ਸੀਂਗੋ ਮੰਡੀ, 24 ਫਰਵਰੀ (ਪਿ੍ੰਸ ਗਰਗ)-ਪੁਲਿਸ ਚੌਕੀ ਸੀਂਗੋ ਵਿਖੇ ਤੈਨਾਤ ਮੁਲਾਜ਼ਮ ਬੇਅੰਤ ਸਿੰਘ ਨੂੰ ਤਲਵੰਡੀ ਸਾਬੋ ਟਰੈਕਟਰ ਮੰਡੀ ਕੋਲ ਡਿਊਟੀ ਜਾਣ ਸਮੇਂ ਇਕ ਡਿੱਗਿਆ ਹੋਇਆ ਪਰਸ ਮਿਲਿਆ | ਜਿਸ ਨੂੰ ਚੁੱਕ ਕੇ ਉਨ੍ਹਾਂ ਇਸ ਪਰਸ ਦੇ ਅਸਲ ਮਾਲਕ ਨੂੰ ਲੱਭ ਕੇ ਉਸ ਦੇ ਹਵਾਲੇ ਕੀਤਾ | ਇਸ ਪਰਸ ਵਿਚ ਕੁਝ ਨਗਦੀ, ਏ. ਟੀ. ਐਮ., ਪੈਨ ਕਾਰਡ, ਡਰਾਇਵਿੰਗ ਲਾਈਸੈਂਸ ਤੇ ਹੋਰ ਜ਼ਰੂਰੀ ਡਾਕੂਮੈਂਟ ਆਦਿ ਮੌਜੂਦ ਸਨ | ਪਰਸ ਵਿਚ ਮਿਲੇ ਆਧਾਰ ਕਾਰਡ ਅਤੇ ਹੋਰ ਡਾਕੂਮੈਂਟ ਤੋਂ ਪਰਸ ਦੇ ਮਾਲਕ ਗੱਬਰ ਸਿੰਘ ਵਾਸੀ ਕੋਰੇਆਣਾ ਦੀ ਪਛਾਣ ਹੋਈ | ਮੁਲਾਜ਼ਮ ਵਲੋਂ ਉਸ ਨੂੰ ਬੁਲਾ ਕੇ ਉਨ੍ਹਾਂ ਦਾ ਪਰਸ ਵਾਪਸ ਕਰ ਦਿੱਤਾ, ਜਿਸ ਨਾਲ ਆਮ ਲੋਕਾਂ ਵਿਚ ਪੁਲਿਸ ਮੁਲਾਜ਼ਮ ਬੇਅੰਤ ਸਿੰਘ ਵਲੋਂ ਦਿਖਾਈ ਇਮਾਨਦਾਰੀ ਬਾਰੇ ਖੂਬ ਪ੍ਰਸੰਸਾ ਹੋ ਰਹੀ ਹੈ | ਪਰਸ ਦੇ ਮਾਲਕ ਗੱਬਰ ਸਿੰਘ ਵਲੋਂ ਪੁਲਿਸ ਮੁਲਾਜ਼ਮ ਬੇਅੰਤ ਦਾ ਧੰਨਵਾਦ ਕੀਤਾ ਗਿਆ |
