ਮੁੱਲਾਂਪੁਰ-ਦਾਖਾ ਸ਼ਹਿਰ 'ਚ ਟ੍ਰੈਫ਼ਿਕ ਸਮੱਸਿਆ ਦੇ ਹੱਲ ਤੇ ਨਾਜਾਇਜ਼ ਕਬਜ਼ੇ ਹਟਾਉਣ ਲਈ ਪ੍ਰਸ਼ਾਸਨ ਚੁੱਪ ਕਿਉਂ!

ਅ

ਅਜੀਤ ਡੈਸਕ 29-01-2026

ਮੁੱਲਾਂਪੁਰ-ਦਾਖਾ, 28 ਜਨਵਰੀ (ਨਿਰਮਲ ਸਿੰਘ ਧਾਲੀਵਾਲ)-ਨਗਰ ਕੌਂਸਲ ਮੁੱਲਾਂਪੁਰ ਦਾਖਾ ਦੀ ਹਦੂਦ 'ਚੋਂ ਗੁਜ਼ਰਦੀ ਰਾਏਕੋਟ ਰਾਜ ਮਾਰਗ ਅਤੇ ਲੁਧਿਆਣਾ ਨੈਸ਼ਨਲ ਹਾਈਵੇ ਦੀਆਂ ਸ਼ਹਿਰ 'ਚ ਸਰਵਿਸ ਲੇਨ ਸੜਕਾਂ 'ਤੇ ਨਿੱਤ ਦਿਨ ਲੱਗ ਰਿਹਾ ਜਾਮ ਵਿਆਹਾਂ ਅਤੇ ਤਿਉਹਾਰਾਂ ਦੇ ਦਿਨਾਂ 'ਚ ਦੂਰ ਨੇੜੇ ਜਾਣ ਵਾਲੇ ਰਾਹਗੀਰਾਂ ਲਈ ਜੀਅ ਦਾ ਜੰਜਾਲ ਬਣਿਆ ਪਿਆ | ਪੰਜਾਬ ਦੇ 8 ਜ਼ਿਲਿ੍ਹਆਂ ਅਤੇ ਭਾਰਤ ਦੇ 3 ਰਾਜਾਂ ਪੰਜਾਬ, ਹਰਿਆਣਾ, ਰਾਜਸਥਾਨ ਦੀ ਸੜਕੀ ਆਵਾਜਾਈ ਨਾਲ ਜੁੜਦੇ ਮੁੱਲਾਂਪੁਰ-ਦਾਖਾ ਕਸਬੇ ਅੰਦਰ ਜਾਮ ਵਿਚ ਫਸੇ ਚੰਗੇ ਭਲੇ ਰਾਹਗੀਰਾਂ ਦੇ ਮੂੰਹੋਂ ਮੱਲੋ-ਜੋਰੀ ਵਾਹਿਗੁਰੂ-ਵਾਹਿਗੁਰੂ ਨਿਕਲਣ ਲੱਗ ਪੈਂਦਾ | ਮੰਡੀ ਮੁੱਲਾਂਪੁਰ ਰਾਏਕੋਟ ਰੋਡ ਉੱਪਰ ਨਿਰਮਾਣ ਅਧੀਨ ਅੰਤਰਰਾਸ਼ਟਰੀ ਹਵਾਈ ਅੱਡਾ ਅਤੇ ਭਾਰਤੀ ਹਵਾਈ ਫੌਜ਼ (ਏਅਰ ਫੋਰਸ) ਸਟੇਸ਼ਨ ਹੋਣ ਕਰਕੇ ਕੇਂਦਰ ਅਤੇ ਰਾਜਾਂ ਦੇ ਮੰਤਰੀ, ਫੌਜ਼ ਦੇ ਵੱਡੇ ਅਧਿਕਾਰੀ ਅਕਸਰ ਇਸ ਰੋਡ ਤੋਂ ਗੁਜ਼ਰਦੇ ਹਨ | ਅੱਜ ਹੀ ਕਿਸੇ ਆਲ੍ਹਾ ਅਧਿਕਾਰੀ ਵਲੋਂ ਹਲਵਾਰਾ ਹਵਾਈ ਅੱਡੇ ਤੋਂ ਸੜਕ ਸਫ਼ਰ ਇਸ ਜਾਮ ਵਾਲੇ ਰਸਤੇ ਨਿਕਲਣਾ ਸੀ, ਉਸ ਵਖਤ ਦਾਖਾ ਪੁਲਿਸ ਨੇ ਰਾਏਕੋਟ ਰੋਡ ਮੰਡੀ ਮੁੱਲਾਂਪੁਰ ਸੜਕੀ ਆਵਾਜਾਈ ਰੋਕ ਕੇ ਵੀ.ਆਈ.ਪੀ ਕਾਫ਼ਲੇ ਲਈ ਰਸਤਾ ਸਾਫ਼ ਕਰ ਰੱਖਿਆ | ਐੱਸ.ਐੱਚ.ਓ. ਸਾਹਿਬ ਖੁਦ ਟ੍ਰੈਫ਼ਿਕ ਕੰਟਰੋਲ ਲਈ ਹੇਠਲੇ ਅਧਿਕਾਰੀਆਂ ਨੂੰ ਆਦੇਸ਼ ਜਾਰੀ ਕਰਦੇ ਨਜ਼ਰ ਆਏ | ਬਾਅਦ 'ਚ ਸਥਿਤੀ ਜਿਉਂ ਦੀ ਤਿਉਂ ਬਣ ਗਈ, ਗੱਡੀਆਂ ਦੀ ਉਹੀ ਦੂਹਰੀ-ਤੀਹਰੀ ਲਾਈਨ!
ਸ਼ਹਿਰੀ ਸੜਕੀ ਆਵਾਜਾਈ ਵੱਸ ਵਿਚ ਹੋਊ ਕਿਵੇਂ!
ਬਹੁ-ਕਰੋੜੀ ਲਾਗਤ ਵਾਲੇ ਅਤਿ ਆਧੁਨਿਕ ਬੱਸ ਸਟੈਂਡ ਵਿਚ ਬੱਸਾਂ ਦੀ ਐਂਟਰੀ ਲਾਜ਼ਮੀ ਕੀਤੀ ਜਾਵੇ, ਮੁੱਖ ਚੌਂਕ 'ਚ ਬੱਸਾਂ ਰੋਕ ਕੇ ਸਵਾਰੀਆਂ ਚੁੱਕਣ ਵਾਲੀ ਬੱਸ ਨੂੰ ਟ੍ਰੈਫ਼ਿਕ ਨਿਯਮਾਂ ਦੀ ਉਲੰਘਣਾ ਹੇਠ ਭਾਰੀ ਜ਼ੁਰਮਾਨਾ ਹੋਵੇ | ਮਿੰਨੀ ਬੱਸਾਂ ਨੂੰ ਸ਼ਹਿਰ ਦੀਆਂ ਸਰਵਿਸ ਲੇਨ ਸੜਕਾਂ ਤੋਂ ਹਟਾ ਕੇ ਬੱਸ ਸਟੈਂਡ ਵਿਚ ਰੁਕਣ ਦਾ ਆਦੇਸ਼ ਹੋਵੇ | ਸਰਵਿਸ ਲੇਨ ਸੜਕਾਂ 'ਤੇ ਸਬਜ਼ੀ-ਫਰੂਟ ਫੜ੍ਹੀ ਵਾਲੇ ਨਾਜਾਇਜ਼ ਕਬਜ਼ਾਧਾਰਕਾਂ ਨੂੰ ਨਗਰ ਕੌਂਸਲ ਆਪਣੇ ਦਮ 'ਤੇ ਉਠਾਏ, ਕਿਉਂਕਿ ਇਹ ਕੰਮ ਨਗਰ ਕੌਂਸਲ ਅਧਿਕਾਰੀ ਦਾ ਹੈ, ਨਾ ਕਿ ਪੁਲਿਸ ਦਾ! ਰਾਏਕੋਟ ਰੋਡ ਜਾਂ ਸਰਵਿਸ ਲੇਨ ਹੋਰ ਸੜਕਾਂ 'ਤੇ ਦੁਕਾਨਦਾਰਾਂ ਵਲੋਂ ਦੁਕਾਨਾਂ ਸਾਹਮਣੇ ਨਾਜਾਇਜ਼ ਕਬਜ਼ੇ ਉਠਾ ਕੇ ਸੜਕੀ ਆਵਾਜਾਈ ਲਈ ਰਸਤਾ ਖੋਲਿ੍ਹਆ ਜਾ ਸਕਦਾ | ਮੰਡੀ ਮੁੱਲਾਂਪੁਰ ਮੁੱਖ ਚੌਂਕ ਤੋਂ ਰੇਲਵੇ ਪੁਲ ਤੱਕ ਸੜਕ ਵਿਚਕਾਰ ਰੇਲਿੰਗ (ਵਾੜ) ਵੀ ਸੜਕੀ ਆਵਾਜਾਈ ਨੂੰ ਬਹਾਲ ਰੱਖਣ 'ਚ ਸਹਾਈ ਬਣ ਸਕਦੀ ਹੈ | ਸ਼ਹਿਰ 'ਚ ਨਿੱਤ ਦਿਨ ਲੱਗ ਰਹੇ ਜਾਮ ਲਈ ਜ਼ਿੰਮੇਵਾਰ ਨਗਰ ਕੌਂਸਲ ਅਧਿਕਾਰੀ, ਮਾਰਕੀਟ ਕਮੇਟੀ ਕਰਮਚਾਰੀ, ਐੱਨ.ਐੱਚ.ਏ. ਮੁੱਢਲੇ ਰੂਪ 'ਚ ਜ਼ਿੰਮੇਵਾਰ ਹਨ, ਪਰ ਆਖਰ ਭਾਂਡਾ ਟ੍ਰੈਫ਼ਿਕ ਪੁਲਿਸ ਅਧਿਕਾਰੀਆਂ ਸਿਰ ਭੰਨਿਆ ਜਾਂਦਾ | ਵਧੀਕ ਡਿਪਟੀ ਕਮਿਸ਼ਨਰ (ਸ਼ਹਿਰੀ ਵਿਕਾਸ), ਐੱਸ.ਡੀ.ਐੱਮ (ਪੱਛਮੀ), ਡੀ.ਐੱਸ.ਪੀ ਦਾਖਾ ਪੁਲਿਸ ਸਬ ਡਵੀਜਨ, ਕਾਰਜ ਸਾਧਕ ਅਫ਼ਸਰ ਨਗਰ ਕੌਂਸਲ ਮੁੱਲਾਂਪੁਰ ਦਾਖਾ, ਜਨਰਲ ਮੈਨੇਜਰ ਪੰਜਾਬ ਰੋਡਵੇਜ, ਦਾਖਾ ਮਾਰਕੀਟ ਕਮੇਟੀ ਸੈਕਟਰੀ ਇਨ੍ਹਾਂ ਕੋਲ ਸਮਾਂ ਹੋਵੇ ਤਾਂ ਇਕ ਸਾਂਝੀ ਮੀਟਿੰਗ ਕਰਕੇ ਟ੍ਰੈਫ਼ਿਕ ਬਹਾਲੀ ਲਈ ਕੋਈ ਸਾਰਥਿਕ ਹੱਲ ਨਿਕਲ ਸਕਦਾ |

ਪਿਛਲੀ ਖ਼ਬਰ ਖੰਨਾ 'ਚ ਮਸ਼ਹੂਰ ਫ਼ੈਸ਼ਨ ਡਿਜ਼ਾਈਨਰ ਤੇ ਕੱਪੜਾ ਵਪਾਰੀ ਤੋਂ ਮੂੰਹ-ਬੋਲੇ ਭਰਾ ਨੇ ਹੀ ਮੰਗੀ ਸੀ ਫਿਰੌਤੀ ਅਗਲੀ ਖ਼ਬਰ ਗੁਰਦੁਆਰਾ ਸਤਿਗੁਰ ਰਵਿਦਾਸ ਭਗਤ ਜੀ ਰੋੜੀਆਂ ਵਲੋਂ ਨਗਰ ਕੀਰਤਨ ਸਜਾਇਆ

ਮੁੱਲਾਂਪੁਰ-ਦਾਖਾ ਸ਼ਹਿਰ 'ਚ ਟ੍ਰੈਫ਼ਿਕ ਸਮੱਸਿਆ ਦੇ ਹੱਲ ਤੇ ਨਾਜਾਇਜ਼ ਕਬਜ਼ੇ ਹਟਾਉਣ ਲਈ ਪ੍ਰਸ਼ਾਸਨ ਚੁੱਪ ਕਿਉਂ!

ਸੰਬੰਧਿਤ ਖ਼ਬਰਾਂ