ਜੈਤੋ, 10 ਜੂਨ (ਗੁਰਚਰਨ ਸਿੰਘ ਗਾਬੜੀਆ)-ਪੰਜਾਬੀ ਅਗਰਵਾਲਾਂ ਦੀ ਸ਼ਾਨ ਮਹੇਸ਼ ਅਗਰਵਾਲ ਦੀ ਤਾਮਿਲਨਾਡੂ ਦੇ ਡੀ.ਜੀ.ਪੀ ਬਣਨ ਦੀ ਖੁਸ਼ੀ ਵਿਚ ਸਭਾ ਦੇ ਪ੍ਰਧਾਨ ਮੁਕੇਸ਼ ਗੋਇਲ ਦੀ ਅਗਵਾਈ ਵਿਚ ਸ੍ਰੀ ਪੰਚਾਇਤੀ ਗਊਸ਼ਾਲਾ ਦੇ ਬਾਹਰ ਲੱਡੂ ਵੰਡੇ ਗਏ | ਇਸ ਮੌਕੇ ਸਭਾ ਦੇ ਕਾਰਜਕਾਰੀ ਪ੍ਰਧਾਨ ਰਾਜੀਵ ਗੋਇਲ ਬਿੱਟੂ ਬਾਦਲ ਨੇ ਕਿਹਾ ਕਿ ਮਹੇਸ਼ ਅਗਰਵਾਲ ਦਾ ਜਨਮ ਬਠਿੰਡਾ ਵਿਚ ਹੋਇਆ ਸੀ ਜਦੋਂ ਕਿ ਉਸ ਵਕਤ ਜੈਤੋ ਮੰਡੀ ਬਠਿੰਡਾ ਜ਼ਿਲ੍ਹੇ ਦਾ ਹਿੱਸਾ ਸੀ | ਉਹ ਬਠਿੰਡਾ ਵਿਚ ਹੀ ਜਨਮੇ-ਪਲੇ | ਉਨ੍ਹਾਂ ਨੇ 1994 ਵਿਚ ਯੂ.ਪੀ.ਐਸ.ਸੀ ਪਾਸ ਕੀਤੀ | ਉਨ੍ਹਾਂ ਦੇ ਪਿਤਾ ਪੰਜਾਬ ਦੇ ਨਾਮੀ ਵਕੀਲ ਪ੍ਰਕਾਸ਼ ਚੰਦ ਅਗਰਵਾਲ ਅਤੇ ਉਨ੍ਹਾਂ ਦੀ ਮਾਤਾ ਦੇਵਕੀ ਦੇਵੀ ਹੈ | ਜਦ ਕਿ ਸਵਰਗੀ ਪ੍ਰਕਾਸ਼ ਚੰਦ ਦੇ ਤਿੰਨ ਪੁੱਤਰ ਹਨ ਜਿਨ੍ਹਾਂ ਵਿਚੋਂ ਸਭ ਤੋਂ ਵੱਡੇ ਜਸਟਿਸ ਵੀਰੇਂਦਰ ਅਗਰਵਾਲ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿਚ ਅਤੇ ਵਿਚਕਾਰਲੇ ਭਾਈ ਸੈਸ਼ਨ ਜੱਜ ਰਾਜਿੰਦਰ ਅਗਰਵਾਲ ਹੁਸ਼ਿਆਰਪੁਰ ਵਿਚ ਸੇਵਾ ਨਿਭਾ ਰਹੇ ਹਨ | ਜਦ ਕਿ ਮਹੇਸ਼ ਕੁਮਾਰ ਅਗਰਵਾਲ ਨੇ ਐਮ.ਐਚ.ਆਰ, ਐਮ.ਐਸ.ਡੀ ਸਕੂਲ ਅਤੇ ਰਜਿੰਦਰਾ ਕਾਲਜ, ਬਠਿੰਡਾ ਵਿਚ ਪੜ੍ਹਾਈ ਕੀਤੀ | ਮਹੇਸ਼ ਕੁਮਾਰ ਅਗਰਵਾਲ ਨੇ ਤਾਮਿਲਨਾਡੂ ਕੇਡਰ ਪ੍ਰਾਪਤ ਕੀਤਾ | ਉਨ੍ਹਾਂ ਦੀ ਪਹਿਲੀ ਨਿਯੁਕਤੀ ਏ.ਐਸ.ਪੀ ਨਾਗਨੇਰ ਵਜੋਂ ਹੋਈ ਸੀ | ਉਹ ਉਦੋਂ ਸਿਰਫ਼ 22 ਸਾਲ ਦੇ ਸਨ | ਉਨ੍ਹਾਂ ਨੇ ਤੂਤੀਕੋਰਿਨ ਦੇ ਸੁਪਰਡੈਂਟ ਪੁਲਿਸ ਅਤੇ ਚੇਨਈ ਵਿਖੇ ਚਾਰ ਸਾਲ ਡੀ.ਸੀ.ਪੀ ਲਾਅ ਐਂਡ ਕ੍ਰਾਈਮ ਵਜੋਂ ਸੇਵਾ ਨਿਭਾਈ | ਉਹ ਡੈਪੂਟੇਸ਼ਨ 'ਤੇ ਚੰਡੀਗੜ੍ਹ ਆਏ ਅਤੇ ਉੱਥੇ ਸੀ.ਬੀ.ਆਈ ਦਫ਼ਤਰ ਵਿਚ 7 ਸਾਲ ਡੀ.ਆਈ.ਜੀ ਵਜੋਂ ਸੇਵਾ ਨਿਭਾਈ | ਇਸ ਮੌਕੇ ਚੰਡੀਗੜ੍ਹ, ਪੰਜਾਬ, ਹਰਿਆਣਾ, ਹਿਮਾਚਲ ਪ੍ਰਦੇਸ਼ ਅਤੇ ਜੰਮੂ-ਕਸ਼ਮੀਰ ਦਾ ਚਾਰਜ ਸੀ | ਉਨ੍ਹਾਂ ਨੂੰ ਉਨ੍ਹਾਂ ਦੀ ਸ਼ਾਨਦਾਰ ਸੇਵਾ ਲਈ ਮੁੱਖ ਮੰਤਰੀ ਵਲੋਂ 'ਸੇਵਾ ਵਿਚ ਉੱਤਮਤਾ' ਮੈਡਲ ਨਾਲ ਵੀ ਸਨਮਾਨਿਤ ਕੀਤਾ ਗਿਆ | ਉਨ੍ਹਾਂ ਦੀ ਨਿਯੁਕਤੀ ਤਾਮਿਲਨਾਡੂ ਪੁਲਿਸ ਵਿਚ ਇਕ ਨਵੇਂ ਅਧਿਆਇ ਦੀ ਸ਼ੁਰੂਆਤ ਹੈ | ਇਹ ਉਮੀਦ ਕੀਤੀ ਜਾਂਦੀ ਹੈ ਕਿ ਉਨ੍ਹਾਂ ਦਾ ਵਿਆਪਕ ਤਜਰਬਾ ਅਤੇ ਤਕਨਾਲੋਜੀ-ਅਧਾਰਤ ਪੁਲਿਸਿੰਗ 'ਤੇ ਜ਼ੋਰ ਰਾਜ ਵਿਚ ਕਾਨੂੰਨ ਵਿਵਸਥਾ ਅਤੇ ਜਨਤਕ ਸੁਰੱਖਿਆ ਨੂੰ ਹੋਰ ਮਜ਼ਬੂਤ ਕਰੇਗਾ | ਤਾਮਿਲਨਾਡੂ ਕੇਡਰ ਦੇ 1994 ਬੈਚ ਦੇ ਆਈਪੀਐਸ ਅਧਿਕਾਰੀ ਮਹੇਸ਼ ਕੁਮਾਰ ਅਗਰਵਾਲ ਕੇਂਦਰੀ ਡੈਪੂਟੇਸ਼ਨ 'ਤੇ ਸੀਮਾ ਸੁਰੱਖਿਆ ਬਲ (ਬੀਐਸਐਫ) ਦੇ ਵਿਸ਼ੇਸ਼ ਡਾਇਰੈਕਟਰ ਜਨਰਲ ਵਜੋਂ ਸੇਵਾ ਨਿਭਾ ਰਹੇ ਸਨ | ਰਾਜ ਵਿਚ ਉਨ੍ਹਾਂ ਦੀ ਵਾਪਸੀ ਕੈਬਨਿਟ ਦੀ ਨਿਯੁਕਤੀ ਕਮੇਟੀ ਦੀ ਪ੍ਰਵਾਨਗੀ ਤੋਂ ਬਾਅਦ ਹੋਈ ਹੈ | ਜਿਸ ਨੇ ਗ੍ਰਹਿ ਮੰਤਰਾਲੇ ਦੇ ਪ੍ਰਸਤਾਵ ਨੂੰ ਤੁਰੰਤ ਪ੍ਰਭਾਵ ਨਾਲ ਤਾਮਿਲਨਾਡੂ ਕੇਡਰ ਵਿਚ ਵਾਪਸ ਭੇਜਣ ਲਈ ਮਨਜ਼ੂਰੀ ਦੇ ਦਿੱਤੀ ਹੈ | ਆਪਣੇ ਕਰੀਅਰ ਦੌਰਾਨ ਮਾਨਯੋਗ ਅਗਰਵਾਲ ਨੇ ਰਾਜ ਪੁਲਿਸਿੰਗ ਅਤੇ ਕੇਂਦਰੀ ਅਰਧ ਸੈਨਿਕ ਪ੍ਰਸ਼ਾਸਨ ਦੋਵਾਂ ਵਿਚ ਵੱਖ-ਵੱਖ ਅਹੁਦਿਆਂ 'ਤੇ ਕੰਮ ਕੀਤਾ ਹੈ | ਤਾਮਿਲਨਾਡੂ ਪੁਲਿਸ ਵਿਚ ਉਨ੍ਹਾਂ ਦੀ ਉੱਚ ਅਹੁਦੇ 'ਤੇ ਨਿਯੁਕਤੀ ਅਜਿਹੇ ਸਮੇਂ ਹੋਈ ਹੈ | ਉਪਰੋਕਤ ਪ੍ਰੋਗਰਾਮ ਵਿਚ ਸ੍ਰੀ ਅਗਰਵਾਲ ਸਭਾ ਦੇ ਚੇਅਰਮੈਨ ਤੀਰਥ ਰਾਜ ਗਰਗ, ਪ੍ਰਧਾਨ ਮੁਕੇਸ਼ ਗੋਇਲ, ਕਾਰਜਕਾਰੀ ਪ੍ਰਧਾਨ ਰਾਜੀਵ ਗੋਇਲ ਬਿੱਟੂ ਬਾਦਲ, ਆਲ ਪ੍ਰੋਜੈਕਟ ਚੇਅਰਮੈਨ ਨਰੇਸ਼ ਮਿੱਤਲ, ਖਜ਼ਾਨਚੀ ਪ੍ਰਵੀਨ ਜੈਨ, ਵਾਈਸ ਚੇਅਰਮੈਨ ਸੁਰਿੰਦਰ ਗਰਗ, ਸਹਿ-ਸਕੱਤਰ ਰਮੇਸ਼ ਬਾਂਸਲ, ਮੀਤ ਪ੍ਰਧਾਨ ਕ੍ਰਿਸ਼ਨ ਗੋਇਲ, ਸੁਖਦਰਸ਼ਨ ਬਰਗਾੜੀ, ਸੁਰਿੰਦਰ ਅਪਲ, ਓਮ ਭੂਸ਼ਨ ਸਟੂਡੀਓ, ਕਸ਼ਮੀਰ ਲਾਲ ਗਰਗ, ਰਾਜੀਵ ਸਿੰਗਲਾ ਅਤੇ ਸਤੀਸ਼ ਬਰਗਾੜੀ ਆਦਿ ਹਾਜ਼ਰ ਸਨ¢
