ਪਟਿਆਲਾ

ਅਣਪਛਾਤਿਆਂ ਵਲੋਂ ਬੰਦ ਕੀਤਾ ਐਕਸਪ੍ਰੈਸਵੇਅ ਐਨ.ਐਚ.ਏ.ਆਈ. ਦੇ ਅਧਿਕਾਰੀਆਂ ਨੇ ਕਰਵਾਇਆ ਚਾਲੂ

ਭਾਜਪਾ ਦਾ ਹਲਕਾ ਸ਼ੁਤਰਾਣਾ ਦੇ ਮੁਖੀ ਨਰਾਇਣ ਨਰਸੋਤ ਅਤੇ ਐਨ.ਐੱਚ.ਏ.ਆਈ. ਦੇ ਅਧਿਕਾਰੀ ਐਕਸਪ੍ਰੈਸ ਵੇਅ ਚਾਲੂ ਕਰਨ ਜੇ.ਸੀ.ਬੀ. ਦੀ ਮਦਦ ਨਾਲ ਮਿੱਟੀ ਹਟਾਉਂਦੇ ਹੋਏ | ਤਸਵੀਰ : ਜਗਦੀਸ਼ ਸਿੰਘ ਕੰਬੋਜ <br/> 11-05-2026

ਪਾਤੜਾਂ, 10 ਮਈ (ਜਗਦੀਸ਼ ਸਿੰਘ ਕੰਬੋਜ)-ਕੇਂਦਰ ਸਰਕਾਰ ਵਲੋਂ ਭਾਰਤ ਮਾਲਾ ਤਹਿਤ ਤਿਆਰ ਕੀਤਾ ਗਿਆ ਦਿੱਲੀ ਜੰਮੂ ਕਟੜਾ ਹਾਈਵੇਅ ਕੁਝ ਲੋਕਾਂ ਵਲੋਂ ਵਾਰ-ਵਾਰ ਬੰਦ ਕੀਤੇ ਜਾਣ ਨਾਲ ਰਾਹਗੀਰ ਪ੍ਰੇਸ਼ਾਨ ਹੋ ਰਹੇ ਹਨ | ਬੀਤੀ ਰਾਤ ਬੰਦ ਕੀਤੇ ਗਏ ਇਸ ਮਾਰਗ ਨੂੰ ਲੈ ਕੇ ਹਰਕਤ ਵਿਚ ਆਏ ਐਨ.ਐਚ.ਏ.ਆਈ. ਦੇ ਅਧਿਕਾਰੀਆਂ ਨੇ ਜਿੱਥੇ ਇਸ ਦੀ ਸ਼ਿਕਾਇਤ ਪੁਲਿਸ ਦੇ ਉੱਚ ਅਧਿਕਾਰੀਆਂ ਨੂੰ ਕੀਤੀ ਹੈ ਉੱਥੇ ਹੀ ਜੇ.ਸੀ.ਬੀ. ਲਿਆਕੇ ਬੰਦ ਕੀਤੇ ਗਏ ਮਾਰਗ ਨੂੰ ਮੁੜ ਤੋਂ ਚਾਲੂ ਕਰ ਦਿੱਤਾ ਗਿਆ ਹੈ | ਐਨ.ਐਚ.ਏ.ਆਈ. ਦੇ ਐਸ.ਡੀ.ਓ. ਸਲਮਾਨ ਹਕੀਮ ਨੇ ਦੱਸਿਆ ਕਿ ਦਿੱਲੀ ਜੰਮੂ ਕਟੜਾ ਐਕਸਪ੍ਰੈੱਸ ਹਾਈਵੇਅ ਨੇ ਠਰੂਆ ਤੋਂ ਮਲੇਰਕੋਟਲਾ ਤੱਕ ਤਿਆਰ ਕਰਕੇ ਟਰਾਇਲ ਦੇ ਤੌਰ 'ਤੇ ਚਾਲੂ ਕੀਤਾ ਗਿਆ ਸੀ ਪਰ ਰਾਤ ਦੇ ਸਮੇਂ 'ਚ ਕੁਝ ਅਣਪਛਾਤੇ ਲੋਕ ਆ ਕੇ ਇਸ ਮਾਰਗ 'ਤੇ ਪੱਥਰ ਅਤੇ ਮਿੱਟੀ ਸੁੱਟ ਕੇ ਇਸ ਨੂੰ ਬੰਦ ਕਰ ਦਿੰਦੇ ਹਨ ਜਿਸ ਦੀ ਸੂਚਨਾ ਮਿਲਣ 'ਤੇ ਇੱਥੇ ਪੁੱਜੇ ਸਨ ਅਤੇ ਇਸ ਸੰਬੰਧੀ ਪੁਲਿਸ ਦੇ ਉੱਚ ਅਧਿਕਾਰੀਆਂ ਨੂੰ ਕਈ ਵਾਰ ਲਿਖਤੀ ਤੌਰ 'ਤੇ ਸ਼ਿਕਾਇਤ ਕੀਤੀ ਜਾ ਚੁੱਕੀ ਹੈ ਅਤੇ ਦੁਬਾਰਾ ਇਸ ਦੀ ਸੂਚਨਾ ਦੇਣ ਮਗਰੋਂ ਇਸ ਮਾਰਗ 'ਤੇ ਸੁੱਟੀ ਹੋਈ ਮਿੱਟੀ ਨੂੰ ਜੇ.ਸੀ.ਬੀ. ਨਾਲ ਹਟਾ ਕੇ ਇਸ ਮਾਰਗ ਨੂੰ ਠਰੂਆ ਤੋਂ ਮਲੇਰਕੋਟਲਾ ਤੱਕ ਚਾਲੂ ਕਰ ਦਿੱਤਾ ਗਿਆ ਹੈ | ਇਸ ਮੌਕੇ ਭਾਰਤੀ ਜਨਤਾ ਪਾਰਟੀ ਦੇ ਹਲਕਾ ਇੰਚਾਰਜ ਨਰਾਇਣ ਸਿੰਘ ਨਰਸੋਤ ਨੇ ਕਿਹਾ ਕਿ ਅਜਿਹੀਆਂ ਕੋਝੀਆਂ ਹਰਕਤਾਂ ਕਰਨ ਵਾਲੇ ਅਨਸਰਾਂ ਨਾਲ ਸਖ਼ਤੀ ਨਾਲ ਨਜਿੱਠੇ ਜਾਣ ਦੀ ਮੰਗ ਕੀਤੀ | ਇਸ ਮੌਕੇ ਸਰਕਲ ਪ੍ਰਧਾਨ ਨਿਰੰਕਾਰ ਸਿੰਘ ਸੰਧੂ, ਸਰਕਲ ਪ੍ਰਧਾਨ ਪ੍ਰੇਮ ਚੰਦ ਕਾਂਸਲ, ਜ਼ਿਲਾ ਸਕੱਤਰ ਰਮੇਸ਼ ਬਤਰਾ, ਮੰਨਾ ਰਾਮ ਜ਼ਿਲਾ ਅਗਜੈਕਟਿਵ ਮੈਂਬਰ, ਹਰਬੰਸ ਲਾਲ ਕਲਵਾਣੂੰ, ਕੇਵਲ ਕਿ੍ਸ਼ਨ ਅਤਾਲਾਂ ਅਤੇ ਹੋਰ ਕਈ ਭਾਜਪਾ ਮੈਂਬਰ ਮੌਜੂਦ ਸਨ | ਇਸ ਬਾਰੇ ਗੁਰਦੀਪ ਸਿੰਘ ਸੰਧੂ ਡੀ.ਐੱਸ.ਪੀ ਪਾਤੜਾਂ ਨੇ ਕਿਹਾ ਕਿ ਐਕਸਪ੍ਰੈੱਸ ਵੇਅ ਨੂੰ ਬੰਦ ਕਰਨ ਤੇ ਸੂਚਨਾ ਮਿਲਣ 'ਤੇ ਐੱਸ.ਡੀ.ਐਮ. ਪਾਤੜਾਂ ਨਾਲ ਸਲਾਹ ਮਸ਼ਵਰਾ ਕਰਨ ਮਗਰੋਂ ਫੋਰਸ ਭੇਜ ਕੇ ਮਾਰਗ ਨੂੰ ਚਾਲੂ ਕਰ ਦਿੱਤਾ ਗਿਆ ਹੈ ਅਤੇ ਜੇਕਰ ਕਿਸੇ ਨੇ ਇਸ ਨੂੰ ਦੁਬਾਰਾ ਬੰਦ ਕੀਤਾ ਤਾਂ ਇਸ ਦੇ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ |