-ਟੀ-20 ਵਿਸ਼ਵ ਕੱਪ- ਪਾਕਿ ਨਹੀਂ ਬਦਲੇਗਾ ਆਪਣਾ ਫ਼ੈਸਲਾ <br/>

ਅੰਮਿ੍ਤਸਰ, 3 ਫਰਵਰੀ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਸਰਕਾਰ ਵਲੋਂ ਉਸ ਦੀ ਕਿ੍ਕਟ ਟੀਮ ਦੇ 2026 ਟੀ-20 ਵਿਸ਼ਵ ਕੱਪ 'ਚ ਭਾਰਤ ਵਿਰੁੱਧ ਨਹੀਂ ਖੇਡਣ ਦੇ ਐਲਾਨ ਤੋਂ ਬਾਅਦ ਇਹ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਸ ਕਾਰਵਾਈ ਨਾਲ ਕੌਮਾਂਤਰੀ ਕਿ੍ਕਟ ਕੌਂਸਲ (ਆਈ. ਸੀ. ਸੀ.) ਵਲੋਂ ਪਾਕਿਸਤਾਨ ਕਿ੍ਕਟ ਬੋਰਡ (ਪੀ. ਸੀ. ਬੀ.) 'ਤੇ ਪਾਬੰਦੀ ਲਗਾਈ ਜਾ ਸਕਦੀ ਹੈ | ਮੰਨਿਆ ਜਾ ਰਿਹਾ ਹੈ ਕਿ ਪਾਕਿ ਆਪਣੇ ਫ਼ੈਸਲੇ 'ਤੇ ਮੁੜ ਵਿਚਾਰ ਕਰ ਸਕਦਾ ਹੈ | ਹਾਲਾਂਕਿ, ਪਾਕਿਸਤਾਨੀ ਮੀਡੀਆ ਰਿਪੋਰਟਾਂ ਮੁਤਾਬਿਕ ਪੀ. ਸੀ. ਬੀ. ਆਪਣਾ ਫ਼ੈਸਲਾ ਨਹੀਂ ਬਦਲੇਗਾ ਕਿਉਂਕਿ ਉਸ ਨੇ ਆਈ. ਸੀ. ਸੀ. ਦੀ ਪਾਬੰਦੀ ਤੋਂ ਬਚਣ ਦਾ ਕਾਨੂੰਨੀ ਤਰੀਕਾ ਲੱਭ ਲਿਆ ਹੈ | ਰਿਪੋਰਟ 'ਚ ਇਹ ਵੀ ਕਿਹਾ ਗਿਆ ਹੈ ਕਿ ਪੀ. ਸੀ. ਬੀ. ਮੈਚ ਨਾ ਖੇਡਣ ਦੇ ਫ਼ੈਸਲੇ ਸੰਬੰਧੀ ਆਈ. ਸੀ. ਸੀ. ਨੂੰ ਕੋਈ ਲਿਖਤੀ ਜਾਣਕਾਰੀ ਨਹੀਂ ਭੇਜੇਗਾ | ਪੀ. ਸੀ. ਬੀ. ਮੁਤਾਬਿਕ ਭਾਰਤ ਵਿਰੁੱਧ ਨਾ ਖੇਡਣ ਦਾ ਫ਼ੈਸਲਾ ਪਾਕਿ ਸਰਕਾਰ ਦਾ ਹੈ ਤੇ ਇਸ ਨੂੰ ਇਕ ਅਧਿਕਾਰਤ ਪਲੇਟਫ਼ਾਰਮ 'ਤੇ ਜਾਰੀ ਕੀਤਾ ਗਿਆ ਹੈ | ਇਸ ਲਈ ਆਈ. ਸੀ. ਸੀ. ਨੂੰ ਲਿਖਤੀ ਸੰਚਾਰ ਭੇਜਣ ਦੀ ਕੋਈ ਲੋੜ ਨਹੀਂ ਹੈ | ਰਿਪੋਰਟਾਂ 'ਚ ਇਹ ਵੀ ਦਾਅਵਾ ਕੀਤਾ ਗਿਆ ਹੈ ਕਿ ਪਾਕਿ ਸਰਕਾਰ ਨੇ ਅਜਿਹੀ ਸਥਿਤੀ ਨਾਲ ਨਜਿੱਠਣ ਲਈ ਕਾਨੂੰਨੀ ਸਲਾਹ ਲੈਣ ਤੋਂ ਬਾਅਦ ਹੀ ਮੈਚ ਦੇ ਬਾਈਕਾਟ ਦਾ ਐਲਾਨ ਕੀਤਾ ਸੀ |