ਬਰਗਾੜੀ, 2 ਜਨਵਰੀ (ਸੁਖਰਾਜ ਸਿੰਘ ਗੋਂਦਾਰਾ)-ਪਿਛਲੇ ਦਿਨਾਂ ਤੋਂ ਪੰਜਾਬ ਸਮੇਤ ਪੂਰਾ ਉੱਤਰੀ ਭਾਰਤ ਕੜਾਕੇ ਦੀ ਠੰਢ ਪੈ ਰਹੀ ਹੈ | ਠੰਢ ਕਾਰਨ ਪੈ ਰਹੀ ਧੁੰਦ, ਤਰੇਲ ਤੇ ਹਲਕੀ ਵਰਖਾ ਹਾੜ੍ਹੀ ਦੀਆਂ ਫ਼ਸਲਾਂ ਜਿਵੇਂ ਕਣਕ, ਸਰੋਂ, ਛੋਲੇ ਆਦਿ ਲਈ ਵਰਦਾਨ ਸਾਬਤ ਹੋਵੇਗਾ ਕਿਉਂਕਿ ਖੇਤੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਹਾੜ੍ਹੀ ਦੀਆਂ ਫ਼ਸਲਾਂ ਲਈ ਠੰਢ ਦਾ ਮੌਸਮ ਦਸੰਬਰ ਮਹੀਨੇ ਤੋਂ ਸ਼ੁਰੂ ਹੋਣੀ ਚਾਹੀਦੀ ਹੈ ਪਰ ਹੁਣ ਵੀ ਇਹ ਦੇਰ ਨਾਲ ਸ਼ੁਰੂ ਹੋਈ ਤੇ ਦੇਰ ਤੱਕ ਚੱਲੇਗੀ ਤਾਂ ਹਾੜ੍ਹੀ ਦੀਆਂ ਫ਼ਸਲਾਂ ਦੇ ਝਾੜ ਚੰਗੇ ਹੋਣ ਦੀ ਉਮੀਦ ਹੋਵੇਗੀ | ਭਾਵੇਂ ਹਾੜ੍ਹੀ ਦੀਆਂ ਫ਼ਸਲਾਂ ਦੇ ਪੱਕਣ 'ਚ ਬਹੁਤ ਸਮਾਂ ਪਿਆ ਹੈ ਪਰ ਜੇਕਰ ਠੰਢ ਫ਼ਸਲਾਂ ਦੇ ਮੁੱਢਲੇ ਸਮੇਂ ਤੋਂ ਪੈਣੀ ਸ਼ੁਰੂ ਹੁੰਦੀ ਹੈ ਤਾਂ ਹਾੜ੍ਹੀ ਦੀਆਂ ਫ਼ਸਲਾਂ ਦਾ ਵਿਕਾਸ ਬਹੁਤ ਵਧੀਆਂ ਤੇ ਤੇਜ਼ੀ ਨਾਲ ਹੁੰਦਾ ਹੈ | ਫ਼ਸਲਾਂ ਤੋਂ ਇਲਾਵਾ ਫ਼ਲਾਂ ਜਿਵੇ ਖਾਸਕਰ ਕਿੰਨੂੰਆਂ ਦੀ ਫ਼ਸਲ ਲਈ ਵੀ ਠੰਢ ਬਹੁਤ ਫਾਇਦੇਮੰਦ ਹੈ ਕਿਉਂਕਿ ਕਿਨੂੰਆਂ ਦੇ ਕਾਸ਼ਤਕਾਰ ਦਾ ਕਹਿਣਾ ਹੈ ਕਿ ਜ਼ਿਆਦਾ ਠੰਢ ਤੇ ਕੋਰਾ ਪੈਣ ਨਾਲ ਕਿੰਨੂੰ ਦੇ ਫਲ 'ਚ ਮਿਠਾਸ ਆਉਂਦੀ ਹੈ ਅਤੇ ਫ਼ਲ ਦੇ ਅਕਾਰ 'ਚ ਵਾਧਾ ਹੁੰਦਾ ਹੈ, ਜੋ ਕਾਸ਼ਤਕਾਰ ਲਈ ਬਹੁਤ ਫਾਇਦੇਮੰਦ ਰਹਿੰਦਾ ਹੈ |
