾਵਟ ਦੇ ਵਿਚਕਾਰ ਪਰੋਸੇ ਗਏ | ਵਿਦਿਆਰਥੀਆਂ ਨੇ ਆਪਣੀ ਪੇਸ਼ਕਾਰੀ ਦਿੱਤੀ, ਜਿਸ ਵਿਚ ਨਾਚ ਅਤੇ ਗੀਤ ਸ਼ਾਮਲ ਸਨ | ਆਪਣੇ ਸੰਬੋਧਨ 'ਚ ਪਿ੍ੰਸੀਪਲ ਚੰਦਨਦੀਪ ਕੌਰ ਨੇ ਵਾਤਾਵਰਨ-ਮਿੱਤਰ ਅਭਿਆਸਾਂ ਨੂੰ ਅਪਣਾਉਣ ਲਈ ਸਕੂਲ ਭਾਈਚਾਰੇ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਫੁੱਲਾਂ ਨੂੰ ਚੁਣ ਕੇ ਅਸੀਂ ਨਾ ਸਿਰਫ ਆਪਣੇ ਵਾਤਾਵਰਨ ਦੀ ਸੁਰੱਖਿਆ ਕਰਦੇ ਹਾਂ, ਬਲਕਿ ਆਪਣੇ ਬੱਚਿਆਂ ਵਿਚ ਕੁਦਰਤ ਪ੍ਰਤੀ ਦਇਆ ਅਤੇ ਜ਼ਿੰਮੇਵਾਰੀ ਦੇ ਮੁੱਲ ਵੀ ਸਥਾਪਿਤ ਕਰਦੇ ਹਾਂ |
