ਛੁੱਟੀਆਂ ਦਾ ਚਾਅ

ਖੇਡਣੇ ਤੋਂ ਸਾਨੂੰ ਹੁਣ, ਮੰਮੀ ਕੋਈ ਨਾ ਹਟਾਵੇ।
ਛੁੱਟੀਆਂ ਦਾ ਚਾਅ ਸਾਥੋਂ, ਚੁੱਕਿਆ ਨਾ ਜਾਵੇ।

ਛੇਤੀ-ਛੇਤੀ ਜਾਗਣੇ ਦਾ, ਸਾਰਾ ਯੱਬ ਮੁੱਕਿਆ।
ਰਹਿੰਦਾ ਸੀਗ੍ਹਾ ਸਾਡਾ ਤਾਂ, ਸਦਾ ਸਾਹ ਸੁੱਕਿਆ।
ਸੁੱਤਿਆਂ ਨੂੰ ਸਾਨੂੰ ਹੁਣ, ਕੋਈ ਵੀ ਨਾ ਜਗਾਵੇ।
ਛੁੱਟੀਆਂ ਦਾ ਚਾਅ...।

ਬੜੇ ਭਾਰੇ ਬਸਤੇ ਤੋਂ, ਸਾਡਾ ਖਹਿੜਾ ਛੁੱਟਿਆ।
ਗਰਮੀ 'ਚ ਜਾਂਦਾ ਨਹੀਂ ਸੀ ਸਾਥੋਂ ਪੈਰ ਪੁੱਟਿਆ।
ਕੁੱਟ ਮਾਰ ਹਰ ਕੋਈ, ਸਾਨੂੰ ਸਕੂਲੇ ਨੂੰ ਭਜਾਵੇ।
ਛੁੱਟੀਆਂ ਦਾ ਚਾਅ...।

ਕੁਝ ਦਿਨ ਅਸੀਂ ਹੁਣ, ਨਾਨਕੇ ਵੀ ਜਾਵਾਂਗੇ।
ਮਾਮੇ ਮਾਮੀ ਦਾ ਉਲਾਮਾਂ, ਚੰਗੀ ਤਰ੍ਹਾਂ ਲਾਹਾਂਗੇ।
ਨਾਨਾ-ਨਾਨੀ ਸਾਡੇ ਉਤੋਂ ਸਦਾ ਸਦਕੜੇ ਜਾਵੇ।
ਛੁੱਟੀਆਂ ਦਾ ਚਾਅ...।

ਸਕੂਲੋਂ ਮਿਲੇ ਕੰਮ ਦਾ ਵੀ, ਕਰਨਾ ਹੈ ਇਲਾਜ।
'ਤਲਵੰਡੀ' ਸਰ ਕਰਦੇ ਨ੍ਹੀਂ, ਕਿਸੇ ਨਾਲ ਲਿਹਾਜ।
ਉਹ ਤਾਂ ਕਹਿ ਦੇਂਦੇ ਪਹਿਲਾਂ, ਕੋਈ ਬਹਾਨਾ ਨਾ ਲਾਵੇ।
ਛੁੱਟੀਆਂ ਦਾ ਚਾਅ...।

-ਅਮਰੀਕ ਸਿੰਘ ਤਲਵੰਡੀ ਕਲਾਂ
-ਗਿੱਲ ਨਗਰ, ਗਲੀ ਨੰ: 13,
ਮੁੱਲਾਂਪੁਰ ਦਾਖਾ (ਲੁਧਿਆਣਾ)
ਮੋਬਾਈਲ : 94635-42896