ਪਾਕਿ 'ਚ ਹਿੰਦੂ ਕਾਰੋਬਾਰੀ ਦੀ ਗੋਲੀ ਮਾਰ ਕੇ ਹੱਤਿਆ

ਅੰਮਿ੍ਤਸਰ, 23 ਅਪ੍ਰੈਲ (ਸੁਰਿੰਦਰ ਕੋਛੜ)-ਪਾਕਿਸਤਾਨ 'ਚ ਘੱਟ-ਗਿਣਤੀ ਹਿੰਦੂ ਭਾਈਚਾਰੇ 'ਤੇ ਹਮਲੇ ਲਗਾਤਾਰ ਜਾਰੀ ਹਨ | ਜਾਣਕਾਰੀ ਅਨੁਸਾਰ ਸਿੰਧ ਸੂਬੇ ਦੇ ਸੁੱਕੁਰ ਸ਼ਹਿਰ 'ਚ ਇਕ ਨੌਜਵਾਨ ਹਿੰਦੂ ਵਪਾਰੀ ਵਿਸ਼ਾਲ ਕੁਮਾਰ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ | ਮਨੁੱਖੀ ਅਧਿਕਾਰ ਸੰਗਠਨ 'ਵਾਇਸ ਆਫ਼ ਪਾਕਿਸਤਾਨ ਮਾਈਨੋਰਿਟੀਜ਼' ਨੇ ਚਸ਼ਮਦੀਦਾਂ ਦੇ ਬਿਆਨਾਂ ਦਾ ਹਵਾਲਾ ਦਿੰਦੇ ਹੋਏ ਦੱਸਿਆ ਕਿ ਕਈ ਹਥਿਆਰਬੰਦ ਹਮਲਾਵਰ ਸੁੱਕੁਰ ਦੇ ਸਟੇਸ਼ਨ ਰੋਡ ਇਲਾਕੇ 'ਚ ਵਿਸ਼ਾਲ ਦੀ ਦੁਕਾਨ ਵਿਚ ਦਾਖਲ ਹੋਏ ਅਤੇ ਅੰਨ੍ਹੇਵਾਹ ਗੋਲੀਆਂ ਚਲਾਈਆਂ | ਗੰਭੀਰ ਜ਼ਖਮੀ ਵਿਸ਼ਾਲ ਇਲਾਜ ਦੌਰਾਨ ਦਮ ਤੋੜ ਗਿਆ | ਉਹ ਆਪਣੇ ਪਿੱਛੇ ਪਤਨੀ ਅਤੇ ਛੋਟੇ ਬੱਚੇ ਛੱਡ ਗਿਆ ਹੈ | ਹਮਲਾਵਰ ਅਪਰਾਧ ਕਰਨ ਤੋਂ ਬਾਅਦ ਭੱਜ ਗਏ, ਜੋ ਪਾਕਿ 'ਚ ਕਾਨੂੰਨ ਵਿਵਸਥਾ ਦੀ ਅਣਹੋਂਦ ਨੂੰ ਦਰਸਾਉਂਦਾ ਹੈ |