ਲੰਡਨ, 21 ਅਪ੍ਰੈਲ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਏਅਰ ਇੰਡੀਆ ਹਾਦਸੇ 'ਚ ਪਤਨੀ ਤੇ ਬੇਟੀ ਗਵਾਉਣ ਵਾਲੇ ਭਾਰਤੀ ਮੁਹੰਮਦ ਸੇਠਵਾਲਾ ਨੂੰ ਯੂ.ਕੇ. ਛੱਡਣ ਦੇ ਹੁਕਮ ਦਿੱਤੇ ਗਏ ਹਨ | 12 ਜੂਨ 2025 ਨੂੰ ਅਹਿਮਦਾਬਾਦ ਹਵਾਈ ਹਾਦਸੇ 'ਚ ਮੁਹੰਮਦ ਸੇਠਵਾਲਾ ਦੀ ਪਤਨੀ ਸਾਦਿਕਾਬਾਨੂ ਤਾਪੇਲੀਵਾਲਾ 24 ਤੇ 2 ਸਾਲ ਦੀ ਧੀ ਫਾਤਿਮਾ ਦੀ ਮÏਤ ਹੋ ਗਈ ਸੀ | ਜਿਸ ਤੋਂ ਬਾਅਦ ਹੁਣ 27 ਸਾਲਾ ਨੌਜਵਾਨ ਨੂੰ ਦੇਸ਼ ਨਿਕਾਲੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ | ਮੁਹੰਮਦ ਨੇ ਕਿਹਾ ਕਿ ਮੇਰੇ ਕੋਲ ਕੁਝ ਨਹੀਂ ਬਚਿਆ | ਮੈਂ ਆਪਣਾ ਬੱਚਾ, ਆਪਣੀ ਪਤਨੀ ਗੁਆ ਦਿੱਤੀ ਹੈ | ਉਹ 2022 'ਚ ਆਪਣੇ ਪਰਿਵਾਰ ਲਈ ਇਕ ਬਿਹਤਰ ਜੀਵਨ ਬਣਾਉਣ ਲਈ ਯੂ.ਕੇ. ਚਲਾ ਗਿਆ ਸੀ | ਉਹ ਆਪਣੀ ਪਤਨੀ ਰਾਹੀਂ ਇਕ ਨਿਰਭਰ (ਡਿਪੈਂਡੈਂਟ) ਵੀਜ਼ਾ 'ਤੇ ਸੀ, ਜੋ ਹੋਲਬੋਰਨ 'ਚ ਅਲਸਟਰ ਯੂਨੀਵਰਸਿਟੀ 'ਚ ਅੰਤਰਰਾਸ਼ਟਰੀ ਵਪਾਰ ਪ੍ਰਬੰਧਨ ਦੀ ਪੜ੍ਹਾਈ ਕਰ ਰਹੀ ਸੀ | ਉਸਦੀ ਪਤਨੀ ਦੀ ਦੁਖਦਾਈ ਮÏਤ ਤੋਂ ਸੱਤ ਮਹੀਨੇ ਬਾਅਦ, ਮੁਹੰਮਦ ਦਾ ਨਿਰਭਰ ਵੀਜ਼ਾ ਖਤਮ ਹੋ ਗਿਆ | ਜਿਸ ਤੋਂ ਬਾਅਦ ਮੁਹੰਮਦ ਨੇ ਹਮਦਰਦੀ ਭਰੇ ਤੇ ਮਜਬੂਰ ਕਰਨ ਵਾਲੇ ਹਾਲਾਤਾਂ ਅਧਾਰਿਤ ਯੂ.ਕੇ. 'ਚ ਰਹਿਣ ਲਈ ਅਰਜ਼ੀ ਦਿੱਤੀ ਜੋ ਪਿਛਲੇ ਹਫ਼ਤੇ ਰੱਦ ਕਰ ਦਿੱਤੀ ਗਈ | ਗ੍ਰਹਿ ਦਫ਼ਤਰ ਨੇ ਜਾਰੀ ਪੱਤਰ 'ਚ ਕਿਹਾ ਕਿ ਮੁਹੰਮਦ ਨੂੰ ਰਹਿਣ ਦਾ ਅਧਿਕਾਰ ਨਹੀਂ ਦਿੱਤਾ ਜਾ ਸਕਦਾ | ਮੁਹੰਮਦ ਦਾ ਪਰਿਵਾਰ ਭਾਰਤ ਵਿਚ ਹੈ ਤੇ ਉਹ ਦੁਬਾਰਾ ਜਿੰਦਗੀ ਸ਼ੁਰੂ ਕਰਨ ਦੇ ਯੋਗ ਹੋਵੇਗਾ | ਪੱਤਰ ਵਿਚ ਕਿਹਾ ਗਿਆ ਹੈ ਕਿ ਉਸਨੂੰ 22 ਅਪ੍ਰੈਲ ਤੱਕ ਇਮੀਗ੍ਰੇਸ਼ਨ ਜ਼ਮਾਨਤ ਦਿੱਤੀ ਗਈ ਹੈ ਉਸਨੂੰ ਦੇਸ਼ ਛੱਡਣਾ ਪਵੇਗਾ | ਜੇਕਰ ਉਹ ਇਸ ਤਾਰੀਖ ਤੱਕ ਨਹੀਂ ਜਾਂਦਾ ਹੈ, ਤਾਂ ਉਸਨੂੰ ਹਿਰਾਸਤ 'ਚ ਲੈ ਲਿਆ ਜਾਵੇਗਾ ਤੇ ਦੇਸ਼ ਨਿਕਾਲਾ ਦੇ ਦਿੱਤਾ ਜਾਵੇਗਾ |
