ਈਰਾਨ ਨਾਲ ਸਮਝੌਤੇ ਦੇ ਐਲਾਨ ਤੋਂ ਪਹਿਲਾਂ ਈਰਾਨੀ ਫੁੱਟਬਾਲ ਟੀਮ ਅਮਰੀਕਾ ਪੁੱਜੀ

ਸਾਨ ਫਰਾਂਸਿਸਕੋ, 15 ਜੂਨ (ਐਸ. ਅਸ਼ੋਕ ਭੌਰਾ)-ਵਿਸ਼ਵ ਕੱਪ ਦੇ ਇਤਿਹਾਸ ‘ਚ ਇਹ ਪਹਿਲੀ ਵਾਰ ਹੈ ਕਿ ਇਕ ਮੇਜ਼ਬਾਨ ਦੇਸ਼ ਭਾਗੀਦਾਰਾਂ ਵਿਚੋਂ ਇਕ ਨਾਲ ਜੰਗ ‘ਚ ਹੈ। ਇਰਾਨ ਦੀ ਟੀਮ ਨੂੰ ਅਮਰੀਕੀ ਸਰਕਾਰ ਦੁਆਰਾ ਖਿਡਾਰੀਆਂ ਤੇ ਸਟਾਫ ਨੂੰ ਰਾਤ ਭਰ ਰਹਿਣ ਤੋਂ ਪਾਬੰਦੀ ਲਗਾਉਣ ਤੋਂ ਬਾਅਦ ਆਪਣੀ ਰਿਹਾਇਸ਼ ਮੈਕਸੀਕੋ ਤਬਦੀਲ ਕਰਨ ਲਈ ਮਜਬੂਰ ਕੀਤਾ ਗਿਆ ਸੀ ਤੇ ਇਕ ਦਰਜਨ ਤੋਂ ਵੱਧ ਸਹਾਇਤਾ ਸਟਾਫ ਨੂੰ ਮਨਜ਼ੂਰੀ ਨਹੀਂ ਮਿਲੀ ਸੀ, ਜਿਸ ‘ਚ ਈਰਾਨੀ ਫੁੱਟਬਾਲ ਫੈਡਰੇਸ਼ਨ ਦੇ ਪ੍ਰਧਾਨ ਮਹਿਦੀ ਤਾਜ ਵੀ ਸ਼ਾਮਲ ਹਨ ਪਰ ਹੁਣ ਇਰਾਨੀ ਫੁੱਟਬਾਲ ਟੀਮ ਐਤਵਾਰ ਨੂੰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਈਰਾਨ ਨਾਲ ਸ਼ਾਂਤੀ ਸਮਝੌਤੇ ਦੇ ਐਲਾਨ ਤੋਂ ਕੁਝ ਘੰਟੇ ਪਹਿਲਾਂ ਹੀ ਮੈਕਸੀਕੋ ਤੋਂ ਉਡਾਣ ਭਰਨ ਤੋਂ ਬਾਅਦ ਲਾਸ ਏਂਜਲਸ ਪਹੁੰਚੀ। ਹਾਲਾਂਕਿ ਟੀਮ ਦਾ ਸਿਖਲਾਈ ਕੈਂਪ ਮੈਕਸੀਕੋ ‘ਚ ਸਥਿਤ ਹੈ ਤੇ ਅਮਰੀਕੀ ਅਧਿਕਾਰੀਆਂ ਦੁਆਰਾ ਮੌਜੂਦਾ ਪ੍ਰਬੰਧਾਂ ਦੇ ਤਹਿਤ, ਆਪਣੇ ਮੈਚਾਂ ਲਈ ਅਮਰੀਕਾ ਜਾਣਾ ਪਵੇਗਾ। ਈਰਾਨ ਦੇ ਕੋਚ ਅਮੀਰ ਘਲੇਨੋਈ ਨੇ ਲਾਸ ਏਂਜਲਸ ਸਟੇਡੀਅਮ ਵਿਚ ਇਕ ਪ੍ਰੈਸ ਕਾਨਫਰੰਸ ‘ਚ ਕਿਹਾ ਕਿ ਉਮੀਦ ਕਰਨੀ ਬਣਦੀ ਹੈ ਕਿ ਫੁੱਟਬਾਲ ਖੁਸ਼ੀ ਤੇ ਆਨੰਦ ਦੇ ਨਾਲ ਦੋਹਾਂ ਦੇਸ਼ਾਂ ਦੇ ਸੱਭਿਆਚਾਰਾਂ ਨੂੰ ਨੇੜੇ ਲਿਆਏਗਾ। ਫੁੱਟਬਾਲ ਰਾਹੀਂ ਈਰਾਨ ਦੇ ਸੱਭਿਅਕ ਰਾਸ਼ਟਰ ਨੂੰ ਹੋਰ ਇੱਕਜੁੱਟ ਬਣਾਵਾਂਗੇ। ਜ਼ਿਕਰਯੋਗ ਹੈ ਕਿ ਈਰਾਨੀ ਟੀਮ ਨੂੰ ਵੀਜ਼ਾ ਦੇਰੀ, ਇਮੀਗ੍ਰੇਸ਼ਨ ਪਾਬੰਦੀਆਂ ਤੇ ਯਾਤਰਾ ਪਾਬੰਦੀਆਂ ਦਾ ਸਾਹਮਣਾ ਕਰਨਾ ਪਿਆ ਸੀ।