ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਝਿੰਜਰ ਦਾ ਨਿਊਜ਼ੀਲੈਂਡ 'ਚ ਸਨਮਾਨ <br/>

ਜਲੰਧਰ, 19 ਅਪ੍ਰੈਲ (ਅਜੀਤ ਬਿਊਰੋ)-ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਸਰਬਜੀਤ ਸਿੰਘ ਝਿੰਜਰ ਨੂੰ ਨਿਊਜ਼ੀਲੈਂਡ ਦੇ ਆਕਲੈਂਡ ਸਥਿਤ ਇਤਿਹਾਸਕ ਗੁਰਦੁਆਰਾ ਕਲਗੀਧਰ ਸਾਹਿਬ (ਟਾਕਾਨੀਨੀ) ਵਿਖੇ ਉਨ੍ਹਾਂ ਦੀ ਮੁਹਿੰਮ 'ਮੇਰੀ ਦਸਤਾਰ ਮੇਰੀ ਸ਼ਾਨ', ਜੋ ਕਿ ਦੁਨੀਆ ਭਰ ਦੇ ਨੌਜਵਾਨਾਂ ਵਿਚ ਸਿੱਖ ਦਸਤਾਰ ਪ੍ਰਤੀ ਮਾਣ, ਪਛਾਣ ਤੇ ਸਤਿਕਾਰ ਨੂੰ ਉਤਸ਼ਾਹਿਤ ਕਰਨ ਲਈ ਸਮਰਪਿਤ ਹੈ, ਦੇ ਸਨਮਾਨ 'ਚ ਇਕ ਨਿੱਘਾ ਤੇ ਵਿਸ਼ੇਸ਼ ਸਨਮਾਨ ਦਿੱਤਾ ਗਿਆ | ਇਹ ਸਨਮਾਨ ਗੁਰਦੁਆਰਾ ਕਮੇਟੀ ਦੁਆਰਾ ਸੁਪਰੀਮ ਸਿੱਖ ਸੁਸਾਇਟੀ ਦੇ ਪ੍ਰਧਾਨ ਕਰਤਾਰ ਸਿੰਘ, ਸੀਨੀਅਰ ਆਗੂ ਦਲਜੀਤ ਤੇ ਨਾਇਬ ਸਿੰਘ ਦੇ ਨਾਲ ਇਕ ਸਮਾਰੋਹ ਵਿਚ ਦਿੱਤਾ ਗਿਆ, ਜਿਸ ਵਿਚ ਸਥਾਨਕ ਸਿੱਖ ਭਾਈਚਾਰੇ ਦੇ ਮੈਂਬਰ ਤੇ ਆਕਲੈਂਡ ਖੇਤਰ ਭਰ ਦੇ ਭਾਈਚਾਰਕ ਨੁਮਾਇੰਦੇ ਸ਼ਾਮਿਲ ਹੋਏ | ਆਪਣੀ ਫੇਰੀ ਦੌਰਾਨ, ਝਿੰਜਰ ਨੂੰ ਨਿਊਜ਼ੀਲੈਂਡ ਦੇ ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਤੇ ਟਾਕਾਨੀਨੀ ਸੰਸਦ ਮੈਂਬਰ ਰੀਮਾ ਨਖਲੇ ਨੂੰ ਮਿਲਣ ਦਾ ਸੁਭਾਗ ਵੀ ਪ੍ਰਾਪਤ ਹੋਇਆ, ਜਿਨ੍ਹਾਂ ਦੋਵਾਂ ਨੇ ਉਨ੍ਹਾਂ ਦੀ ਨਿਰਸਵਾਰਥ ਭਾਈਚਾਰਕ ਸੇਵਾ ਤੇ ਯੁਵਾ ਸਸ਼ਕਤੀਕਰਨ ਪ੍ਰਤੀ ਸਮਰਪਿਤ ਯਤਨਾਂ ਲਈ ਉਨ੍ਹਾਂ ਦੀ ਸ਼ਲਾਘਾ ਕੀਤੀ | ਇਸ ਮੌਕੇ ਆਕਲੈਂਡ ਸ਼ਹਿਰ ਦੇ ਪੰਜਾਬੀ ਕੌਂਸਲਰ ਲਾਡੀ ਸਿੰਘ ਪਟਿਆਲਾ, ਗੁਰਪ੍ਰੀਤ ਸਿੰਘ, ਹਰਿੰਦਰ ਮਾਨ, ਨਵ ਪੱਡਾ, ਦਲਜੀਤ ਸਿੰਘ ਭੰਗੂ, ਪਰਮਵੀਰ ਸਿੰਘ ਤੇ ਜੱਗਾ ਜਸਬੀਰ ਮੌਜੂਦ ਸਨ |