18-11-2026
ਅੱਖਰ:
Ad Position 18 No active advertisement
ਵਿਚਾਰ ਪ੍ਰਵਾਹ
ਪ੍ਰਕਾਸ਼ਿਤ: 06-01-2026

-ਗਰਮਾ-ਗਰਮੀ ਵਾਲੇ ਮਾਹੌਲ ਵਿਚ ਹੋਈ ਨਗਰ ਕੌਂਸਲ ਦੀ ਮੀਟਿੰਗ- 'ਆਪ' ਦੇ ਬਾਗ਼ੀ ਕੌਂਸਲਰਾਂ ਨੇ ਬੁਲਾਈ ਸੀ ਰੀਕੋਜਿਸਨ ਮੀਟਿੰਗ <br/>

Ad Position 21
No active advertisement
ਅਜੀਤ ਡੈਸਕ 06-01-2026
ਸੰਗਰੂਰ, 5 ਜਨਵਰੀ (ਅਮਨਦੀਪ ਸਿੰਘ ਬਿੱਟਾ) - ਨਗਰ ਕੌਂਸਲ ਸੰਗਰੂਰ ਵਿਚ ਸੱਤਾਧਾਰੀ ਧਿਰ ਆਪ ਨਾਲ ਸਬੰਧਿਤ ਬਾਗ਼ੀ ਕੌਂਸਲਰਾਂ ਅਤੇ ਆਜ਼ਾਦ ਕੌਂਸਲਰਾਂ ਵਲੋਂ ਬੁਲਾਈ ਰੀਕੋਜਿਸਨ ਵਿਸ਼ੇਸ਼ ਮੀਟਿੰਗ ਅੱਜ ਬੇਹੱਦ ਤਣਾਅਪੂਰਨ ਮਾਹੌਲ ਵਿਚ ਨੇਪਰੇ ਚੜ੍ਹੀ | ਰੀਕੋਜਿਸਨ ਮੀਟਿੰਗ ਦੇ ਪਾਏ ਏਜੰਡਿਆਂ ਵਿਚ ਵਾਰਡ ਨੰ. 01 ਦੀ ਕੌਂਸਲਰ ਕੋਮਲ ਰਾਣੀ, ਵਾਰਡ ਨੰ. 03 ਦੀ ਕੌਂਸਲਰ ਬੀਬੀ ਹਰਮਨ, ਵਾਰਡ ਨੰ. 23 ਦੇ ਕੌਂਸਲਰ ਸਤਿੰਦਰ ਸੈਣੀ ਅਤੇ ਖ਼ੁਦ ਨਗਰ ਕੌਂਸਲ ਦੇ ਪ੍ਰਧਾਨ ਭੁਪਿੰਦਰ ਸਿੰਘ ਨਹਿਲ ਦੇ ਵਾਰਡ ਨੰ. 6 ਨੂੰ ਛੱਡ ਕੇ ਬਾਕੀ ਦੇ ਵਾਰਡਾਂ ਵਿਚ ਵਿਕਾਸ ਅਤੇ ਰਿਪੇਅਰ ਦੇ ਕੰਮਾਂ ਲਈ ਪ੍ਰਤੀ ਵਾਰਡ 20 ਲੱਖ ਰੁਪਏ ਰੱਖੇ ਜਾਣ ਦੇ ਏਜੰਡੇ ਨੂੰ ਭਾਵੇਂ ਹੋਰਨਾਂ ਏਜੰਡਿਆਂ ਵਾਂਗ ਬਾਗ਼ੀ ਧੜੇ ਨੇ ਆਜ਼ਾਦ, ਕਾਂਗਰਸ ਅਤੇ ਭਾਜਪਾ ਦੇ ਕੌਂਸਲਰਾਂ ਦੀ ਮਦਦ ਨਾਲ ਪਾਸ ਕਰਵਾਏ ਜਾਣ ਦਾ ਦਾਅਵਾ ਕੀਤਾ ਪਰ ਇਸ ਏਜੰਡੇ ਤੋਂ ਖ਼ਫ਼ਾ ਸਤਿੰਦਰ ਸੈਣੀ, ਬੀਬੀ ਹਰਮਨ ਅਤੇ ਕੋਮਲ ਰਾਣੀ ਨੇ ਨਾਅਰੇਬਾਜ਼ੀ ਕਰਦਿਆਂ ਹਾਊਸ ਦੀ ਮੀਟਿੰਗ ਦਾ ਬਾਈਕਾਟ ਕਰ ਦਿੱਤਾ | ਹਾਊਸ ਦੀ ਮੀਟਿੰਗ ਤੋਂ ਨਾਅਰੇਬਾਜ਼ੀ ਕਰਦਿਆਂ ਬਾਹਰ ਆਉਂਦਿਆਂ ਸਤਿੰਦਰ ਸੈਣੀ, ਬੀਬੀ ਹਰਮਨ ਨੇ ਕਿਹਾ ਕਿ ਨਿੱਜੀ ਰੰਜਸ਼ ਤਹਿਤ ਉਨ੍ਹਾਂ ਦੇ ਵਾਰਡਾਂ ਨੂੰ ਏਜੰਡੇ ਤੋਂ ਬਾਹਰ ਕੀਤਾ ਗਿਆ ਹੈ | ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਵਾਰਡ ਨਿਵਾਸੀ ਵੀ ਸੰਗਰੂਰ ਦੇ ਹੀ ਵਸਨੀਕ ਹਨ ਫਿਰ ਉਨ੍ਹਾਂ ਵਾਰਡ ਦੇ ਵਿਕਾਸ ਕਾਰਜਾਂ ਲਈ ਹੋਰਨਾਂ ਵਾਰਡਾਂ ਵਾਂਗ ਪ੍ਰਤੀ ਵਾਰਡ 20 ਲੱਖ ਰੁਪਏ ਵਿਕਾਸ ਕਾਰਜਾਂ ਲਈ ਕਿਉਂ ਨਹੀਂ ਰੱਖਿਆ ਗਿਆ | ਬੀਬੀ ਹਰਮਨ ਨੇ ਇੱਕ ਕੌਂਸਲਰ ਪਰਮਿੰਦਰ ਸਿੰਘ ਪਿੰਕੀ ਉੱਪਰ ਉਨ੍ਹਾਂ ਨਾਲ ਅਭੱਦਰ ਵਿਵਹਾਰ ਕਰਨ ਦਾ ਦੋਸ਼ ਲਗਾਉਂਦਿਆਂ ਕਿਹਾ ਕਿ ਇਸ ਕੌਂਸਲਰ ਨੂੰ ਇੱਕ ਮਹਿਲਾ ਕੌਂਸਲਰ ਨਾਲ ਗੱਲ ਕਰਨ ਦਾ ਵੀ ਇਲਮ ਨਹੀ ਹੈ | ਦੂਜੇ ਪਾਸੇ ਮੀਟਿੰਗ ਉਪਰੰਤ ਰੀਕੋਜਿਸਨ ਮੀਟਿੰਗ ਬੁਲਾਉਣ ਵਾਲੇ ਆਜ਼ਾਦ ਅਤੇ 'ਆਪ' ਦੇ ਬਾਗ਼ੀ ਕੌਂਸਲਰ ਜਿਨ੍ਹਾਂ ਵਿਚ ਨਗਰ ਕੌਂਸਲ ਦੀ ਸੀਨੀਅਰ ਮੀਤ ਪ੍ਰਧਾਨ ਪ੍ਰੀਤ ਜੈਨ, ਮੀਤ ਪ੍ਰਧਾਨ ਕਿ੍ਸ਼ਨ ਲਾਲ ਵਿੱਕੀ, ਪ੍ਰਦੀਪ ਪੁਰੀ ਪੱਪੂ, ਪਰਮਿੰਦਰ ਸਿੰਘ ਪਿੰਕੀ, ਗੁਰਦੀਪ ਕੌਰ, ਜਗਜੀਤ ਸਿੰਘ ਕਾਲਾ, ਹਰਪ੍ਰੀਤ ਸਿੰਘ ਸੇਖੋਂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਕਾਂਗਰਸ ਦੇ 9 ਕੌਂਸਲਰਾਂ, ਭਾਜਪਾ ਦੇ ਕੌਂਸਲਰ ਸਮੇਤ ਆਜ਼ਾਦ ਕੌਂਸਲਰ ਬੀਬੀ ਜਸਵੀਰ ਕੌਰ ਢਿੱਲੋਂ ਅਤੇ ਵਿਜੈ ਲੰਕੇਸ਼ ਦੀ ਮਦਦ ਨਾਲ ਹਾਊਸ ਦੀ ਮੀਟਿੰਗ ਵਿਚ ਵਿਚਾਰ ਜਾਣ ਵਾਲੇ 7 ਏਜੰਡਿਆਂ ਨੂੰ ਅੱਜ ਪਾਸ ਕਰਵਾ ਲਿਆ ਹੈ | ਚਾਰ ਵਾਰਡਾਂ ਨੂੰ ਇਨ੍ਹਾਂ ਏਜੰਡਿਆਂ ਦੀ ਫਰਿਸ਼ਤ ਵਿਚ ਸ਼ਾਮਲ ਨਾ ਕਰਨ ਸਬੰਧੀ ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਅਤੇ ਉਨ੍ਹਾਂ ਦੇ ਸਾਥੀ ਹਾਊਸ ਦੀ ਅਗਲੀ ਮੀਟਿੰਗ ਆਪਣੇ ਵਾਰਡਾਂ ਦੇ ਵਿਕਾਸ ਕਾਰਜਾਂ ਨੂੰ ਪਾਸ ਕਰਵਾ ਲੈਣ | ਫ਼ਿਲਹਾਲ ਪਿਛਲੇ ਇੱਕ ਸਾਲ ਤੋਂ ਉਨ੍ਹਾਂ ਦੇ ਵਾਰਡਾਂ ਵਿਚ ਵਿਕਾਸ ਕਾਰਜ ਪੂਰੀ ਤਰ੍ਹਾਂ ਰੁਕੇ ਪਏ ਸਨ ਜਿਸ ਕਾਰਨ ਉਨ੍ਹਾਂ ਨੂੰ ਰੀਕੋਜਿਸਨ ਮੀਟਿੰਗ ਬੁਲਾ ਕੇ ਏਜੰਡਿਆਂ ਨੂੰ ਪਾਸ ਕਰਵਾਉਣਾ ਪਿਆ ਹੈ | ਉਨ੍ਹਾਂ ਇਹ ਵੀ ਰੋਸ ਜਤਾਇਆ ਕਿ ਪ੍ਰਧਾਨ ਨਗਰ ਕੌਂਸਲ ਨੂੰ ਵਾਰ-ਵਾਰ ਕਹਿਣ ਉਪਰੰਤ ਵੀ ਉਹ ਮੀਟਿੰਗ ਬੁਲਾਉਣ ਤੋਂ ਭੱਜ ਰਹੇ ਸਨ | ਜਦ ਕਿ ਦੂਜੇ ਪਾਸੇ ਪ੍ਰਧਾਨ ਨਗਰ ਕੌਂਸਲ ਭੁਪਿੰਦਰ ਸਿੰਘ ਨਹਿਲ ਨੇ ਕਿਹਾ ਕਿ ਉਨ੍ਹਾਂ ਬਿਨਾਂ ਕਿਸੇ ਭੇਦ ਭਾਵ ਤੋਂ ਸੰਗਰੂਰ ਦੇ ਸਾਰੇ ਵਾਰਡਾਂ ਲਈ ਵਿਕਾਸ ਕਾਰਜ ਕਰਵਾਉਣ ਦਾ ਤਹੱਈਆ ਕੀਤਾ ਹੈ ਅਤੇ ਉਹ ਇਹ ਕੰਮ ਕਰ ਵੀ ਰਹੇ ਹਨ | ਉਨ੍ਹਾਂ ਕਿਹਾ ਕਿ ਆਪ ਦੇ ਬਾਗ਼ੀ ਕੌਂਸਲਰ ਦੀ ਕਾਰਵਾਈ ਨੂੰ ਉਹ ਹਾਈ ਕਮਾਨ ਦੇ ਸਨਮੁੱਖ ਰਹੇ ਹਨ ਅਤੇ ਉਨ੍ਹਾਂ ਉੱਪਰ ਪਾਰਟੀ ਵਿਰੋਧੀ ਕਰਵਾਈਆਂ ਕਰਨ ਦੀ ਸ਼ਿਕਾਇਤ ਵੀ ਕਰਨਗੇ |
ਮਹਿਲਾ ਕੌਂਸਲਰ ਨੇ ਬੀਬੀ ਹਰਮਨ ਦੇ ਦੋਸ਼ਾਂ ਨੂੰ ਨਕਾਰਿਆ
- ਕਾਂਗਰਸ ਦੀ ਮਹਿਲਾ ਕੌਂਸਲਰ ਬੀਬੀ ਬਲਵੀਰ ਕੌਰ ਸੈਣੀ, ਸੀਨੀਅਰ ਮੀਤ ਪ੍ਰਧਾਨ ਨਗਰ ਕੌਂਸਲ ਬੀਬੀ ਪ੍ਰੀਤ ਜੈਨ ਸਮੇਤ ਹੋਰ ਕੌਂਸਲਰਾਂ ਨੇ ਹਾਊਸ ਦੀ ਮੀਟਿੰਗ ਦੌਰਾਨ ਕੌਂਸਲਰ ਪਰਮਿੰਦਰ ਸਿੰਘ ਪਿੰਕੀ ਉੱਪਰ ਕੌਂਸਲਰ ਬੀਬੀ ਹਰਮਨ ਦੇ ਲਗਾਏ ਦੋਸ਼ਾਂ ਨੂੰ ਨਕਾਰਦਿਆਂ ਕਿਹਾ ਕਿ ਮੀਟਿੰਗ ਦੌਰਾਨ ਮਾੜਾ ਵਿਵਹਾਰ ਪਿੰਕੀ ਨੇ ਨਹੀਂ ਬਲਕਿ ਖ਼ੁਦਾ ਬੀਬੀ ਹਰਮਨ ਨੇ ਕੀਤਾ ਹੈ | ਉਨ੍ਹਾਂ ਦਾਅਵਾ ਕੀਤਾ ਕਿ ਪਿੰਕੀ ਦਾ ਵਤੀਰਾ ਹਮੇਸ਼ਾ ਸਤਿਕਾਰ ਵਾਲਾ ਮਹਿਲਾ ਕੌਂਸਲਰ ਪ੍ਰਤੀ ਰਿਹਾ ਹੈ ਜਿਸ ਕਾਰਨ ਉਹ ਪਿੰਕੀ ਦੀ ਸ਼ਲਾਘਾ ਕਰਦੀਆਂ ਹਨ |
ਪੰਜਾਬ ਪ੍ਰਦੂਸ਼ਣ ਬੋਰਡ ਵਲੋਂ 84 ਲੱਖ ਦੇ ਜੁਰਮਾਨੇ ਦਾ ਮੁੱਦਾ ਵੀ ਛਾਇਆ
- ਹਾਊਸ ਦੀ ਮੀਟਿੰਗ ਵਿਚ ਕਾਂਗਰਸ ਦੇ ਕੌਂਸਲਰ ਨੱਥੂ ਲਾਲ ਢੀਂਗਰਾ, ਮਨੀ ਕਥੂਰੀਆ, ਜੋਤੀ ਗਾਬਾ, ਬੀਬੀ ਜਸਵੀਰ ਕੌਰ ਢਿੱਲੋਂ, ਵਿਜੈ ਲੰਕੇਸ਼ ਸਮੇਤ ਹੋਰ ਕੌਂਸਲਰਾਂ ਨੇ ਪ੍ਰਦੂਸ਼ਣ ਬੋਰਡ ਵਲੋ ਨਗਰ ਕੌਂਸਲ ਨੂੰ 84 ਲੱਖ ਦਾ ਜੁਰਮਾਨਾ ਕਰਨ ਦਾ ਮੁੱਦਾ ਚਰਚਾ ਵਿਚ ਰਿਹਾ | ਮੀਟਿੰਗ ਉਪਰੰਤ ਨਗਰ ਕੌਂਸਲ ਪ੍ਰਧਾਨ ਭੁਪਿੰਦਰ ਸਿੰਘ ਨਹਿਲ ਨੇ ਕਿਹਾ ਕਿ ਕਮੇਟੀ ਨੂੰ ਅਜੇ ਤੱਕ ਅਜਿਹਾ ਕੋਈ ਨੋਟਿਸ ਨਹੀ ਮਿਲਿਆ, ਇਸ ਸਬੰਧੀ ਕੇਵਲ ਅਖ਼ਬਾਰਾਂ ਜਾ ਮੀਡੀਆ ਦੇ ਮਾਧਿਅਮ ਤੋਂ ਹੀ ਉਨ੍ਹਾਂ ਨੂੰ ਪਤਾ ਲੱਗਿਆ ਹੈ |
ਪੁਰਾਣੀ ਮੰਡੀ ਗਲੀ ਦੇ ਬੰਦ ਗੇਟ ਖੁਲ੍ਹਵਾਉਣ ਜਾ ਉਸ ਦੀ ਮੁਰੰਮਤ ਕਰਵਾਉਣ ਦੀ ਹੋਈ ਚਰਚਾਂ
- ਹਾਊਸ ਦੀ ਮੀਟਿੰਗ ਉਪਰੰਤ ਪੁਰਾਣੀ ਮੰਡੀ ਗਲੀ ਦੇ ਬਾਜ਼ਾਰ ਨਾਲ ਸਬੰਧਿਤ ਦੁਕਾਨਦਾਰ ਪ੍ਰਧਾਨ ਈ.ਓ., ਸਮੇਤ ਹੋਰ ਕੌਂਸਲਰਾਂ ਨੂੰ ਮਿਲੇ | ਦੁਕਾਨਦਾਰਾਂ ਦੀ ਪ੍ਰਤੀਨਿਧਤਾ ਕਰ ਰਹੇ ਮਨੀ ਕਥੂਰੀਆ, ਜੋਤੀ ਗਾਬਾ, ਬੀਬੀ ਬਲਵੀਰ ਕੌਰ ਸੈਣੀ, ਨੱਥੂ ਲਾਲ ਢੀਂਗਰਾ, ਜਗਜੀਤ ਸਿੰਘ ਕਾਲਾ, ਪ੍ਰਦੀਪ ਪੁਰੀ ਨੇ ਕਿਹਾ ਕਿ ਮੰਡੀ ਦਾ ਬੰਦ ਕੀਤਾ ਗੇਟ ਤੁਰੰਤ ਖੋਲਿ੍ਹਆ ਜਾਵੇ ਕਿਉਂਕਿ ਇਸ ਨਾਲ ਦੁਕਾਨਦਾਰਾਂ ਦਾ ਕੰਮ ਪ੍ਰਭਾਵਿਤ ਹੋ ਰਿਹਾ ਹੈ | ਕਾਰਜਸਾਧਕ ਅਫ਼ਸਰ ਦਾ ਤਰਕ ਸੀ ਕਿ ਗੇਟ ਸੁਰੱਖਿਅਤ ਨਹੀਂ ਹੈ ਇਸ ਲਈ ਬੰਦ ਕੀਤਾ ਗਿਆ ਹੈ ਤਾਂ ਕੌਂਸਲਰਾਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਇਹ ਵਿਰਾਸਤੀ ਦਰਵਾਜ਼ਾ ਹੈ ਇਸ ਲਈ ਇਸ ਨੂੰ ਮੁਰੰਮਤ ਕਰਵਾ ਕੇ ਬਚਾਇਆ ਜਾਵੇ |

Ad Position 22
No active advertisement
ਪਿਛਲੀ ਖ਼ਬਰ ਮਲੇਰਕੋਟਲਾ ਦੇ ਵਿਧਾਇਕ ਡਾ. ਰਹਿਮਾਨ ਨੇ ਮੁੱਖ ਦਫ਼ਤਰ ਵਿਖੇ ਸਥਾਨਕ ਵਾਸੀਆਂ ਦੀਆਂ ਸਮੱਸਿਆਵਾਂ ਸੁਣੀਆਂ ਅਗਲੀ ਖ਼ਬਰ ਮਜ਼ਦੂਰ ਆਗੂ ਮੁਕੇਸ਼ ਮਲੌਦ ਦੀ ਗਿ੍ਫ਼ਤਾਰੀ ਖ਼ਿਲਾਫ਼ ਪੰਜਾਬ ਸਰਕਾਰ ਦੀ ਅਰਥੀ ਫੂਕੀ <br/>
Ad Position 24