ਬੀਜਾ, 2 ਜੂਨ (ਕਸ਼ਮੀਰਾ ਸਿੰਘ ਬਗ਼ਲੀ)-ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ, ਰੁਪਾਲੋਂ ਦੇ ਪਿ੍ੰਸੀਪਲ ਜੋਤੀ ਸ਼ਰਮਾ ਦੀ ਸੇਵਾ ਮੁਕਤੀ ਮੌਕੇ ਸਕੂਲ ਸਟਾਫ਼ ਵਲੋਂ ਸਮਾਗਮ ਕਰਵਾਇਆ ਗਿਆ | ਇਸ ਮੌਕੇ ਬੁਲਾਰਿਆਂ ਨੇ ਕਿਹਾ ਕਿ ਪਿ੍ੰਸੀਪਲ ਜੋਤੀ ਸ਼ਰਮਾ ਦੀ ਅਣਥੱਕ ਮਿਹਨਤ ਅਤੇ ਲਗਨ ਸਦਕਾ ਸਕੂਲ ਨੇ ਮਾਣਮੱਤੀਆਂ ਮੱਲਾਂ ਮਾਰੀਆਂ | ਉਨ੍ਹਾਂ ਦੇ ਕਾਰਜਕਾਲ ਦੌਰਾਨ ਹੀ ਸਕੂਲ ਸਮਾਰਟ ਸਕੂਲ ਤੋਂ ਪੀ. ਐੱਮ. ਸ੍ਰੀ ਸਕੂਲ ਬਣਿਆ ਅਤੇ ਸਕੂਲ ਵਿਖੇ ਨਵੀਂ ਬਾਇਓ ਲੈਬ ਅਤੇ ਫਿਜ਼ਿਕਸ ਲੈਬ ਦੀ ਉਸਾਰੀ ਹੋਈ | ਇਨ੍ਹਾਂ ਨੇ ਮਿਹਨਤ ਸਦਕਾ ਸਕੂਲ ਵਿਖੇ ਦੋ ਨਵੇਂ ਵਿਸ਼ੇ ਆਟੋਮੋਟਿਵ ਅਤੇ ਟੂਰਿਜ਼ਮ ਐਂਡ ਹੌਸਪੀਟੈਲਿਟੀ ਸ਼ੁਰੂ ਕੀਤੇ ਅਤੇ ਦੋਵਾਂ ਵਿਸ਼ਿਆਂ ਦੀਆਂ ਆਧੁਨਿਕ ਲੈਬਾਂ ਦੀ ਉਸਾਰੀ ਕਰਵਾਈ | ਪਿਛਲੇ ਕੁੱਝ ਸਮੇਂ ਵਿੱਚ ਹੀ ਇਲਾਕੇ ਦਾ ਇਹ ਸਕੂਲ ਪੇਂਡੂ ਵਿਦਿਆਰਥੀਆਂ ਲਈ ਚਾਨਣ ਮੁਨਾਰਾ ਬਣ ਕੇ ਉੱਭਰਿਆ ਹੈ | ਸੇਵਾ ਮੁਕਤੀ ਸਮੇਂ ਵਿਦਿਆਰਥੀਆਂ, ਸਮੂਹ ਸਕੂਲ ਸਟਾਫ਼ ਅਤੇ ਐੱਸ. ਐੱਮ. ਸੀ. ਮੈਬਰਾਂ ਅਤੇ ਇਲਾਕੇ ਦੇ ਪਤਵੰਤੇ ਸੱਜਣਾਂ ਨੇ ਜੋਤੀ ਸ਼ਰਮਾ ਨੂੰ ਭਾਵ ਭਿੰਨੀ ਵਿਦਾਇਗੀ ਦਿੱਤੀ ਅਤੇ ਉਨ੍ਹਾਂ ਦੇ ਸੁਹਿਰਦ ਉਪਰਾਲਿਆਂ ਲਈ ਧੰਨਵਾਦ ਕੀਤਾ |
