ਪਟਿਆਲਾ, 20 ਮਈ (ਮਨਦੀਪ ਸਿੰਘ ਖਰੌੜ)-ਸਰਕਾਰੀ ਹਸਪਤਾਲਾਂ 'ਚ ਬਾਇਓ ਮੈਡੀਕਲ ਕੂੜੇ ਨੂੰ ਦੇਵੀਗੜ੍ਹ ਰੋਡ 'ਤੇ ਇਕ ਗੁਦਾਮ 'ਚ ਜਮਾਂ ਕਰਨ ਦੇ ਮਾਮਲੇ 'ਚ ਇਕ ਵਿਅਕਤੀ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ | ਇਸ ਸੰਬੰਧੀ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਇੰਜੀਨੀਅਰ ਸਚਿਨ ਸਿੰਗਲਾ ਨੇ ਥਾਣਾ ਸਦਰ 'ਚ ਸ਼ਿਕਾਇਤ ਦਰਜ ਕਰਵਾਈ ਕਿ ਉਨ੍ਹਾਂ ਨੂੰ ਜਾਣਕਾਰੀ ਮਿਲੀ ਸੀ ਕਿ ਦੇਵੀਗੜ੍ਹ ਰੋਡ 'ਤੇ ਇਕ ਗੁਦਾਮ 'ਚ ਬਾਇਓ ਮੈਡੀਕਲ ਦਾ ਕੂੜਾ ਜਮਾਂ ਕੀਤਾ ਜਾ ਰਿਹਾ ਹੈ | ਜਿਸ ਤਹਿਤ ਉਨ੍ਹਾਂ ਉੱਥੇ ਛਾਪੇਮਾਰੀ ਕੀਤੀ ਤਾਂ ਉੱਥੋਂ ਬਾਇਓ ਮੈਡੀਕਲ ਵੈਸਟ ਬਰਾਮਦ ਹੋਈ ਜਿਹੜੀ ਕਿ ਇਨਫੈਕਸ਼ਨ ਵਾਲੀ ਤੇ ਮਨੁੱਖੀ ਸਿਹਤ ਲਈ ਕਾਫ਼ੀ ਖ਼ਤਰਨਾਕ ਸਾਬਤ ਹੋ ਸਕਦੀ ਹੈ | ਜਿਸ ਆਧਾਰ 'ਤੇ ਪੁਲਿਸ ਨੇ ਗੁਦਾਮ ਦੇ ਮਾਲਕ ਖ਼ਿਲਾਫ਼ ਗ਼ੈਰਕਾਨੰੂਨੀ ਤੌਰ 'ਤੇ ਬਾਇਓ ਮੈਡੀਕਲ ਵੈਸਟ ਜਮਾਂ ਕਰਨ ਦੇ ਮਾਮਲੇ 'ਚ ਮਹਿੰਦਰ ਕੁਮਾਰ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ |
