ਮੋਗਾ, 8 ਜੁਲਾਈ (ਅਸ਼ੋਕ ਬਾਂਸਲ)-ਅਮਰਦਾਸ ਯਾਤਰਾ ਅਤੇ ਮਾਤਾ ਵੈਸ਼ਨੋ ਦੇਵੀ ਯਾਤਰਾ ‘ਤੇ ਜਾਣ ਵਾਲੇ ਯਾਤਰੀਆਂ ਲਈ ਬਾਬਾ ਬਰਫ਼ਾਨੀ ਸੇਵਾ ਮੰਡਲ ਮੋਗਾ ਵਲੋਂ ਛੰਨ ਅਰੋੜੀਆਂ ਵਿਖੇ 24ਵਾਂ ਵਿਸ਼ਾਲ ਭੰਡਾਰਾ ਸ਼ੁਰੂ ਕੀਤਾ ਗਿਆ। ਇਸ ਭੰਡਾਰੇ ਮੌਕੇ ਮੁੱਖ ਮਹਿਮਾਨ ਸਤੀਸ਼ ਸ਼ਰਮਾ ਖ਼ੁਰਾਕ ਤੇ ਸਿਵਲ ਸਪਲਾਈ, ਟਰਾਂਸਪੋਰਟ ਅਤੇ ਖੇਡ ਮੰਤਰੀ, ਜੰਮੂ ਕਸ਼ਮੀਰ ਵਿਸ਼ੇਸ਼ ਤੌਰ ‘ਤੇ ਪੁੱਜੇ। ਇਸ ਮੌਕੇ ਉਨ੍ਹਾਂ ਦੇ ਨਾਲ ਲਾਲ ਸਿੰਘ ਸਾਬਕਾ ਕੈਬਨਿਟ ਮੰਤਰੀ ਜੰਮੂ ਅਤੇ ਕਸ਼ਮੀਰ, ਡਾ. ਮਨੋਹਰ ਲਾਲ ਸ਼ਰਮਾ ਸਾਬਕਾ ਮੰਤਰੀ ਜੰਮੂ ਅਤੇ ਕਸ਼ਮੀਰ, ਸੁਭਾਸ਼ ਗੁਪਤਾ ਸਾਬਕਾ ਐਮ. ਐਲ.ਸੀ. ਅਤੇ ਬ੍ਰਿਜੇਸ਼ਵਰ ਸਿੰਘ ਸਾਬਕਾ ਚੇਅਰਮੈਨ ਵੀ ਹਾਜ਼ਰ ਸਨ ਅਤੇ ਮੰਤਰੀ ਸਤੀਸ਼ ਸ਼ਰਮਾ ਨੇ ਰੀਬਨ ਕੱਟ ਕੇ ਭੰਡਾਰੇ ਦਾ ਉਦਘਾਟਨ ਕੀਤਾ। ਇਸ ਮੌਕੇ ਭਜਨ ਗਾਇਕ ਮਹੇਸ਼ ਚੋਪੜਾ ਵਲੋਂ ਆਪਣੇ ਭਜਨਾਂ ਨਾਲ਼ ਪ੍ਰੋਗਰਾਮ ਦੀ ਸ਼ੁਰੂਆਤ ਕੀਤੀ। ਮਨਪ੍ਰੀਤ ਗਰੋਵਰ ਅਤੇ ਅਜੈ ਗਰਗ ਨੇ ਸ਼ਿਵ ਭਜਨਾਂ ਦੇ ਨਾਲ ਸ਼ਰਧਾਲੂਆਂ ਨੂੰ ਮੰਤਰ ਮੁਗਧ ਕਰ ਦਿੱਤਾ। ਜੰਮੂ ਤੋਂ ਭਜਨ ਗਾਇਕਾ ਸੰਧਿਆ ਸ਼ਰਮਾ ਨੇ ਆਪਣੇ ਸ਼ਿਵ ਭਜਨਾਂ ਨਾਲ ਸ਼ਰਧਾਲੂਆਂ ਨੂੰ ਨੱਚਣ ਲਈ ਮਜਬੂਰ ਕਰ ਦਿੱਤਾ। ਮੰਤਰੀ ਸਤੀਸ਼ ਸ਼ਰਮਾ ਨੇ ਸ਼੍ਰੀ ਅਮਰਨਾਥ ਅਤੇ ਮਾਤਾ ਵੈਸ਼ਨੋ ਦੇਵੀ ਦੇ ਸ਼ਰਧਾਲੂਆਂ ਨੂੰ ਭੋਜਨ ਅਤੇ ਆਸਰਾ ਪ੍ਰਦਾਨ ਕਰਨ ਵਿਚ ਬਾਬਾ ਬਰਫ਼ਾਨੀ ਸੇਵਾ ਮੰਡਲ ਮੈਂਬਰਾਂ ਦਾ ਇਸ ਉੱਤਮ ਕਾਰਜ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਭਗਵਾਨ ਸ਼ਿਵ ਸਾਰੇ ਵਲੰਟੀਅਰਾਂ ਨੂੰ ਖ਼ੁਸ਼ਹਾਲੀ ਦਾ ਆਸ਼ੀਰਵਾਦ ਦੇਣ ਅਤੇ ਕਿਹਾ ਕਿ ਜੰਮੂ-ਕਸ਼ਮੀਰ ਸਰਕਾਰ ਹਮੇਸ਼ਾ ਮੋਗਾ ਭੰਡਾਰੇ ਦਾ ਖੁੱਲ ਕੇ ਸਾਥ ਦੇਵੇਗੀ। ਇਸ ਮੌਕੇ ਬਾਘਾ ਪੁਰਾਣਾ, ਮੁਦਕੀ, ਨਕੋਦਰ, ਭਿੰਡਰ ਕਲਾਂ, ਹੀਰਾ ਨਗਰ, ਕਿਸ਼ਨਪੁਰ ਕੰਢੀ, ਬਲਾਚੌਰ, ਗੁਰਦਾਸਪੁਰ, ਗੁਜਰਾਤ, ਸੋਨਗੜ੍ਹ, ਕਠੂਆ ਅਤੇ ਛੜਵਾਲ ਦੀਆਂ ਸ਼ਾਖਾਵਾਂ ਦੇ ਮੈਂਬਰ ਇਸ ਸਮਾਗਮ ਵਿਚ ਸ਼ਾਮਲ ਹੋਏ। ਦਵਾਰਕਾ ਪ੍ਰਸਾਦ ਬੈਂਕ ਆਫ਼ ਇੰਡੀਆ ਮੈਨੇਜਰ ਅਤੇ ਰਾਹੁਲ ਬੈਂਕ ਆਫ਼ ਇੰਡੀਆ ਮੈਨੇਜਰ ਨੇ ਆਪਣੀ ਹਾਜ਼ਰੀ ਲਗਾਉਣ ਲਈ ਭੰਡਾਰੇ ਵਾਲੀ ਥਾਂ ਦਾ ਵਿਸ਼ੇਸ਼ ਤੌਰ ‘ਤੇ ਦੌਰਾ ਕੀਤਾ। ਪ੍ਰਧਾਨ ਚੰਦਰਸ਼ੇਖਰ ਸੂਦ ਨੇ ਸਾਰੇ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਅਤੇ ਕਿਹਾ ਕਿ ਇਹ ਭੰਡਾਰਾ ਬਾਬਾ ਬਰਫ਼ਾਨੀ ਸੇਵਾ ਮੰਡਲ ਵਲੋਂ ਪਿਛਲੇ 24 ਸਾਲਾਂ ਤੋਂ ਸਾਰੀਆਂ ਸ਼ਾਖਾਵਾਂ ਅਤੇ ਸਾਰੇ ਮੋਗਾ ਨਿਵਾਸੀਆਂ ਦੇ ਵਿਸ਼ੇਸ਼ ਸਹਿਯੋਗ ਨਾਲ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਸਰਕਾਰ ਦਾ ਧੰਨਵਾਦ ਕੀਤਾ ਅਤੇ ਕਿਹਾ ਕਿ ਜੰਮੂ-ਕਸ਼ਮੀਰ ਸਰਕਾਰ ਵੀ ਖੁੱਲ੍ਹੇ ਦਿਲ ਨਾਲ ਸਮਰਥਨ ਦਿੰਦੀ ਹੈ। ਉਨ੍ਹਾਂ ਦੇ ਸਮਰਥਨ ਕਾਰਨ ਹੀ ਇਹ ਭੰਡਾਰਾ ਜਾਰੀ ਹੈ ਅਤੇ ਭਵਿੱਖ ਵਿਚ ਵੀ ਜਾਰੀ ਰਹੇਗਾ। ਉਨ੍ਹਾਂ ਨੇ ਮੌਜੂਦਾ ਮੰਤਰੀ ਅਤੇ ਸਰਕਾਰੀ ਅਧਿਕਾਰੀਆਂ ਨੂੰ ਦੱਸਿਆ ਕਿ ਜੇਕਰ ਭੰਡਾਰਾ ਸਥਾਨ ‘ਤੇ ਸ਼੍ਰੀ ਅਮਰਨਾਥ ਯਾਤਰਾ ਲਈ ਰਜਿਸਟ੍ਰੇਸ਼ਨ ਕਾਊਂਟਰ ਖੋਲ੍ਹਿਆ ਜਾਂਦਾ ਹੈ, ਤਾਂ ਅਸੀਂ ਉਨ੍ਹਾਂ ਸਾਰੇ ਅਮਰਨਾਥ ਯਾਤਰੀਆਂ ਨੂੰ ਸਹੂਲਤਾਂ ਪ੍ਰਦਾਨ ਕਰ ਸਕਦੇ ਹਾਂ ਜੋ ਉਨ੍ਹਾਂ ਨੂੰ ਲਖਨਪੁਰ ਵਿਚ ਉਪਲਬਧ ਨਹੀਂ ਹਨ। ਮੰਤਰੀ ਸਤੀਸ਼ ਸ਼ਰਮਾ ਨੇ ਇਸ ਲਈ ਵੀ ਪੂਰੇ ਯਤਨ ਕਰਨ ਦਾ ਭਰੋਸਾ ਦਿੱਤਾ। ਇਸ ਮੌਕੇ ਸੁਰੇਸ਼ ਰਾਵਲ, ਪੰਕਜ ਮਿੱਤਲ, ਸੁਧੀਰ ਸੂਦ, ਨੀਰੂ ਮਿੱਤਲ, ਸੰਜੇ ਨੌਰੀਆ, ਅਮਨ ਸਾਜਨ, ਪ੍ਰਦੀਪ ਹੰਸ, ਰਾਹੁਲ, ਦੀਪਕ, ਰਿਹਾਨ, ਵਿਪਿਨ ਮਿੰਕਲ ਆਦਿ ਮੈਂਬਰ ਮੌਜੂਦ ਸਨ।
