ਅੰਮਿ੍ਤਸਰ, 17 ਅਪ੍ਰੈਲ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਨੇ ਤੇਲ ਅਤੇ ਗੈਸ ਉਤਪਾਦਨ 'ਚ ਵੱਡੀ ਸਫਲਤਾ ਹਾਸਲ ਕੀਤੀ ਹੈ | ਜਾਣਕਾਰੀ ਅਨੁਸਾਰ ਪਾਕਿ ਨੇ ਆਪਣੇ ਸਭ ਤੋਂ ਵੱਡੇ ਤੇਲ ਖੂਹ ਤੋਂ ਵਪਾਰਕ ਉਤਪਾਦਨ ਸ਼ੁਰੂ ਕਰ ਦਿੱਤਾ ਹੈ | ਬਾਰਾਘਜ਼ਈ ਐਕਸ-01 ਖੂਹ ਤੋਂ ਈਾਧਨ ਲਈ ਵਿਦੇਸ਼ੀ ਸਰੋਤਾਂ 'ਤੇ ਪਾਕਿ ਦੀ ਨਿਰਭਰਤਾ ਘਟਾਉਣ ਅਤੇ ਇਸ ਦੀ ਆਰਥਿਕਤਾ ਨੂੰ ਹੁਲਾਰਾ ਦੇਣ ਦੀ ਉਮੀਦ ਹੈ | ਮਾਹਿਰਾਂ ਦਾ ਕਹਿਣਾ ਹੈ ਕਿ ਜੇਕਰ ਪਾਕਿ ਦੀਆਂ ਉਮੀਦਾਂ ਪੂਰੀਆਂ ਹੁੰਦੀਆਂ ਹਨ ਤਾਂ 'ਕਾਲੇ ਸੋਨੇ' ਦਾ ਇਹ ਖਜ਼ਾਨਾ ਪਾਕਿਸਤਾਨ ਨੂੰ ਅਮੀਰ ਬਣਾ ਸਕਦਾ ਹੈ | ਇਹ ਸਮਾਂ ਪਾਕਿ ਲਈ ਮਹੱਤਵਪੂਰਨ ਹੈ, ਕਿਉਂਕਿ ਹੋਰਮੁਜ਼ ਜਲਡਮਰੂ 'ਚ ਰੁਕਾਵਟ ਨੇ ਦੁਨੀਆ ਭਰ ਵਿਚ ਊਰਜਾ ਸਪਲਾਈ 'ਚ ਵਿਘਨ ਪਾਇਆ ਹੈ | ਮੀਡੀਆ ਰਿਪੋਰਟਾਂ ਅਨੁਸਾਰ ਪਾਕਿ ਨੇ ਆਪਣੇ ਇਤਿਹਾਸ ਦੀ ਸਭ ਤੋਂ ਵੱਡੀ ਤੇਲ ਅਤੇ ਗੈਸ ਖੋਜ ਤੋਂ ਉਤਪਾਦਨ ਸ਼ੁਰੂ ਕੀਤਾ ਹੈ | ਪਾਕਿਸਤਾਨੀ ਸਰਕਾਰ ਨੂੰ ਉਮੀਦ ਹੈ ਕਿ ਬਾਰਾਘਜ਼ਈ ਐਕਸ-01 ਸਾਲਾਨਾ 32.9 ਕਰੋੜ ਡਾਲਰ ਵਿਦੇਸ਼ੀ ਮੁਦਰਾ ਬਚਾਅ ਸਕਦਾ ਹੈ, ਜਿਸ ਨਾਲ ਆਰਥਿਕ ਸੰਕਟ ਦਾ ਸਾਹਮਣਾ ਕਰ ਰਹੇ ਪਾਕਿ ਨੂੰ ਮਹੱਤਵਪੂਰਨ ਰਾਹਤ ਮਿਲੇਗੀ | ਜਾਣਕਾਰੀ ਅਨੁਸਾਰ ਸੂਬਾ ਖੈਬਰ ਪਖਤੂਨਖਵਾ ਦੇ ਕੋਹਾਟ ਜ਼ਿਲ੍ਹੇ ਦੇ ਨਾਸ਼ਪਾ ਬਲਾਕ 'ਚ ਸਥਿਤ ਬਾਰਾਘਜ਼ਈ ਐਕਸ-01 ਖੂਹ ਵਰਤਮਾਨ 'ਚ ਪ੍ਰਤੀ ਦਿਨ ਲਗਭਗ 15,000 ਬੈਰਲ ਤੇਲ ਅਤੇ 4.5 ਕਰੋੜ ਸਟੈਂਡਰਡ ਕਿਊਬਿਕ ਫੁੱਟ ਗੈਸ ਪੈਦਾ ਕਰ ਰਿਹਾ ਹੈ | ਇਹ ਰੋਜ਼ਾਨਾ 15 ਮੀਟਿ੍ਕ ਟਨ ਤਰਲ ਪੈਟਰੋਲੀਅਮ ਗੈਸ (ਐੱਲ. ਪੀ. ਜੀ.) ਦਾ ਉਤਪਾਦਨ ਵੀ ਕਰਦਾ ਹੈ |
