ਕੋਟਫੱਤਾ, 8 ਅਪ੍ਰੈਲ (ਰਣਜੀਤ ਸਿੰਘ ਬੁੱਟਰ)-ਬੀਤੀ ਰਾਤ ਇਕ ਵਾਰ ਫੇਰ ਹੋਈ ਮੋਹਲੇਧਰ ਬਾਰਿਸ਼ ਤੇ ਭਾਰੀ ਗੜੇਮਾਰੀ ਨੇ ਕਿਸਾਨ ਦੇ ਬਚੇ ਖੁਚੇ ਸਾਹ ਵੀ ਸੂਤ ਲਏ ਤੇ ਰਾਤ 11 ਵਜੇ ਡਿੱਗੇ ਗੜਿਆਂ ਤੇ ਮੀਂਹ ਨੇ ਕਿਸਾਨਾਂ ਦੀ ਨੀਂਦ ਹਰਾਮ ਕਰ ਦਿੱਤੀ | ਕੋਟਫੱਤਾ ਸਰਕਲ ਦੇ ਪਿੰਡਾਂ ਕੋਟਫੱਤਾ, ਕੋਟਸ਼ਮੀਰ, ਕੋਟਭਾਰਾ, ਧੰਨ ਸਿੰਘ ਖਾਨਾ, ਗਹਿਰੀ ਭਾਗੀ, ਜੱਸੀ ਪੌ ਵਾਲੀ, ਕਟਾਰ ਸਿੰਘ ਵਾਲਾ, ਗੁਲਾਬਗੜ੍ਹ, ਭਾਗੂ, ਫੂਸਮੰਡੀ ਤੇ ਜੋਧਪੁਰ ਰੋਮਾਣਾ ਵਿਚ ਕਣਕ ਦੀ ਪੱਕੀ ਖੜੀ ਫ਼ਸਲ 30 ਤੋਂ 50 ਪ੍ਰਤੀਸ਼ਤ ਨੁਕਸਾਨੇ ਜਾਣ ਦੀ ਉਮੀਦ ਹੈ | ਅਜੇ ਤੱਕ ਭਾਰਤੀ ਮੌਸਮ ਵਿਭਾਗ ਅਨੁਸਾਰ ਅਗਲੇ 24 ਤੋਂ 48 ਘੰਟਿਆਂ ਤੱਕ ਮੌਸਮ ਕਿਸਾਨਾਂ 'ਤੇ ਹੋਰ ਭਾਰੀ ਪੈ ਸਕਦਾ ਹੈ | ਕਈ ਥਾਂ ਕਣਕਾਂ ਬੁਰੀ ਤਰ੍ਹਾਂ ਧਰਤੀ 'ਤੇ ਵਿਛ ਗਈਆਂ, ਜਿਸ ਨਾਲ ਝਾੜ 'ਤੇ ਵੱਡਾ ਅਸਰ ਪੈਣ ਦੀ ਸੰਭਾਵਨਾ ਹੈ | ਭਾਵੇਂ ਇੱਕਾ-ਦੱੁਕਾ ਕਿਸਾਨਾਂ ਨੇ ਕੁਦਰਤੀ ਕਰੋਪੀ ਦੇ ਚੱਲਦਿਆਂ ਕਣਕ ਦੀ ਫ਼ਸਲ ਦੀ ਕਟਾਈ ਕਰਕੇ ਦਾਣੇ ਮੰਡੀ 'ਚ ਲਿਆ ਢੇਰੀ ਕਰ ਦਿੱਤੇ ਪਰ ਬਹੁਤੀਆਂ ਮੰਡੀਆਂ ਵਿਚ ਵੀ ਇਸ ਵਰ੍ਹਦੇ ਮੀਂਹ ਵਿਚ ਕਣਕ ਦੀ ਫ਼ਸਲ ਨੂੰ ਨੁਕਸਾਨ ਪੁੱਜਣ ਤੋਂ ਬਚਾਇਆ ਨਹੀਂ ਜਾ ਸਕਦੇ | ਖੇਤਰ ਦੇ ਕਿਸਾਨ ਆਗੂਆਂ ਜਸਵੀਰ ਸਿੰਘ ਗਹਿਰੀ ਭਾਗੀ, ਬੂਟਾ ਸਿੰਘ ਗਹਿਰੀ ਭਾਗੀ, ਰਾਜ ਮਹਿੰਦਰ ਸਿੰਘ ਕੋਟਭਾਰਾ, ਜਗਜੀਤ ਸਿੰਘ ਕੋਟਸ਼ਮੀਰ ਤੇ ਕੁਲਦੀਪ ਸਿੰਘ ਕੋਟਸ਼ਮੀਰ ਨੇ ਦੱਸਿਆ ਕਿ ਜਿਨ੍ਹਾਂ ਕਿਸਾਨਾਂ ਨੇ ਜ਼ਮੀਨ ਠੇਕੇ ਤੇ ਲੈ ਕੇ ਫ਼ਸਲ ਬੀਜੀ ਸੀ, ਉਹ ਕਿਸਾਨ ਅਸਲੋਂ ਹੀ ਕੱਖੋਂ ਹੌਲੇ ਹੋ ਗਏ ਹਨ | ਕਿਸਾਨ ਆਗੂਆਂ ਨੇ ਮੰਗ ਕੀਤੀ ਹੈ ਕਿ ਪੰਜਾਬ ਸਰਕਾਰ ਤੁਰੰਤ ਨੁਕਸਾਨੀਆਂ ਫ਼ਸਲਾਂ ਦੀ ਗਿਰਦਾਵਰੀ ਕਰਵਾ ਕੇ ਕਿਸਾਨਾਂ ਨੂੰ ਤੁਰੰਤ ਬਣਦਾ ਮੁਆਵਜ਼ਾ ਦੇਵੇ |
