ਅੰਮ੍ਰਿਤਸਰ, 19 ਜੂਨ (ਸੁਰਿੰਦਰ ਕੋਛੜ)-ਪਾਕਿਸਤਾਨੀ ਵਿਦੇਸ਼ ਮੰਤਰੀ ਅਤੇ ਉਪ ਪ੍ਰਧਾਨ ਮੰਤਰੀ ਇਸਹਾਕ ਡਾਰ ਨੇ ਸਿੰਧੂ ਬੇਸਿਨ ਦੇ ਦਰਿਆਵਾਂ ‘ਤੇ ਭਾਰਤ ਦੇ ਨਵੇਂ ਪ੍ਰਾਜੈਕਟਾਂ ‘ਤੇ ਆਪਣਾ ਇਤਰਾਜ਼ ਪ੍ਰਗਟ ਕਰਦਿਆਂ ਕਈ ਦੋਸ਼ ਲਗਾਏ ਹਨ। ਉਨ੍ਹਾਂ ਨੇ ਕਿਹਾ ਕਿ ਸਿੰਧੂ ਨਦੀ ਪ੍ਰਣਾਲੀ ‘ਤੇ ਭਾਰਤ ਦੇ ਜਲ ਭੰਡਾਰ ਵਿਸਥਾਰ ਅਤੇ ਪਾਣੀ ਦੇ ਮੋੜ ਦੇ ਪ੍ਰਾਜੈਕਟ ਪੂਰੇ ਖੇਤਰ ਲਈ ਖ਼ਤਰਾ ਪੈਦਾ ਕਰ ਸਕਦੇ ਹਨ। ਪਾਕਿਸਤਾਨੀ ਸਰਕਾਰ ਇਨ੍ਹਾਂ ਪ੍ਰਾਜੈਕਟਾਂ ਦਾ ਵਿਰੋਧ ਕਰ ਰਹੀ ਹੈ, ਜਦੋਂ ਕਿ ਭਾਰਤ ਕਹਿੰਦਾ ਹੈ ਕਿ ਪਾਣੀ ਦੀ ਵਰਤੋਂ ਜਾਂ ਡੈਮ ਨਿਰਮਾਣ ਉਸ ਦੇ ਅਧਿਕਾਰ ਖੇਤਰ ‘ਚ ਹੈ। ਡਾਰ ਨੇ ਇਹ ਵੀ ਕਿਹਾ ਕਿ ਭਾਰਤ ਦੇ ਪ੍ਰਾਜੈਕਟ ਨਦੀ ਦੇ ਕੁਦਰਤੀ ਵਹਾਅ ਨੂੰ ਬਦਲ ਸਕਦੇ ਹਨ। ਨਤੀਜੇ ਵਜੋਂ, ਭਾਰਤ ਦੀਆਂ ਕਾਰਵਾਈਆਂ ਪਾਕਿ ‘ਚ ਖੇਤਰੀ ਸਥਿਰਤਾ ਅਤੇ ਪਾਣੀ ਦੀ ਸੁਰੱਖਿਆ ਲਈ ਗੰਭੀਰ ਖ਼ਤਰਾ ਪੈਦਾ ਕਰ ਸਕਦੀਆਂ ਹਨ। ਇਸਹਾਕ ਡਾਰ ਨੇ ਬ੍ਰਸੇਲਜ਼ ‘ਚ ਜਲ ਸਰੋਤਾਂ ‘ਤੇ ਇਕ ਕਾਨਫ਼ਰੰਸ ‘ਚ ਬੋਲਦਿਆਂ ਸਿੰਧੂ ਜਲ ਸੰਧੀ ਦਾ ਮੁੱਦਾ ਉਠਾਇਆ। ਡਾਰ ਨੇ ਕਿਹਾ ਕਿ ਭਾਰਤ ਨੇ ਸਿੰਧ, ਚਨਾਬ ਅਤੇ ਰਾਵੀ ਨਦੀਆਂ ‘ਤੇ ਜਲ ਭੰਡਾਰ ਬਣਾਉਣ, ਮੌਜੂਦਾ ਢਾਂਚਿਆਂ ਦਾ ਵਿਸਥਾਰ ਕਰਨ ਅਤੇ ਪਾਣੀ ਨੂੰ ਮੋੜਨ ਵਰਗੇ ਪ੍ਰਾਜੈਕਟ ਸ਼ੁਰੂ ਕੀਤੇ ਹਨ। ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਕੁੱਲ ਮਿਲਾ ਕੇ ਘੱਟੋ-ਘੱਟ 17 ਅਜਿਹੇ ਪ੍ਰਾਜੈਕਟ ਪੂਰੇ ਦਰਿਆਈ ਪ੍ਰਣਾਲੀ ਨੂੰ ਦੇਣਗੇ, ਜਿਸ ਨਾਲ ਭਾਰਤ ਨੂੰ ਪਣ-ਪ੍ਰਧਾਨਤਾ ਪ੍ਰਾਪਤ ਕਰਨ ਦਾ ਸਾਧਨ ਮਿਲੇਗਾ। ਉਨ੍ਹਾਂ ਨੇ ਚਿਤਾਵਨੀ ਦਿੱਤੀ ਕਿ ਪਾਕਿ ਇਸ ਨੂੰ ਬਰਦਾਸ਼ਤ ਨਹੀਂ ਕਰੇਗਾ।
