ਗਿੱਦੜਬਾਹਾ, 4 ਅਪ੍ਰੈਲ (ਪਰਮਜੀਤ ਸਿੰਘ ਥੇੜ੍ਹੀ)-ਵਿਦਿਆਰਥੀਆਂ ਦੇ ਕਿਤਾਬਾਂ ਦੇ ਖ਼ਰਚਿਆਂ ਨੂੰ ਘਟਾਉਣ ਲਈ 4 ਸਮਾਜ ਸੇਵਕਾਂ ਸੇਵਾ ਮੁਕਤ ਫਾਰਮੇਸੀ ਅਧਿਕਾਰੀ ਅਜੈ ਗੋਇਲ, ਐਡਵੋਕੇਟ ਲਵਲੀਸ਼ ਗੋਇਲ, ਵਿਪਿਨ ਬਾਂਸਲ ਭੋਲਾ ਤੇ ਐਡਵੋਕੇਟ ਐੱਨ.ਡੀ. ਸਿੰਗਲਾ ਨੇ ਤਿੰਨ ਸਾਲ ਪਹਿਲਾਂ ਪੰਚਾਇਤ ਧਰਮਸ਼ਾਲਾ ਬੱਸ ਸਟੈਂਡ ਗਿੱਦੜਬਾਹਾ ਦੇ ਨੇੜੇ ਇਹ ਬੁੱਕ ਬੈਂਕ ਸ਼ੁਰੂ ਕੀਤਾ | ਇਸ ਬੁੱਕ ਬੈਂਕ ਨੂੰ ਪਹਿਲੇ ਸਾਲ ਹੀ ਲੋਕਾਂ ਵਲੋਂ ਬਹੁਤ ਉਤਸ਼ਾਹ ਮਿਲਿਆ ਅਤੇ ਘਰ ਵਿਚ ਪਈਆਂ ਵੱਡੀ ਗਿਣਤੀ 'ਚ ਕਿਤਾਬਾਂ ਇਸ ਬੁੱਕ ਬੈਂਕ ਨੂੰ ਦਾਨ ਕੀਤੀਆਂ ਗਈਆਂ, ਜਿਸ ਕਾਰਨ ਪਹਿਲੇ ਸਾਲ ਲਗਪਗ 125 ਵਿਦਿਆਰਥੀਆਂ ਨੇ ਬੁੱਕ ਬੈਂਕ ਤੋਂ ਕਿਤਾਬਾਂ ਪ੍ਰਾਪਤ ਕਰਕੇ ਪੜ੍ਹਾਈ ਕੀਤੀ, ਜਦੋਂਕਿ ਪਿਛਲੇ ਸਾਲ ਤੇ ਇਸ ਸਾਲ ਕਿਤਾਬਾਂ ਦਾਨ ਕਰਨ ਅਤੇ ਕਿਤਾਬਾਂ ਪ੍ਰਾਪਤ ਕਰਨ ਵਾਲੇ ਵਿਦਿਆਰਥੀਆਂ ਦੀ ਗਿਣਤੀ ਲਗਾਤਾਰ ਵਧ ਰਹੀ ਹੈ ਅਤੇ ਹੁਣ ਲੋਕ ਦੂਰ-ਦੁਰਾਡੇ ਸ਼ਹਿਰਾਂ ਤੋਂ ਵੀ ਇਸ ਬੁੱਕ ਬੈਂਕ ਲਈ ਕਿਤਾਬਾਂ ਭੇਜ ਰਹੇ ਹਨ | ਮੁਫ਼ਤ ਬੁੱਕ ਬੈਂਕ ਦੇ ਪ੍ਰਬੰਧਕਾਂ ਨੇ ਦੱਸਿਆ ਕਿ ਇਸ ਬੈਂਕ ਤੋਂ ਪਹਿਲੀ ਜਮਾਤ ਤੋਂ ਲੈ ਕੇ ਦਸਵੀਂ ਜਮਾਤ ਤੱਕ ਹਰ ਤਰ੍ਹਾਂ ਦੇ ਬੋਰਡਾਂ ਨਾਲ ਸੰਬੰਧਿਤ ਕਿਤਾਬਾਂ, ਮੈਡੀਕਲ, ਨਾਨ-ਮੈਡੀਕਲ, ਕੰਪੀਟੀਸ਼ਨ, ਨੌਕਰੀ ਪ੍ਰਾਪਤ ਕਰਨ ਲਈ ਲੋੜੀਂਦੀਆਂ ਕਿਤਾਬਾਂ, ਵੱਖ-ਵੱਖ ਸੰਸਥਾਵਾਂ ਦੇ ਛਪੇ ਤੇ ਹੱਥ ਲਿਖ਼ਤ ਨੋਟਿਸ ਵੀ ਉਪਲਬਧ ਹਨ | ਐਨਾ ਹੀ ਨਹੀਂ ਮੁਫ਼ਤ ਬੁੱਕ ਬੈਂਕ ਦੇ ਪ੍ਰਬੰਧਕਾਂ ਵਲੋਂ ਉਨ੍ਹਾਂ ਵਿਦਿਆਰਥੀਆਂ ਦੀ ਸਕੂਲ ਤੇ ਯੂਨੀਵਰਸਿਟੀ ਫ਼ੀਸ ਵੀ ਅਦਾ ਕੀਤੀ ਜਾ ਰਹੀ ਹੈ, ਜੋ ਆਰਥਿਕ ਤੌਰ 'ਤੇ ਕਮਜ਼ੋਰ ਹਨ, ਪਰ ਪੜ੍ਹਾਈ ਵਿਚ ਹੁਸ਼ਿਆਰ ਹਨ |
