ਲੰਬੀ, 24 ਜਨਵਰੀ (ਮੇਵਾ ਸਿੰਘ)-ਥਾਣਾ ਲੰਬੀ ਦੀ ਪੁਲਿਸ ਵਲੋਂ ਨੈਸ਼ਨਲ ਹਾਈਵੇਅ ਨੰਬਰ 9 ਪਿੰਡ ਲੰਬੀ ਵਿਖੇ ਬਣੇ ਓਵਰਬਿ੍ਜ ਦੇ ਹੇਠਲੇ ਪਾਸੇ ਆਪਣੀ ਰੋਜੀ-ਰੋਟੀ ਕਮਾਉਣ ਲਈ ਬੈਠੇ ਸਬਜ਼ੀਆਂ, ਫ਼ਲਾਂ ਤੇ ਹੋਰ ਛੋਟੇ ਵੱਡੇ ਦੁਕਾਨਦਾਰਾਂ ਨੂੰ ਪੁਲ ਥੱਲਿਓਾ ਇਕ ਵਾਰ ਉਠਾ ਦਿੱਤਾ ਗਿਆ | ਜਾਣਕਾਰੀ ਦਿੰਦਿਆਂ ਥਾਣਾ ਲੰਬੀ ਦੇ ਐੱਸ.ਐੱਚ.ਓ. ਇੰਸਪੈਕਟਰ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਆਮ ਲੋਕਾਂ ਵਲੋਂ ਉਨ੍ਹਾਂ ਕੋਲ ਕਈ ਸ਼ਿਕਾਇਤਾਂ ਪੁਲ ਥੱਲੇ ਬੈਠੇ ਦੁਕਾਨਦਾਰਾਂ ਨੂੰ ਉਠਾਉਣ ਵਾਸਤੇ ਪਹੁੰਚੀਆਂ ਸਨ | ਉਨ੍ਹਾਂ ਇਨ੍ਹਾਂ ਸਾਰਿਆਂ ਨੂੰ ਕਈ ਵਾਰ ਆਖਿਆ ਕਿ ਉਹ ਆਪਣੇ ਕੰਮ-ਧੰਦੇ ਲਈ ਕੋਈ ਬਦਲਵੀਂ ਥਾਂ ਦਾ ਇੰਤਜਾਮ ਕਰਨ, ਕਿਉਂਕਿ ਪੁਲ ਥੱਲੇ ਭੀੜ ਹੋਣ 'ਤੇ ਵਾਹਨਾਂ ਦੇ ਇਧਰੋਂ-ਉਧਰੋਂ ਲੰਘਣ ਕਾਰਨ ਹਰ ਵਕਤ ਐਕਸੀਡੈਂਟ ਹੋਣ ਦਾ ਡਰ ਬਣਿਆ ਰਹਿੰਦਾ ਹੈ | ਉਨ੍ਹਾਂ ਕਿਹਾ ਕਿ ਉਹ ਕਿਸੇ ਦੀ ਰੋਜੀ-ਰੋਟੀ ਦਾ ਨੁਕਸਾਨ ਨਹੀਂ ਕਰਨਾ ਚਾਹੁੰਦੇ, ਪਰ ਉਹ ਵੀ ਹੁਕਮ ਵਿਚ ਬੱਝੇ ਹਨ ਤੇ ਟ੍ਰੈਫ਼ਿਕ ਨਿਰਵਿਘਨ ਚਲਾਉਣਾ ਉਨ੍ਹਾਂ ਡਿਊਟੀ ਬਣਦੀ ਹੈ | ਇਸ ਪੁਲ ਥੱਲਿਓਾ ਦੁਕਾਨਦਾਰਾਂ ਨੂੰ ਹਟਾਉਣ ਕਾਰਨ ਭਾਕਿਯੂ (ਸਿੱਧੂਪੁਰ) ਦੇ ਆਗੂਆਂ ਵਲੋਂ ਆਮ ਲੋਕਾਂ ਨੂੰ ਨਾਲ ਲੈ ਕੇ ਧਰਨਾ ਲਾਇਆ ਗਿਆ | ਜਿਸ ਤੋਂ ਬਾਅਦ ਪੁਲਿਸ ਨੇ ਮੁਸਤੈਦੀ ਵਰਤਦਿਆਂ ਓਵਰਬਿ੍ਜ ਦੇ ਹੇਠਲੇ ਪਾਸੇ ਦੁਕਾਨਦਾਰਾਂ ਵਲੋਂ ਰੱਖੇ ਸਾਮਾਨ ਨੂੰ ਪਾਸੇ ਕਰਵਾਇਆ | ਜ਼ਿਕਰ ਕਰਨਾ ਬਣਦਾ ਹੈ ਕਿ ਓਵਰਬਿ੍ਜ ਬਣਨ ਤੋਂ ਪਹਿਲਾਂ ਉਕਤ ਦੁਕਾਨਦਾਰ ਨੈਸ਼ਨਲ ਹਾਈਵੇਅ ਦੇ ਆਸਪਾਸ ਆਪਣੀਆਂ ਰੇਹੜੀਆਂ ਵਗੈਰਾ ਲਗਾਉਂਦੇ ਸਨ ਤੇ ਉਸ ਸਮੇਂ ਕਈ ਹਾਦਸੇ ਸਮੇਂ-ਸਮੇਂ 'ਤੇ ਹੋ ਜਾਂਦੇ ਸਨ, ਪ੍ਰੰਤੂ ਨੈਸ਼ਨਲ ਹਾਈਵੇਅ ਤੇ ਓਵਰਬਿ੍ਜ ਬਣਨ ਕਰਕੇ ਵੀ ਦੁਕਾਨਦਾਰਾਂ ਦੀ ਮੁਸ਼ਕਿਲ ਹੱਲ ਨਹੀਂ ਹੋਈ | ਕਈ ਦੁਕਾਨਦਾਰਾਂ ਨੇ ਚਿੰਤਤ ਹੁੰਦੇ ਆਖਿਆ ਕਿ ਇਕ ਤਾਂ ਪਹਿਲਾਂ ਵਨਵੇ ਤੇ ਓਵਰਬਿ੍ਜ ਬਣਨ ਕਰਕੇ ਪਿੰਡ ਲੰਬੀ 2 ਹਿੱਸਿਆਂ ਵਿਚ ਵੰਡਿਆ ਗਿਆ ਤੇ ਉਨ੍ਹਾਂ ਦੀ ਰੋਜੀ-ਰੋਟੀ ਦਾ ਵਸੀਲਾ ਖ਼ਤਮ ਹੋਣ ਕਿਨਾਰੇ ਪਹੁੰਚ ਗਿਆ ਹੈ | ਉਹ ਹੁਣ ਕਰਨ 'ਤੇ ਕੀ ਕਰਨ ਅਤੇ ਕਿੱਥੇ ਜਾ ਕੇ ਆਪਣੀ ਰੋਜੀ-ਰੋਟੀ ਕਮਾਉਣ |
