ਪਟਿਆਲਾ, 22 ਜੁਲਾਈ (ਭਗਵਾਨ ਦਾਸ)-ਬਾਸਮਤੀ ਦੀ ਕਾਸ਼ਤ ਥੱਲੇ ਰਕਬਾ ਘਟਿਆ ਹੈ| ਪਿਛਲੇ ਸਾਲ 7 ਕੁ ਲੱਖ ਹੈਕਟੇਅਰ ਰਕਬੇ ’ਤੇ ਬਾਸਮਤੀ ਦੀ ਕਾਸ਼ਤ ਹੋਈ ਸੀ ਅਤੇ ਝੋਨਾ 25.90 ਲੱਖ ਹੈਕਟੇਅਰ ਤੇ ਬੀਜਿਆ ਗਿਆ ਸੀ| ਭਾਰਤੀ ਖੇਤੀਬਾੜੀ ਖੋਜ ਸੰਸਥਾ (ਆਈ.ਸੀ.ਏ.ਆਰ.) ਦੇ ਡਾਇਰੈਕਟਰ ਡਾ. ਸੀ.ਐੱਚ. ਸ੍ਰੀਨਿਵਾਸਾ ਰਾਓ ਨੇ ਕਿਸਾਨਾਂ ਨੂੰ ਕਿਹਾ ਹੈ ਕਿ ਉਹ ਇਸ ਮਹੀਨੇ ਦੇ ਅੰਤ (31 ਜੁਲਾਈ) ਤੱਕ ਬਾਸਮਤੀ ਦੀ ਪੂਸਾ ਬਾਸਮਤੀ 1509 ਕਿਸਮ ਲਾਹੇਵੰਦ ਲਗਾ ਸਕਦੇ ਹਨ| ਜੋ ਪੱਕਣ ਨੂੰ ਥੋੜ੍ਹਾ ਸਮਾਂ ਲੈਂਦੀ ਹੈ ਅਤੇ ਇਸ ਦਾ ਚੌਲ ਬਰਾਮਦ ਕੀਤਾ ਜਾਂਦਾ ਹੈ| ਇਹ ਕਿਸਮ ਲੁਆਈ ਉਪਰੰਤ 95 ਦਿਨਾਂ ’ਚ ਪੱਕ ਜਾਂਦੀ ਹੈ| ਪਨੀਰੀ ਕੇਵਲ 20-25 ਦਿਨਾਂ ਦੀ ਹੀ ਖੇਤ ’ਚ ਲਗਾਈ ਜਾ ਸਕਦੀ ਹੈ| ਇਹ ਕਿਸਮ ਆਈ. ਏ.ਆਰ.ਆਈ. ਵਲੋਂ ਵਿਕਸਿਤ ਕੀਤੀ ਗਈ ਹੈ, ਜਿਸ ਦੀਆਂ ਕਿਸਮਾਂ ਬਾਸਮਤੀ ਦੀ ਕਾਸ਼ਤ ਥੱਲੇ ਕੁੱਲ ਰਕਬੇ ਵਿਚੋਂ 80 ਫ਼ੀਸਦੀ ਰਕਬੇ ’ਤੇ ਬੀਜੀਆਂ ਜਾਂਦੀਆਂ ਹਨ| ਕਿਸਾਨਾਂ ਨੂੰ ਜੋ ਡਰ ਹੈ ਕਿ ਪੱਛਮੀ ਏਸ਼ੀਆ ’ਚ ਈਰਾਨ ਅਤੇ ਅਮਰੀਕਾ ਦਰਮਿਆਨ ਹੋ ਰਹੀ ਜੰਗ ਕਾਰਨ ਬਾਸਮਤੀ ਦੀ ਬਰਾਮਦ ਨਹੀਂ ਹੋਵੇਗੀ, ਉਹ ਬਾਸਮਤੀ ਐਕਸਪੋਰਟਰਜ਼ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਅਤੇ ਨਾਮਵਰ ਬਰਾਮਦਕਾਰ ਵਿਜੇ ਸੇਤੀਆ ਅਨੁਸਾਰ ਬੇਬੁਨਿਆਦ ਹੈ| ਬਾਸਮਤੀ ਚੌਲ ਹੁਣ ਵੀ ਘਰੇਲੂ ਮੰਡੀ ’ਚ 90 ਰੁਪਏ ਪ੍ਰਤੀ ਕਿੱਲੋ ਤੱਕ ਵਿੱਕ ਰਿਹਾ ਹੈ| ਬਾਸਮਤੀ ਚੌਲ ਦੀ ਮੰਗ ਬਰਕਰਾਰ ਹੈ|
