ਅਟਾਰੀ ਸਰਹੱਦ 'ਤੇ ਗਾਇਕ ਏ. ਆਰ. ਰਹਿਮਾਨ ਬੀ.ਐਸ.ਐਫ. ਦੇ ਜਵਾਨਾਂ ਦਾ ਕਰਨਗੇ ਮਨੋਰੰਜਨ

ਅਟਾਰੀ ਸਰਹੱਦ, 6 ਜੂਨ (ਰਾਜਿੰਦਰ ਸਿੰਘ ਰੂਬੀ/ਗੁਰਦੀਪ ਸਿੰਘ)-ਦੇਸ਼ ਦੇ ਮਸ਼ਹੂਰ ਗਾਇਕ ਤੇ ਮਿਊਜ਼ਿਕ ਨਿਰਮਾਤਾ ਏ. ਆਰ. ਰਹਿਮਾਨ ਆਪਣੀ ਟੀਮ ਦੇਸ਼ ਦੇ ਜਵਾਨਾਂ ਦੇ ਨਾਮ 'ਮੈਂ ਵਾਪਸ ਆਉਂਗਾ' ਦੇ ਤਹਿਤ ਇਕ ਵੱਡਾ ਲਾਈਵ ਪ੍ਰੋਗਰਾਮ ਕਰਨਗੇ | ਅਟਾਰੀ ਸਰਹੱਦ 'ਤੇ ਹੋਣ ਜਾ ਰਹੇ ਇਤਿਹਾਸਕ ਸਮਾਗਮ ਦੌਰਾਨ ਦੇਸ਼ ਦੇ ਮਸ਼ਹੂਰ ਸੰਗੀਤਕਾਰ ਤੇ ਆਸਕਰ ਜੇਤੂ ਗਾਇਕ ਏ.ਆਰ. ਰਹਿਮਾਨ ਪਹਿਲੀ ਵਾਰ ਦੇਸ਼ ਦੀ ਅਟਾਰੀ ਸਰਹੱਦ 'ਤੇ ਹੋਣ ਜਾ ਰਹੇ ਸਮਾਰੋਹ ਵਿਚ ਲਾਈਵ ਪਰਫਾਰਮੈਂਸ ਦੇਣਗੇ | ਜਾਣਕਾਰੀ ਅਨੁਸਾਰ ਇਹ ਵਿਸ਼ੇਸ਼ ਸਮਾਗਮ 7 ਜੂਨ ਦਿਨ ਐਤਵਾਰ ਨੂੰ ਦੇਸ਼ ਦੀ ਅਟਾਰੀ ਸਰਹੱਦ 'ਤੇ ਸਥਿਤ ਬੀ. ਐੱਸ. ਐੱਫ. ਦੀ ਪੋਸਟ ਵਿਖੇ ਕਰਵਾਇਆ ਜਾ ਰਿਹਾ ਹੈ | ਇਸ ਮੌਕੇ ਏ. ਆਰ. ਰਹਿਮਾਨ ਦੇ ਨਾਲ ਸਮਾਗਮ 'ਚ ਪ੍ਰਸਿੱਧ ਫ਼ਿਲਮ ਨਿਰਦੇਸ਼ਕ ਇਮਤਿਆਜ਼ ਅਲੀ, ਅਦਾਕਾਰ ਵੇਦਾਂਗ ਰੈਣਾ ਤੇ ਫ਼ਿਲਮ ਨਾਲ ਜੁੜੇ ਮਸ਼ਹੂਰ ਗਾਇਕ ਮੋਹਿਤ ਚੌਹਾਨ, ਨੀਲਾਂਜਨਾ ਘੋਸ਼, ਪੂਜਾ ਤਿਵਾਰੀ ਤੇ ਨਰਗਿਸ ਵੀ ਸ਼ਿਰਕਤ ਕਰਨਗੇ | ਇਸ ਮੌਕੇ ਬਿਰਲਾ ਸਟੂਡੀਓ ਦੇ ਨਿਰਮਾਤਾਵਾਂ ਦੇ ਪ੍ਰਤੀਨਿਧੀ ਵੀ ਮੌਜੂਦ ਰਹਿਣਗੇ | ਸਮਾਗਮ ਦਾ ਉਦੇਸ਼ ਦੇਸ਼ ਦੇ ਬਹਾਦਰ ਜਵਾਨਾਂ ਨੂੰ ਸੰਗੀਤਕ ਸ਼ਰਧਾਂਜਲੀ ਭੇਟ ਕਰਨਾ ਹੈ |