ਤਿਉਣਾ ਡਿਸਟ੍ਰੀਬਿਊਟਰੀ ਤੇ ਮਿਠੜੀ ਮਾਈਨਰ ’ਚ ਪਏ ਤਿੰਨ ਪਾੜ, ਸੈਂਕੜੇ ਏਕੜ ਝੋਨਾ ਡੁੱਬਿਆ
ਮੰਡੀ ਕਿੱਲਿਆਂਵਾਲੀ, 12 ਅਕਤੂਬਰ (ਇਕਬਾਲ ਸਿੰਘ ਸ਼ਾਂਤ)- ਹਲਕੇ ਲੰਬੀ ਵਿੱਚ ਸਿੰਚਾਈ ਵਿਭਾਗ ਦੇ ਪ੍ਰਬੰਧਾਂ ਦੀ ਪੋਲ ਖੁੱਲ੍ਹ ਗਈ। ਤਿਉਣਾ ਡਿਸਟਰੀਬਿਊਟਰੀ ਤੇ ਮਿਠੜੀ ਮਾਈਨਰ ਵਿੱਚ ਤਿੰਨ ਥਾਵਾਂ ‘ਤੇ ਪਾੜ ਪੈਣ ਕਾਰਨ ਮਹਿਣਾ, ਮਿਠੜੀ ਬੁੱਧਗਿਰ, ਸਿੰਘੇਵਾਲਾ, ਗੱਗੜ ਤੇ ਫ਼ਰੀਦਕੋਟ ਕੋਟਲੀ ਦੇ ਸੈਂਕੜੇ ਏਕੜ ਪੱਕਣ ਕੰਢੇ ਖੜ੍ਹੇ ਝੋਨੇ ਵਿੱਚ ਪਾਣੀ ਭਰ ਗਿਆ।
ਮੰਡੀ ਕਿੱਲਿਆਂਵਾਲੀ, 12 ਅਕਤੂਬਰ (ਇਕਬਾਲ ਸਿੰਘ ਸ਼ਾਂਤ)- ਹਲਕੇ ਲੰਬੀ ਵਿੱਚ ਸਿੰਚਾਈ ਵਿਭਾਗ ਦੇ ਪ੍ਰਬੰਧਾਂ ਦੀ ਪੋਲ ਖੁੱਲ੍ਹ ਗਈ। ਤਿਉਣਾ ਡਿਸਟਰੀਬਿਊਟਰੀ ਤੇ ਮਿਠੜੀ ਮਾਈਨਰ ਵਿੱਚ ਤਿੰਨ ਥਾਵਾਂ ‘ਤੇ ਪਾੜ ਪੈਣ ਕਾਰਨ ਮਹਿਣਾ, ਮਿਠੜੀ ਬੁੱਧਗਿਰ, ਸਿੰਘੇਵਾਲਾ, ਗੱਗੜ ਤੇ ਫ਼ਰੀਦਕੋਟ ਕੋਟਲੀ ਦੇ ਸੈਂਕੜੇ ਏਕੜ ਪੱਕਣ ਕੰਢੇ ਖੜ੍ਹੇ ਝੋਨੇ ਵਿੱਚ ਪਾਣੀ ਭਰ ਗਿਆ। ਤੇਜ਼ ਵਹਾਅ ਫ਼ਰੀਦਕੋਟ ਕੋਟਲੀ ਦੀ ਆਬਾਦੀ ਤੱਕ ਪੁੱਜ ਗਿਆ। ਪਾੜ ਪੂਰਨ ਲਈ ਭੇਜੀ ਪੋਕਲੇਨ ਮਸ਼ੀਨ ਪਹਿਲਾਂ ਡੀਜ਼ਲ ਅਤੇ ਫਿਰ ਬੈਟਰੀ ਦੀ ਘਾਟ ਕਾਰਨ ਘੰਟਿਆਂਬੱਧੀ ਬੰਦ ਰਹੀ। ਮਹਿਣਾ ਨੇੜੇ ਤਿਉਣਾ ਡਿਸਟਰੀਬਿਊਟਰੀ ਦੀ 88000 ਬੁਰਜੀ ‘ਤੇ ਮੋਘਾ ਨੰਬਰ 87 ਕੋਲ ਕਰੀਬ 100 ਫੁੱਟ ਚੌੜਾ ਪਾੜ ਪਿਆ। ਮਿਠੜੀ ਮਾਈਨਰ ਵਿੱਚ ਸਿੰਘੇਵਾਲਾ ਨੇੜੇ ਅਤੇ ਗੱਗੜ ਤੇ ਫ਼ਰੀਦਕੋਟ ਕੋਟਲੀ ਵਿਚਕਾਰ ਵੀ ਦੋ ਜਗ੍ਹਾ ਪਾੜ ਪਏ। ਵਿਭਾਗੀ ਸੂਤਰਾਂ ਮੁਤਾਬਕ ਪਿੱਛੋਂ ਵੱਧ ਪਾਣੀ ਛੱਡਣ ਅਤੇ ਮੋਘੇ ਬੰਦ ਹੋਣ ਕਾਰਨ ਪਾਣੀ ਦਾ ਦਬਾਅ ਵਧਿਆ। ਮਾਮਲਾ ਪ੍ਰਿੰਸੀਪਲ ਸਕੱਤਰ ਕ੍ਰਿਸ਼ਨ ਕੁਮਾਰ ਤੱਕ ਪੁੱਜਣ ਮਗਰੋਂ ਨਿਗਰਾਨ ਇੰਜਨੀਅਰ, ਐਕਸੀਅਨ ਜਗਮੀਤ ਸਿੰਘ ਤੇ ਐਸ.ਡੀ.ਓ. ਸੁਖਪ੍ਰੀਤ ਸਿੰਘ ਮੌਕੇ ‘ਤੇ ਪੁੱਜੇ। ਮਹਿਣਾ ਨੇੜੇ ਪਾੜ ਕਾਰਨ ਰਣਜੀਤ ਸਿੰਘ, ਮੁਖ਼ਤਿਆਰ ਸਿੰਘ, ਜਗਪਾਲ ਸਿੰਘ, ਬਲਕੌਰ ਸਿੰਘ ਤੇ ਹੋਰਨਾਂ ਦਾ ਕਰੀਬ 100 ਕਿੱਲੇ ਰਕਬਾ ਪ੍ਰਭਾਵਿਤ ਹੋਇਆ। ਮਿਠੜੀ ਬੁੱਧਗਿਰ ਤੇ ਸਿੰਘੇਵਾਲਾ ਵਿਚਕਾਰ ਕੌਰ ਸਿੰਘ ਮਾਨ ਦੇ ਖੇਤ ਨੇੜੇ 50 ਤੋਂ 55 ਫੁੱਟ ਚੌੜੇ ਪਾੜ ਕਾਰਨ 60 ਤੋਂ 70 ਏਕੜ ਝੋਨਾ ਡੁੱਬ ਗਿਆ। ਕਿਸਾਨ ਅੰਗਰੇਜ਼ ਸਿੰਘ ਮੁਤਾਬਕ ਇੱਕ ਮਹੀਨੇ ਵਿੱਚ ਮਾਈਨਰ ਤੀਜੀ ਵਾਰ ਟੁੱਟਿਆ ਹੈ। ਫ਼ਰੀਦਕੋਟ ਕੋਟਲੀ ਦੇ ਵਸਨੀਕ ਸੁਖਪਾਲ ਸਿੰਘ ਨੇ ਦੱਸਿਆ ਕਿ ਪਾੜ ਤੜਕੇ 3-4 ਵਜੇ ਪਿਆ ਤੇ ਪਾਣੀ ਖੇਤਾਂ ਨੂੰ ਡੁਬੋਣ ਮਗਰੋਂ ਆਬਾਦੀ ਨੇੜੇ ਪੁੱਜ ਗਿਆ। ਕਿਸਾਨਾਂ ਨੇ ਦੋਸ਼ ਲਾਇਆ ਕਿ ਵਿਭਾਗ ਨੇ ਸਮੇਂ ਸਿਰ ਪਾਣੀ ਦਾ ਵਹਾਅ ਬੰਦ ਨਹੀਂ ਕੀਤਾ। ਮਹਿਲਣਾ ਦੇ ਕਿਸਾਨ ਨੈਬ ਸਿੰਘ, ਗੁਰਪ੍ਰੀਤ ਸਿੰਘ ਕੁਲਾਰ ਤੇ ਜਗਜੀਤ ਸਿੰਘ ਨੇ ਡਿਸਟਰੀਬਿਊਟਰੀ ਦੀ ਸਫ਼ਾਈ ਵਿੱਚ ਕਥਿਤ ਘੁਟਾਲੇ ਦੀ ਉੱਚ ਪੱਧਰੀ ਜਾਂਚ ਮੰਗੀ। ਉਨ੍ਹਾਂ ਵਿਸ਼ੇਸ਼ ਗਿਰਦਾਵਰੀ ਤੇ ਮੁਆਵਜ਼ੇ ਦੀ ਮੰਗ ਵੀ ਕੀਤੀ। ਪੋਕਲੇਨ ਚਾਲਕ ਨੇ ਖੋਲ੍ਹੀ ਵਿਭਾਗੀ ਪ੍ਰਬੰਧਾਂ ਦੀ ਪੋਲ ਮਹਿਣਾ ਵਿੱਚ ਪਾੜ ਪੂਰਨ ਆਈ ਪੋਕਲੇਨ ਮਸ਼ੀਨ ਪਹਿਲਾਂ ਡੀਜ਼ਲ ਨਾ ਹੋਣ ਕਾਰਨ ਬੰਦ ਰਹੀ। ਕਿਸਾਨਾਂ ਦੇ ਰੌਲੇ ਮਗਰੋਂ ਡੀਜ਼ਲ ਮਿਲਿਆ ਤਾਂ ਕੁਝ ਸਮੇਂ ਬਾਅਦ ਬੈਟਰੀ ਡਾਊਨ ਹੋ ਗਈ। ਮੁਰੰਮਤ ਦਾ ਕੰਮ ਘੰਟਿਆਂ ਠੱਪ ਰਿਹਾ। ਪੋਕਲੇਨ ਦੇ ਚਾਲਕ ਹਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਸਨੇ ਪਹਿਲਾਂ ਹੀ ਅਧਿਕਾਰੀਆਂ ਨੂੰ ਤੇਲ ਦਾ ਪ੍ਰਬੰਧ ਕਰਨ ਲਈ ਕਿਹਾ ਸੀ। ਡੀਜ਼ਲ ਮਿਲਣ ਮਗਰੋਂ ਬੈਟਰੀ ਨੇ ਜਵਾਬ ਦੇ ਦਿੱਤਾ। ਉਸਨੇ ਮਹਿਣਾ ਦੀਆਂ ਗਲੀਆਂ ‘ਚ ਨੀਵੀਆਂ ਬਿਜਲੀ ਦੀਆਂ ਤਾਰਾਂ ਤੇ ਖੇਤਾਂ ਵੱਲ ਜਾਂਦੇ ਤੰਗ ਮੋੜਾਂ ਦੀ ਸਮੱਸਿਆ ਵੀ ਦੱਸੀ। ਮੋਘੇ ਬੰਦ ਕਰਨ ਵਾਲਿਆਂ ਖਿਲਾਫ਼ ਕਾਰਵਾਈ ਦੀ ਤਿਆਰੀ- ਐਕਸੀਅਨ ਸਿੰਚਾਈ ਵਿਭਾਗ ਦੇ ਐਕਸੀਅਨ ਜਗਮੀਤ ਸਿੰਘ ਨੇ ਦੱਸਿਆ ਕਿ ਐਕਸੀਅਨ ਨੇ ਕਿਹਾ ਕਿ ਪਾੜ ਵਾਲੀ ਥਾਂ ਤੋਂ ਪਿੱਛੇ ਤਿਉਣਾ ਵੱਲ 7-8 ਮੋਘੇ ਬੰਦ ਕੀਤੇ ਹੋਏ ਸਨ ਜਿਸ ਕਰਕੇ ਪਾਣੀ ਦਾ ਦਬਾਅ ਵਧਿਆ। ਮੋਘੇ ਬੰਦ ਕਰਨ ਵਾਲਿਆਂ ਖਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਜਾ ਰਹੀ ਹੈ। 10 ਅਕਤੂਬਰ ਤੋਂ ਬਾਅਦ ਰੋਪੜ ਤੋਂ ਪਾਣੀ ਦਾ ਵਹਾਅ ਘਟਾਇਆ ਗਿਆ ਸੀ। ਜੋ 337 ਕਿਊਸਿਕ ਘਟ ਕੇ 280 ਕਿਊਸਿਕ ਰਹਿ ਗਿਆ।
