ਫ਼ਿਰੋਜ਼ਪੁਰ, 2 ਜੁਲਾਈ (ਰਾਕੇਸ਼ ਚਾਵਲਾ)-ਰੱਖੜੀ ਦੇ ਪਵਿੱਤਰ ਤਿਉਹਾਰ ਦੇ ਮੱਦੇਨਜ਼ਰ ਭੈਣਾਂ ਦੀ ਸਹੂਲਤ ਲਈ ਇਕ ਅਹਿਮ ਫ਼ੈਸਲਾ ਲਿਆ ਗਿਆ ਹੈ। ਰੱਖੜੀ ਦੇ ਤਿਉਹਾਰ ਨੂੰ ਧਿਆਨ ਵਿਚ ਰੱਖਦਿਆਂ ਫ਼ਿਰੋਜ਼ਪੁਰ ਡਾਕ ਮੰਡਲ ਦੇ ਅਧੀਨ ਆਉਂਦੇ ਕੁੱਝ ਚੁਣੇ ਹੋਏ ਪੋਸਟ ਆਫ਼ਿਸ ਹੁਣ ਐਤਵਾਰ ਅਤੇ ਹੋਰ ਸਰਕਾਰੀ ਛੁੱਟੀਆਂ ਵਾਲੇ ਦਿਨਾਂ ਵਿਚ ਵੀ ਖੁੱਲ੍ਹੇ ਰਹਿਣਗੇ। ਫ਼ਿਰੋਜ਼ਪੁਰ ਡਾਕ ਮੰਡਲ ਦੇ ਸੁਪਰਡੈਂਟ ਆਫ਼ ਪੋਸਟ ਆਫ਼ਿਸ ਰਵੀ ਕੁਮਾਰ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ 15 ਜੁਲਾਈ ਤੋਂ 28 ਅਗਸਤ ਤੱਕ, ਰੱਖੜੀ ਦੇ ਤਿਉਹਾਰ ਦੇ ਸਬੰਧ ਵਿਚ ਸਾਰੇ ਐਤਵਾਰਾਂ ਅਤੇ ਸਰਕਾਰੀ ਛੁੱਟੀਆਂ ਵਾਲੇ ਦਿਨਾਂ ਵਿਚ ਕੁੱਝ ਵਿਸ਼ੇਸ਼ ਪੋਸਟ ਆਫ਼ਿਸਾਂ ਦੇ ਡਾਕ ਬੁਕਿੰਗ ਕਾਊਂਟਰ ਸਵੇਰੇ 9 ਵਜੇ ਤੋਂ ਸ਼ਾਮ 4.30 ਵਜੇ ਤੱਕ ਕੰਮ ਕਰਨਗੇ। ਇਸ ਵਿਸ਼ੇਸ਼ ਪ੍ਰਬੰਧ ਤਹਿਤ ਫ਼ਿਰੋਜ਼ਪੁਰ ਪ੍ਰਧਾਨ ਡਾਕਘਰ, ਫ਼ਿਰੋਜ਼ਪੁਰ ਸ਼ਹਿਰ ਉਪ ਡਾਕਘਰ, ਜ਼ੀਰਾ ਉਪ ਡਾਕਘਰ, ਜਲਾਲਾਬਾਦ (ਪੱਛਮ) ਉਪ ਡਾਕਘਰ, ਫ਼ਾਜ਼ਿਲਕਾ ਉਪ ਡਾਕਘਰ ਅਤੇ ਅਬੋਹਰ ਉਪ ਡਾਕਘਰ ਸ਼ਾਮਿਲ ਹਨ। ਰਵੀ ਕੁਮਾਰ ਨੇ ਕਿਹਾ ਕਿ ਡਾਕ ਬੁਕਿੰਗ ਵਿਚ ਲੋਕਾਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਦਿੱਕਤ ਨਾ ਆਵੇ, ਇਸ ਲਈ ਵਿਸ਼ੇਸ਼ ਇੰਤਜ਼ਾਮ ਕੀਤੇ ਗਏ ਹਨ। ਇਸ ਸਮੇਂ ਦੌਰਾਨ ਕਾਊਂਟਰਾਂ ’ਤੇ ਆਧਾਰ ਸੇਵਾਵਾਂ ਦੀ ਸੁਵਿਧਾ ਦੇ ਨਾਲ-ਨਾਲ ਰਾਖੀ ਭੇਜਣ ਲਈ ਵਿਸ਼ੇਸ਼ ਪੈਕਿੰਗ ਸਮਗਰੀ (ਰਾਖੀ ਬਾਕਸ ਅਤੇ ਰਾਖੀ ਲਿਫ਼ਾਫ਼ੇ) ਵੀ ਉਪਲਬਧ ਹੋਣਗੇ।
