ਮੱਖੂ, 13 ਜੁਲਾਈ (ਵਰਿੰਦਰ ਮਨਚੰਦਾ)-ਸਥਾਨਕ ਮੱਖੂ ਦੇ ਰੇਲਵੇ ਫਾਟਕ ਸੀ-84 (ਨੇੜੇ ਬਰਫ਼ ਕਾਰਖ਼ਾਨਾ) ਜੋ ਕਿ 6 ਜੁਲਾਈ ਤੋਂ ਲੈ ਕੇ ਅੱਜ ਤੱਕ ਰੇਲਵੇ ਸਟੇਸ਼ਨ ਮੱਖੂ ਵਲੋਂ ਪੂਰਨ ਤੌਰ ’ਤੇ ਬੰਦ ਕੀਤਾ ਗਿਆ ਹੈ, ਨੂੰ ਖੁਲ੍ਹਵਾਉਣ ਲਈ ਐਨ.ਜੀ.ਓ. ਬਲਾਕ ਪ੍ਰਧਾਨ ਅਤੇ ਉੱਘੇ ਸਮਾਜ ਸੇਵਕ ਸੰਜੀਵ ਅਹੂਜਾ ਦੀ ਰਹਿਨੁਮਾਈ ਹੇਠ ਇਕ ਵਫ਼ਦ ਸਟੇਸ਼ਨ ਸੁਪਰਵਾਈਜ਼ਰ (ਐੱਸ.ਐੱਸ.) ਰੇਲਵੇ ਨੂੰ ਵਿਸ਼ੇਸ਼ ਤੌਰ ’ਤੇ ਮਿਲਿਆ। ਇਸ ਦੌਰਾਨ ਵਫ਼ਦ ਵਲੋਂ ਰਾਹਗੀਰਾਂ ਅਤੇ ਸ਼ਹਿਰ ਨਿਵਾਸੀਆਂ ਦੀਆਂ ਮੁਸ਼ਕਲਾਂ ਨੂੰ ਸਾਹਮਣੇ ਰੱਖਦਿਆਂ ਦੱਸਿਆ ਕਿ ਰੇਲਵੇ ਨੂੰ ਕਰਾਸਿੰਗ ਕਰਕੇ ਕਾਰੋਬਾਰ ਹੱਬ, ਬਾਜ਼ਾਰ, ਸਕੂਲ, ਦਫ਼ਤਰ ਅਤੇ ਹੋਰ ਅਦਾਰੇ ਹਨ, ਜਿੱਥੇ ਲੋਕਾਂ ਦਾ ਪ੍ਰਤੀ ਦਿਨ ਆਉਣਾ-ਜਾਣਾ ਲੱਗਾ ਰਹਿੰਦਾ ਹੈ। ਵਫ਼ਦ ਵਲੋਂ ਸਟੇਸ਼ਨ ਸੁਪਰਵਾਈਜ਼ਰ ਨੂੰ ਇਕ ਮੰਗ ਪੱਤਰ ਵੀ ਦਿੱਤਾ ਗਿਆ। ਇਸ ਮੌਕੇ ਐੱਸ.ਐੱਸ. ਮੱਖੂ ਨੇ ਵਫ਼ਦ ਨੂੰ ਭਰੋਸਾ ਦਿਵਾਇਆਂ ਕਿ ਉਹ ਅੱਗੇ ਇਹ ਮੰਗ ਪੱਤਰ ਉੱਚ ਅਧਿਕਾਰੀਆਂ ਨੂੰ ਭੇਜ ਕੇ ਸ਼ਹਿਰ ਦਾ ਮਸਲਾ ਹੱਲ ਕਰਵਾ ਦੇਣਗੇ। ਵਫ਼ਦ ਨੇ ਮੰਗ ਕੀਤੀ ਕਿ ਲੋਕਾਂ ਦੀਆਂ ਮੁਸ਼ਕਲਾਂ ਨੂੰ ਦੇਖਦੇ ਹੋਏ ਇਹ ਫਾਟਕ ਹਰ ਹਾਲਤ ਵਿਚ ਖੋਲ੍ਹ ਦਿੱਤਾ ਜਾਵੇ, ਜੇਕਰ ਕੋਈ ਕੰਮ ਰੇਲਵੇ ਦਾ ਬਕਾਇਆ ਹੈ ਤਾਂ ਉਹ ਰਾਤ ਨੂੰ ਕੀਤਾ ਜਾਵੇ ਅਤੇ ਦਿਨ ਸਮੇਂ ਇਸ ਟਰੈਫ਼ਿਕ ਨੂੰ ਨਿਰੰਤਰ ਬਹਾਲ ਕੀਤਾ ਜਾਵੇ। ਇਸ ਮੌਕੇ ਸਮਾਜ ਸੇਵੀ ਸਤੀਸ਼ ਕਟਾਰੀਆ, ਪ੍ਰੇਮ ਗਰੋਵਰ, ਸ਼ਾਮ ਛਾਬੜਾ, ਬੱਬਲੂ ਸਚਦੇਵਾ, ਬੱਬੂ ਨਾਰੰਗ ਆਦਿ ਹਾਜ਼ਰ ਸਨ
