ਰੇਲਵੇ ਵਿਚ ਵੱਡੇ ਸੁਧਾਰ: ਖਾਦਾਂ ਅਤੇ ਫਲਾਈ ਐਸ਼ ਦੀ ਢੁਆਈ ਹੁਣ ਕੰਟੇਨਰਾਂ ਰਾਹੀਂ ਹੋਵੇਗੀ

ਮੰਡੀ ਗੋਬਿੰਦਗੜ੍ਹ, 16 ਜੁਲਾਈ (ਮੋਹਿਤ ਸਿੰਗਲਾ)-ਭਾਰਤੀ ਰੇਲਵੇ ਨੇ ਮਾਲ ਢੁਆਈ ਤੇ ਬੁਨਿਆਦੀ ਢਾਂਚੇ ਦੇ ਆਧੁਨਿਕੀਕਰਨ ਵੱਲ ਕਈ ਮਹੱਤਵਪੂਰਨ ਸੁਧਾਰਾਂ ਦਾ ਐਲਾਨ ਕੀਤਾ ਹੈ । ਨਵੀਂ ਵਿਵਸਥਾ ਅਧੀਨ ਹੁਣ ਖਾਦਾਂ ਦੀ ਢੁਆਈ ਰਵਾਇਤੀ ਬੰਦ ਮਾਲਗੱਡੀਆਂ ਦੀ ਥਾਂ ਵਿਸ਼ੇਸ਼ ਤੌਰ ’ਤੇ ਤਿਆਰ ਕੀਤੇ ਕੰਟੇਨਰਾਂ ਰਾਹੀਂ ਕੀਤੀ ਜਾ ਸਕੇਗੀ । ਰੇਲਵੇ ਅਨੁਸਾਰ ਦੇਸ਼ ਵਿਚ ਖਾਦਾਂ ਦੀ ਲਗਭਗ 85 ਫ਼ੀਸਦੀ ਢੁਆਈ ਰੇਲ ਮਾਰਗ ਰਾਹੀਂ ਹੁੰਦੀ ਹੈ । ਕੰਟੇਨਰ ਆਧਾਰਿਤ ਪ੍ਰਣਾਲੀ ਲਾਗੂ ਹੋਣ ਨਾਲ ਮਾਲ ਦੀ ਲੋਡਿੰਗ, ਸਟੋਰੇਜ ਤੇ ਵੰਡ ਹੋਰ ਸੁਵਿਧਾਜਨਕ ਬਣੇਗੀ ਤੇ ਪੂਰੀ ਰੇਕ ਨੂੰ ਰੋਕੇ ਬਿਨਾਂ ਵੱਖ-ਵੱਖ ਕੰਟੇਨਰਾਂ ਨੂੰ ਉਤਾਰਨ ਅਤੇ ਸੰਭਾਲਣ ਦੀ ਸਹੂਲਤ ਮਿਲੇਗੀ । ਰੇਲਵੇ ਨੇ ਫਲਾਈ ਐਸ਼ ਦੀ ਢੁਆਈ ਪ੍ਰਣਾਲੀ ਵਿਚ ਵੀ ਮਹੱਤਵਪੂਰਨ ਤਬਦੀਲੀ ਕੀਤੀ ਹੈ । ਹੁਣ ਇਸ ਦੀ ਢੁਆਈ ਖੁੱਲ੍ਹੇ ਵੈਗਨਾਂ ਦੀ ਬਜਾਏ ਵਿਸ਼ੇਸ਼ ਕੰਟੇਨਰਾਂ ਰਾਹੀਂ ਕੀਤੀ ਜਾਵੇਗੀ । ਦੇਸ਼ ਵਿਚ ਹਰ ਸਾਲ ਲਗਭਗ 34 ਕਰੋੜ ਟਨ ਫਲਾਈ ਐਸ਼ ਦਾ ਉਤਪਾਦਨ ਹੁੰਦਾ ਹੈ, ਜਿਸ ਦੀ ਵਰਤੋਂ ਮੁੱਖ ਤੌਰ ’ਤੇ ਸੀਮੈਂਟ ਉਦਯੋਗ ਅਤੇ ਸੜਕ ਨਿਰਮਾਣ ਵਿੱਚ ਕੀਤੀ ਜਾਂਦੀ ਹੈ । ਨਵੀਂ ਪ੍ਰਣਾਲੀ ਨਾਲ ਲੋਡਿੰਗ, ਢੁਆਈ ਤੇ ਸਟੋਰੇਜ ਦੌਰਾਨ ਉੱਡਣ ਵਾਲੀ ਧੂੜ ਵਿਚ ਕਮੀ ਆਵੇਗੀ।