ਝੋਨੇ ਦੀ ਲੁਆਈ ਨੇ ਜ਼ੋਰ ਫੜਿਆ-ਯੂਰੀਏ ਦੀ ਕੋਈ ਕਮੀ ਨਹੀਂ-ਡਾਇਰੈਕਟਰ ਬਰਾੜ

ਪਟਿਆਲਾ, 25 ਜੂਨ (ਭਗਵਾਨ ਦਾਸ)- ਝੋਨੇ ਦੀ ਲੁਆਈ ਦਿਨੋਂ–ਦਿਨ ਜ਼ੋਰ ਫੜ ਰਹੀ ਹੈ। ਇਸ ਸਾਲ ਇਹ ਦੇਰੀ ਨਾਲ ਪਿਛੇਤੀ ਸ਼ੁਰੂ ਹੋਈ ਕਿਉਂਕਿ ਗਰਮੀ ਪੈਣ ਕਾਰਨ ਪਨੀਰੀਆਂ ਵੀ ਦੇਰੀ ਨਾਲ ਲੱਗੀਆਂ ਅਤੇ ਹੁਣ ਮੌਨਸੂਨ ’ਚ ਦੇਰੀ ਹੋ ਗਈ। ਪੰਜਾਬ ਪ੍ਰੀਜ਼ਰਵੇਸ਼ਨ ਆਫ ਸਬ ਸੁਆਇਲ ਵਾਟਰ ਐਕਟ, 2009 ਥੱਲੇ ਪਿਛਲੇ ਸਾਲਾਂ ’ਚ 15 ਜੂਨ ਦੇ ਆਲੇ–ਦੁਆਲੇ ਲੁਆਈ ਸ਼ੁਰੂ ਹੋ ਜਾਂਦੀ ਸੀ। ਕਿਸਾਨ ਮੰਗ ਕਰਦੇ ਸੀ ਕਿ ਇਹ ਤਰੀਕ 10 ਜੂਨ ਕਰ ਦਿੱਤੀ ਜਾਵੇ, ਐਤਕੀ ਲੁਆਈ 1 ਜੂਨ ਕਰਨ ਉਪਰੰਤ ਵੀ ਇਸੇ ਹਫ਼ਤੇ 22–23 ਜੂਨ ਤੋਂ ਸ਼ੁਰੂ ਹੋ ਕੇ ਜ਼ੋਰ ਫੜ ਰਹੀ ਹੈ। ਜੰਗ ਵਿਚ ਹੋਰਮੁਜ਼ ਜਲਡਮਰੂ ਦੇ ਰਸਤੇ ਬੰਦ ਹੋਣ ਕਾਰਨ ਫਰਟੀਲਾਈਜ਼ਰ ਦੀ ਸੰਭਾਵਿਤ ਕਮੀ ਕਿਸਾਨਾਂ ’ਚ ਚਿੰਤਾ ਬਣੀ ਹੋਈ ਸੀ। ਖੇਤੀਬਾੜੀ ਤੇ ਕਿਸਾਨ ਭਲਾਈ ਵਿਭਾਗ ਦੇ ਡਾਇਰੈਕਟਰ ਡਾ. ਗੁਰਜੀਤ ਸਿੰਘ ਬਰਾੜ ਕਹਿੰਦੇ ਹਨ ਕਿ ਯੂਰੀਏ ਦੀ ਕੋਈ ਕਮੀ ਨਹੀਂ। ਇਸ ਵੇਲੇ 12.20 ਲੱਖ ਟਨ ਯੂਰੀਆ ਉਪਲੱਬਧ ਹੈ ਜਦੋਂ ਕਿ ਪਿਛਲੇ ਸਾਲ ਇਸੇ ਸਮੇਂ 11.5 ਲੱਖ ਟਨ ਉਪਲੱਬਧ ਸੀ। ਡਾ. ਬਰਾੜ ਅਨੁਸਾਰ ਹੁਣ ਕੁੱਝ ਹਾਲਾਤ ਠੀਕ ਹੋਣ ਨਾਲ ਖਰੀਫ ਦੇ ਸਾਰੇ ਮੌਸਮ ’ਚ ਕਮੀ ਨਹੀਂ ਆਉਣ ਦਿੱਤੀ ਜਾਵੇਗੀ।