ਐੱਸ. ਏ. ਐੱਸ. ਨਗਰ, 27 ਮਈ (ਕਪਿਲ ਵਧਵਾ)-ਸਨਟੈੱਕ ਸਿਟੀ ਪ੍ਰਾਜੈਕਟ ਨਾਲ ਜੁੜੇ ਕਥਿਤ ਸੀ.ਐਲ.ਯੂ. ਘੁਟਾਲੇ ਤੇ ਹਵਾਲਾ ਰਾਸ਼ੀ ਦੇ ਮਾਮਲੇ ਵਿਚ ਗਿ੍ਫ਼ਤਾਰ ਅਜੇ ਸਹਿਗਲ ਨੂੰ ਅੱਜ ਚਾਰ ਦਿਨਾਂ ਦਾ ਈ. ਡੀ. ਰਿਮਾਂਡ ਸਮਾਪਤ ਹੋਣ ਉਪਰੰਤ ਮੁਹਾਲੀ ਦੀ ਵਿਸ਼ੇਸ਼ ਪੀ. ਐਮ. ਐਲ. ਏ. ਅਦਾਲਤ 'ਚ ਪੇਸ਼ ਕੀਤਾ ਗਿਆ | ਸੁਣਵਾਈ ਤੋਂ ਬਾਅਦ ਅਦਾਲਤ ਨੇ ਉਸ ਨੂੰ 9 ਜੂਨ ਤੱਕ ਨਿਆਂਇਕ ਹਿਰਾਸਤ ਤਹਿਤ ਜ਼ਿਲ੍ਹਾ ਜੇਲ੍ਹ ਰੋਪੜ ਭੇਜਣ ਦੇ ਹੁਕਮ ਸੁਣਾਏ | ਪੇਸ਼ੀ ਮੌਕੇ ਅਜੇ ਸਹਿਗਲ ਫ਼ਿਲਮੀ ਅੰਦਾਜ਼ ਵਿਚ ਸਖ਼ਤ ਸੁਰੱਖਿਆ ਪ੍ਰਬੰਧਾਂ ਹੇਠ ਅਦਾਲਤ 'ਚ ਪਹੁੰਚਿਆ ਅਤੇ ਕੋਰਟਰੂਮ ਦੇ ਬਾਹਰ ਆਪਣੇ ਜਾਣਕਾਰਾਂ ਨਾਲ ਮਿਲਿਆ | ਮਾਮਲੇ ਦੀ ਸੁਣਵਾਈ ਵਿਸ਼ੇਸ਼ ਜੱਜ ਪੀ. ਐਮ. ਐਲ. ਏ. ਹਰਦੀਪ ਸਿੰਘ ਦੀ ਅਦਾਲਤ ਵਿਚ ਹੋਈ | ਇਸ ਮੌਕੇ ਅਜੇ ਸਹਿਗਲ ਵਲੋਂ ਵਕੀਲ ਐੱਚ. ਐੱਸ. ਧਨੋਆ ਹਾਜ਼ਰ ਹੋਏ, ਜਦਕਿ ਈ. ਡੀ. ਵਲੋਂ ਵਿਸ਼ੇਸ਼ ਪਬਲਿਕ ਪ੍ਰੋਸੀਕਿਊਟਰ ਜੇ. ਐੱਸ. ਸਰਾਓ ਅਤੇ ਸਹਾਇਕ ਡਿਪਟੀ ਡਾਇਰੈਕਟਰ ਅਕਸ਼ੇ ਕੁਮਾਰ ਨੇ ਪੱਖ ਰੱਖਿਆ | ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਸੀ. ਐਲ. ਯੂ. ਮਨਜ਼ੂਰੀ ਲਈ ਵਰਤੇ ਗਏ ਦਸਤਾਵੇਜ਼ਾਂ 'ਤੇ ਕੁਝ ਜ਼ਮੀਨ ਮਾਲਕਾਂ ਦੇ ਕਥਿਤ ਜਾਅਲੀ ਦਸਤਖ਼ਤ ਅਤੇ ਅੰਗੂਠੇ ਦੇ ਨਿਸ਼ਾਨ ਵਰਤੇ ਗਏ ਸਨ | ਰਿਮਾਂਡ ਦੀ ਕਾਰਵਾਈ ਦੌਰਾਨ ਈ. ਡੀ. ਨੇ ਅਦਾਲਤ ਵਿਚ ਦਲੀਲ ਦਿੱਤੀ ਕਿ ਮਾਮਲੇ ਵਿਚ ਲਗਭਗ 172.34 ਕਰੋੜ ਰੁ. ਦੀ ਕਥਿਤ ਅਪਰਾਧਿਕ ਆਮਦਨ ਦੇ ਤੱਥ ਸਾਹਮਣੇ ਆਏ ਹਨ |
