ਪੁਲਿਸ ਵਲੋਂ ਗੋਲੀ ਚੱਲਣ ਦੀ ਘਟਨਾ ਤੋਂ ਕੀਤਾ ਇਨਕਾਰ <br/>

ਅੰਮਿ੍ਤਸਰ, 25 ਮਈ (ਰੇਸ਼ਮ ਸਿੰਘ)-ਇਥੇ ਪ੍ਰਸਿੱਧ ਕਾਮੇਡੀ ਕਲਾਕਾਰ ਕਪਿਲ ਸ਼ਰਮਾ ਦੇ ਘਰ ਮੂਹਰੇ ਅਣਪਛਾਤੇ ਹਮਲਾਵਰਾਂ ਵਲੋਂ ਗੋਲੀਆਂ ਚਲਾਉਣ ਦੀ ਸੂਚਨਾ ਮਿਲਣ ਉਪਰੰਤ ਪੁਲਿਸ ਵਲੋਂ ਮੌਕਿਆ ਦੀ ਜਾਂਚ ਕੀਤੀ ਗਈ ਜਿਸ ਸਬੰਧੀ ਪੁਲਿਸ ਨੇ ਬਾਅਦ 'ਚ ਦਾਅਵਾ ਕਰਕੇ ਗੋਲੀਆਂ ਚੱਲਣ ਵਰਗੀ ਕਿਸੇ ਵੀ ਤਰ੍ਹਾਂ ਦੀ ਘਟਨਾ ਵਾਪਰਨ ਤੋਂ ਇਨਕਾਰ ਕਰਦਿਆਂ ਕਿਹਾ ਕਿ ਇਹ ਮਹਿਜ਼ ਅਫ਼ਵਾਹ ਸੀ ਤੇ ਲੋਕਾਂ ਨੂੰ ਅਫਵਾਹ ਤੋਂ ਬਚਣਾ ਚਾਹੀਦਾ ਹੈ | ਇਥੇ ਸ਼ਹਿਰ ਦੇ ਬਾਹਰਵਾਰ ਪਾਸ਼ ਖੇਤਰ ਹੋਲੀ ਸਿਟੀ ਕਲੋਨੀ ਵਿਖੇ ਕਪਿਲ ਸ਼ਰਮਾ ਦਾ ਘਰ ਹੈ ਜਿਥੇ ਹੁਣ ਉਨ੍ਹਾਂ ਦੀ ਭੈਣ ਤੇ ਜੀਜਾ ਤੇ ਮਾਤਾ ਵੀ ਰਹਿੰਦੇ ਹਨ | ਕਪਿਲ ਸ਼ਰਮਾ ਜਦੋਂ ਅੰਮਿ੍ਤਸਰ ਆਉਂਦੇ ਹਨ ਤਾਂ ਇਥੇ ਹੀ ਆਪਣੇ ਘਰ ਠਹਿਰਦੇ ਹਨ | ਮੌਕੇ 'ਤੇ ਪੁੱਜੇ ਏ.ਸੀ.ਪੀ. ਕਮਲਜੀਤ ਸਿੰਘ ਨੂੰ ਜਦੋਂ ਪੁਛਿਆ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਥਾਣਾ ਛਾਉਣੀ ਦੇ ਮੁਖੀ ਸਬ ਇੰਸ: ਜਤਿੰਦਰ ਨਾਲ ਮੌਕਿਆ ਦਾ ਦੌਰਾ ਕੀਤਾ ਹੈ ਤੇ ਇਥੇ ਅਜਿਹੀ ਕੋਈ ਵੀ ਘਟਨਾ ਨਹੀਂ ਵਾਪਰੀ | ਜਦੋਂ ਉਨ੍ਹਾਂ ਤੋਂ ਪੁਛਿ ਆ ਗਿਆ ਕਿ ਤੜਕਸਾਰ ਕੋਈ 4 ਅਣਪਛਾਤੇ ਹਮਲਾਵਰਾਂ ਵਲੋਂ ਗੋਲੀ ਚਲਾਉਣ ਦੀ ਗਲ ਕਹੀ ਜਾ ਰਹੀ ਹੈ ਤਾਂ ਉਨ੍ਹਾਂ ਕਿਹਾ ਕਿ ਪੁਲਿਸ ਵਲੋਂ ਜਾ ਕੇ ਮੌਕਿਆਂ ਦਾ ਜਾਇਜ਼ਾ ਲਿਆ ਤੇ ਆਸ ਪਾਸ ਦੇ ਲੋਕਾਂ ਤੋਂ ਪੁਛਗਿੱਛ ਕੀਤੀ ਤੇ ਸੀ.ਸੀ.ਟੀ.ਵੀ. ਕੈਮਰੇ ਵੀ ਚੈੱਕ ਕੀਤੇ ਗਏ ਤੇ ਅਜਿਹੀ ਕੋਈ ਘਟਨਾ ਨਹੀਂ ਪਾਈ ਗਈ |