ਲੈਸਟਰ (ਇੰਗਲੈਂਡ), 7 ਅਪ੍ਰੈਲ (ਸੁਖਜਿੰਦਰ ਸਿੰਘ ਢੱਡੇ)-ਇੰਗਲੈਂਡ ਵਿਚ ਰਿਹਾਇਸ਼ੀ ਡਾਕਟਰਾਂ (ਪਹਿਲਾਂ ਜੂਨੀਅਰ ਡਾਕਟਰ ਕਹੇ ਜਾਂਦੇ) ਵੱਲੋਂ ਤਨਖਾਹ ਸਬੰਧੀ ਲੰਬੇ ਸਮੇਂ ਤੋਂ ਚੱਲ ਰਹੇ ਵਿਵਾਦ ਦੇ ਚਲਦਿਆਂ ਮੰਗਲਵਾਰ ਸਵੇਰੇ 7 ਵਜੇ ਤੋਂ 6 ਦਿਨਾਂ ਦੀ ਹੜਤਾਲ ਸ਼ੁਰੂ ਕਰ ਦਿੱਤੀ ਗਈ ਹੈ, ਜਿਸ ਕਾਰਨ ਐਨ.ਐਚ.ਐਸ. ਦੀਆਂ ਸਿਹਤ ਸੇਵਾਵਾਂ 'ਚ ਵੱਡਾ ਵਿਘਨ ਪੈਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ | ਦੱਸਿਆ ਜਾ ਰਿਹਾ ਹੈ ਕਿ ਇਹ ਹੜਤਾਲ ਇਸ ਚੱਲ ਰਹੇ ਵਿਵਾਦ ਦੌਰਾਨ ਡਾਕਟਰਾਂ ਦੀ 15ਵੀਂ ਹੜਤਾਲ ਹੈ | ਐਨ.ਐਚ.ਐਸ. 'ਚ ਰਿਹਾਇਸ਼ੀ ਡਾਕਟਰ ਕਰੀਬ ਅੱਧੀ ਮੈਡੀਕਲ ਵਰਕਫੋਰਸ ਬਣਾਉਂਦੇ ਹਨ, ਇਸ ਕਰਕੇ ਹੜਤਾਲ ਦੇ ਦੌਰਾਨ ਕਈ ਪਹਿਲਾਂ ਤੋਂ ਨਿਯਤ ਇਲਾਜ ਤੇ ਮੀਟਿੰਗਾਂ ਰੱਦ ਹੋ ਸਕਦੀਆਂ ਹਨ | ਸਰਕਾਰ ਅਤੇ ਬਿ੍ਟਿਸ਼ ਮੈਡੀਕਲ ਐਸੋਸੀਏਸ਼ਨ (ਬੀ.ਐਮ.ਏ.) ਵਿਚਾਲੇ ਮਾਰਚ ਮਹੀਨੇ ਦੌਰਾਨ ਹੋਈਆਂ ਗੱਲਬਾਤਾਂ ਨਾਕਾਮ ਰਹਿਣ ਤੋਂ ਬਾਅਦ ਬੀ.ਐਮ.ਏ. ਦੇ ਮੈਂਬਰ ਡਾਕਟਰਾਂ ਨੇ ਹੜਤਾਲ ਦਾ ਫ਼ੈਸਲਾ ਕੀਤਾ | ਹਾਲਾਂਕਿ ਐਮਰਜੈਂਸੀ ਸੇਵਾਵਾਂ ਨੂੰ ਚੱਲਦਾ ਰੱਖਣ ਲਈ ਸੀਨੀਅਰ ਡਾਕਟਰਾਂ ਨੂੰ ਡਿਊਟੀ 'ਤੇ ਲਾਇਆ ਗਿਆ ਹੈ |
