ਟੱਲੇਵਾਲ, 16 ਅਪੈ੍ਰਲ (ਸੋਨੀ ਚੀਮਾ)-'ਜਦੋਂ ਵਾੜ ਹੀ ਖੇਤ ਨੂੰ ਖਾਣ ਲੱਗ ਜਾਵੇ, ਤਾਂ ਰੱਬ ਹੀ ਰਾਖਾ ਹੈ' ਦੇ ਅਖਾਣ ਨੂੰ ਅੱਜ ਉਸ ਵੇਲੇ ਪੀ.ਆਰ.ਟੀ.ਸੀ ਦੇ ਕੰਡਕਟਰ ਨੇ ਸੱਚ ਕਰ ਦਿਖਾਇਆ ਜਦੋਂ ਨੇੜਲੇ ਪਿੰਡ ਰਾਮਗੜ੍ਹ ਦੇ ਬੱਸ ਅੱਡੇ ਰੁਕੀ ਬੱਸ 'ਚ ਕੰਡਕਟਰ ਨੇ ਸਵਾਰੀਆਂ ਨਾ ਚੜ੍ਹਨ ਦਿੱਤੀਆਂ, ਜਿਸ ਕਾਰਨ ਸਵਾਰੀਆਂ ਵਿਚ ਨਿਰਾਸ਼ਾ ਪੈਦਾ ਹੋ ਗਈ | ਰਾਜਿੰਦਰ ਸਿੰਘ ਵਾਸੀ ਭਦੌੜ ਨੇ ਦੱਸਿਆ ਕਿ ਉਹ ਰਾਮਗੜ੍ਹ ਵਿਖੇ ਆਪਣੇ ਭਤੀਜੇ ਅਤੇ ਉਸ ਦੇ ਦੋਸਤ ਨੂੰ ਸ੍ਰੀ ਅੰਮਿ੍ਤਸਰ ਵਾਲੀ ਬੱਸ ਚੜ੍ਹਾਉਣ ਲਈ ਆਇਆ ਸੀ, 3:18 'ਤੇ ਪੀ.ਆਰ.ਟੀ.ਸੀ ਦੀ ਬੱਸ ਨੰਬਰ ਪੀ.ਬੀ 13 ਬੀ.ਪੀ.ਸੀ 1330 ਰਾਮਗੜ੍ਹ ਬੱਸ ਸਟਾਪ 'ਤੇ ਆ ਕੇ ਰੁਕੀ ਤਾਂ 4 ਸਵਾਰੀਆਂ ਬੱਸ 'ਤੇ ਚੜ੍ਹਨ ਲੱਗੀਆਂ ਤਾਂ ਕੰਡਕਟਰ ਨੇ ਸਵਾਰੀਆਂ ਨੂੰ ਚੜ੍ਹਨ ਤੋਂ ਰੋਕ ਦਿੱਤਾ ਤੇ ਕਿਹਾ ਕਿ ਬੱਸ ਵਿਚ ਭੀੜ ਹੈ ਉਹ ਹੋਰ ਸਵਾਰੀਆਂ ਨਹੀਂ ਚੜ੍ਹਨ ਦੇਵੇਗਾ | ਜਦ ਅਸੀਂ ਇਸ ਗੱਲ ਦਾ ਵਿਰੋਧ ਕੀਤਾ ਤਾਂ ਉਹ ਕਹਿਣ ਲੱਗਾ ਕਰ ਲਵੋ ਜੋ ਕਰਨਾ ਮੈਂ ਨਹੀਂ ਲਿਜਾਂਦਾ | ਇਨ੍ਹਾਂ ਕਹਿਣ 'ਤੇ ਡਰਾਈਵਰ ਨੇ ਬੱਸ ਭਜਾ ਦਿੱਤੀ | ਉਨ੍ਹਾਂ ਕਿਹਾ ਕਿ ਅਜਿਹੇ ਮੁਲਾਜ਼ਮਾਂ ਕਰ ਕੇ ਪੀ.ਆਰ.ਟੀ.ਸੀ ਮਹਿਕਮਾ ਘਾਟਾ ਵੱਲ ਜਾ ਰਿਹਾ ਹੈ ਤੇ ਅਜਿਹੇ ਅਨਸਰ ਪ੍ਰਾਈਵੇਟ ਬੱਸਾਂ ਵਾਲਿਆਂ ਨਾਲ ਰਲ ਕੇ ਵਿਭਾਗ ਨੂੰ ਚੂਨਾ ਲਗਾ ਰਹੇ ਹਨ | ਉਨ੍ਹਾਂ ਇਸ ਮਾਮਲੇ ਦੀ ਸਬੰਧੀ ਸਿਕਾਇਤ ਈਮੇਲ ਕਰ ਦਿੱਤੀ ਹੈ | ਇਸ ਬਾਰੇ ਜਦੋਂ ਪੀ.ਆਰ.ਟੀ.ਸੀ ਦੇ ਜੀ.ਐਮ ਰਮਨ ਸ਼ਰਮਾ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਸਾਡੇ ਕੰਡਕਟਰ ਨੇ ਜੇ ਅਜਿਹਾ ਕੀਤਾ ਹੈ ਤਾਂ ਸ਼ਿਕਾਇਤ ਆਉਣ 'ਤੇ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾਵੇਗੀ |
