ਮਾਨਸਾ, 13 ਅਪ੍ਰੈਲ (ਬਲਵਿੰਦਰ ਸਿੰਘ ਧਾਲੀਵਾਲ)-ਵਿਜੀਲੈਂਸ ਬਿਊਰੋ ਨੇ ਪੰਜਾਬ ਰਾਜ ਬੀਜ ਪ੍ਰਮਾਣਿਤ ਸੰਸਥਾ ਲੁਧਿਆਣਾ ਦੇ ਸੀਡ ਸਰਟੀਫਿਕੇਸ਼ਨ ਅਫ਼ਸਰ (ਬੀਜ ਪ੍ਰਮਾਣੀਕਰਣ ਅਧਿਕਾਰੀ) ਅੰਮਿ੍ਤਪਾਲ ਸਿੰਘ ਨੂੰ ਫ਼ਸਲ ਦੀ ਨਿਰੀਖਣ ਕਰਨ ਬਦਲੇ 50 ਹਜ਼ਾਰ ਰੁਪਏ ਰਿਸ਼ਵਤ ਲੈਂਦਿਆਂ ਰੰਗੀ ਹੱਥੀਂ ਕਾਬੂ ਕੀਤਾ ਹੈ | ਚੌਕਸੀ ਵਿਭਾਗ ਦੇ ਬੁਲਾਰੇ ਨੇ ਦੱਸਿਆ ਕਿ ਰਾਕੇਸ਼ ਕੁਮਾਰ ਪੁੱਤਰ ਮਹਿੰਦਰ ਵਾਸੀ ਮਾਨਸਾ ਨੇ ਸ਼ਿਕਾਇਤ ਕੀਤੀ ਸੀ ਕਿ ਉਹ ਸੀਡ ਫਾਰਮ ਚਲਾਉਂਦਾ ਹੈ | ਪੰਜਾਬ ਤੇ ਰਾਜ ਤੋਂ ਬਾਹਰਲੀਆਂ ਖੇਤੀਬਾੜੀ ਯੂਨੀਵਰਸਿਟੀਆਂ ਤੋਂ ਪਹਿਲੀ ਕਿਸਮ ਦਾ ਬੀਜ ਹਾਸਲ ਕਰ ਕੇ ਕਿਸਾਨਾਂ ਤੋਂ ਬਿਜਵਾਉਂਦਾ ਹੈ ਤੇ ਬੀਜ ਦੀ ਉੱਨਤ ਖ਼ਰੀਦ ਕੇ ਖ਼ਰੀਦੀ ਗਈ ਫ਼ਸਲ ਤੋਂ ਬੀਜ ਬਣਾਉਂਦਾ ਹੈ | ਐਤਕੀਂ ਇਸ ਫ਼ਰਮ ਨੇ 1275 ਏਕੜ 'ਚ ਕਣਕ ਦੇ ਬੀਜਾਂ ਦੀ ਬਿਜਾਈ ਕਰਵਾਈ ਗਈ ਸੀ | ਫ਼ਸਲੀ ਸੀਜ਼ਨ 2025-26 ਦੀ ਇੰਸਪੈਕਸ਼ਨ ਕਰਨ ਦੀ ਜ਼ਿੰਮੇਵਾਰੀ ਉਪਰੋਕਤ ਅਫ਼ਸਰ ਦੀ ਸੀ | ਇਸ ਨਿਰੀਖਣ ਬਦਲੇ ਉਸ ਨੇ ਲੱਖ ਰੁਪਏ ਦੀ ਮੰਗ ਕੀਤੀ ਤੇ ਸੌਦਾ 50 ਹਜ਼ਾਰ ਰੁਪਏ 'ਚ ਤੈਅ ਹੋ ਗਿਆ | ਬੁਲਾਰੇ ਨੇ ਦੱਸਿਆ ਕਿ ਚੌਕਸੀ ਵਿਭਾਗ ਦੀ ਟੀਮ ਨੇ ਐਸ. ਐਸ. ਪੀ. ਬਠਿੰਡਾ ਰੇਂਜ ਦੇ ਦਿਗਵਿਜੈ ਕਪਿਲ ਦੀ ਅਗਵਾਈ ਹੇਠ ਜਾਲ ਵਿਛਾਇਆ ਅਤੇ ਅੰਮਿ੍ਤਪਾਲ ਸਿੰਘ ਨੂੰ ਸਰਕਾਰੀ ਗਵਾਹਾਂ ਦੀ ਹਾਜ਼ਰੀ 'ਚ ਰਿਸ਼ਵਤ ਲੈਂਦਿਆਂ ਗਿ੍ਫ਼ਤਾਰ ਕਰ ਲਿਆ | ਉਕਤ ਖ਼ਿਲਾਫ਼ ਵੱਖ-ਵੱਖ ਧਾਰਾਵਾਂ ਅਧੀਨ ਮੁਕੱਦਮਾ ਦਰਜ ਕੀਤਾ ਗਿਆ ਹੈ |
