ਅੰਮਿ੍ਤਸਰ, 4 ਜਨਵਰੀ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਉੱਤਰੀ ਵਜ਼ੀਰਸਤਾਨ ਜ਼ਿਲ੍ਹੇ ਦੇ ਇਕ ਮਦਰਸੇ 'ਤੇ ਡਰੋਨ ਨਾਲ ਕੀਤੇ ਗਏ ਹਮਲੇ 'ਚ ਵਿਦਿਆਰਥੀਆਂ ਸਮੇਤ ਕਈ ਹੋਰ ਲੋਕ ਜ਼ਖਮੀ ਹੋ ਗਏ | ਜਾਣਕਾਰੀ ਅਨੁਸਾਰ ਵਜ਼ੀਰਸਤਾਨ ਦੇ ਖੈਸੋਖੇਲ ਖੇਤਰ 'ਚ ਅਲ-ਫ਼ਤਿਹ ਮਦਰਸੇ ਨੂੰ ਨਿਸ਼ਾਨਾ ਬਣਾ ਕੇ ਇਹ 'ਕਵਾਡਕਾਪਟਰ' ਹਮਲਾ ਕੀਤਾ ਗਿਆ | ਹਮਲੇ 'ਚ ਵਿਦਿਆਰਥੀਆਂ ਸਮੇਤ ਸਕੂਲ ਦੇ ਪਿ੍ੰਸੀਪਲ ਅਤੇ ਇਕ ਚੌਕੀਦਾਰ ਦੇ ਨਾਲ-ਨਾਲ ਸਟਾਫ਼ ਦੇ ਦੋ ਹੋਰ ਮੈਂਬਰ ਵੀ ਜ਼ਖ਼ਮੀ ਹੋ ਗਏ | ਦੱਸਿਆ ਜਾ ਰਿਹਾ ਹੈ ਕਿ ਜਦੋਂ ਮੀਰ ਅਲੀ ਹਸਪਤਾਲ ਤੋਂ ਬਚਾਅ 1122 ਟੀਮ ਜ਼ਖ਼ਮੀਆਂ ਨੂੰ ਬਚਾਉਣ ਲਈ ਮੌਕੇ 'ਤੇ ਪਹੁੰਚੀ ਤਾਂ ਉਸ 'ਤੇ ਇਕ ਹੋਰ ਡਰੋਨ ਹਮਲਾ ਕੀਤਾ ਗਿਆ | ਇਸ ਦੂਜੇ ਹਮਲੇ 'ਚ ਕਈ ਰਾਹਤ ਕਰਮਚਾਰੀ ਵੀ ਜ਼ਖ਼ਮੀ ਹੋ ਗਏ |
