ਲੰਡਨ, 26 ਜੂਨ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ) ਬਰਤਾਨੀਆ ਦੇ ਸ਼ਾਹੀ ਪ੍ਰੀਵਾਰ ਦੀ ਸਰਕਾਰੀ ਰਿਹਾਇਸ਼ ਬਕਿੰਘਮ ਪੈਲਿਸ ਦਾ ਨਵੀਨੀਕਰਨ ਹੋ ਰਿਹਾ ਹੈ। ਤਾਜ਼ਾ ਸ਼ਾਹੀ ਖਾਤਿਆਂ ਤੋਂ ਪਤਾ ਲੱਗਾ ਹੈ ਕਿ ਅਗਲੇ ਸਾਲ ਜਦੋਂ ਬਕਿੰਘਮ ਪੈਲੇਸ ਦਾ 36.9 ਕਰੋੜ ਪੌਂਡ ਦੀ ਲਾਗਤ ਨਾਲ ਨਵੀਨੀਕਰਨ ਪੂਰਾ ਹੋ ਜਾਵੇਗਾ, ਤਾਂ ਵੀ ਮਹਾਰਾਜਾ ਚਾਰਲਸ ਅਤੇ ਰਾਣੀ ਕੈਮਿਲਾ ਉੱਥੇ ਰਹਿਣ ਲਈ ਨਹੀਂ ਜਾਣਗੇ। ਇਹ ਮਹਿਲ, ਜੋ ਕਿ 1837 ਤੋਂ ਯੂ ਕੇ ਦੇ ਸ਼ਾਸਕਾਂ ਦੀ ਅਧਿਕਾਰਤ ਲੰਡਨ ਰਿਹਾਇਸ਼ ਰਿਹਾ ਹੈ, ਬਰਤਾਨਵੀ ਰਾਜਸ਼ਾਹੀ ਦਾ ਪ੍ਰਸ਼ਾਸਕੀ ਮੁੱਖ ਦਫਤਰ ਬਣਿਆ ਰਹੇਗਾ। ਪਰ ਨੇੜੇ ਹੀ ਸਥਿਤ ‘ਕਲੇਰੈਂਸ ਹਾਊਸ’ ਹੀ ਉਨ੍ਹਾਂ ਦਾ ਅਧਿਕਾਰਤ ਘਰ ਰਹੇਗਾ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਫੈਸਲਾ ਇਸ ਕਰਕੇ ਲਿਆ ਗਿਆ ਹੈ ਤਾਂ ਕਿ ਆਮ ਜਨਤਾ ਦੀ ਇਸ ਇਤਿਹਾਸਕ ਇਮਾਰਤ ਤੱਕ ਪਹੁੰਚ ਵਧਾਈ ਜਾ ਸਕੇ। ਬਕਿੰਘਮ ਪੈਲੇਸ ਦੇ 10 ਸਾਲਾਂ ਦੇ ਨਵੀਨੀਕਰਨ ਦਾ ਕੰਮ ਅਗਲੇ ਸਾਲ ਮਾਰਚ ਵਿੱਚ ਪੂਰਾ ਹੋਣ ਵਾਲਾ ਹੈ। ਇਸ ਦਾ ਖਰਚਾ ‘ਸੋਵਰੇਨ ਗ੍ਰਾਂਟ’ ਵਿੱਚ ਇੱਕ ਅਸਥਾਈ ਵਾਧੇ ਰਾਹੀਂ ਕੀਤਾ ਜਾ ਰਿਹਾ ਹੈ, ਜੋ ਕਿ ਸ਼ਾਹੀ ਪਰਿਵਾਰ ਦੇ ਅਧਿਕਾਰਤ ਕੰਮਾਂ ਲਈ ਸਰਕਾਰ ਵੱਲੋਂ ਦਿੱਤੀ ਜਾਂਦੀ ਹੈ। ਅੱਗ ਅਤੇ ਪਾਣੀ ਦੇ ਨੁਕਸਾਨ ਦੇ ਖਤਰੇ ਨੂੰ ਦੇਖਦੇ ਹੋਏ, ਇਸ ਮਹਿਲ ਵਿੱਚ 60 ਸਾਲਾਂ ਵਿੱਚ ਪਹਿਲੀ ਵਾਰ ਪੁਰਾਣੀਆਂ ਤਾਰਾਂ, ਪਾਈਪਾਂ ਅਤੇ ਬੋਇਲਰ ਬਦਲੇ ਜਾ ਰਹੇ ਹਨ। ਮਹਾਰਾਜਾ ਚਾਰਲਸ 2003 ਤੋਂ ਕਲੇਰੈਂਸ ਹਾਊਸ ਵਿੱਚ ਰਹਿ ਰਹੇ ਹਨ, ਜੋ ਕਿ ਸੇਂਟ ਜੇਮਸ ਪੈਲੇਸ ਦੇ ਬਿਲਕੁਲ ਨਾਲ ਹੈ, ਜੋ ਕਦੇ ‘ਮਹਾਰਾਣੀ ਦੀ ਮਾਂ’ ਦਾ ਘਰ ਹੁੰਦਾ ਸੀ। 2005 ਵਿੱਚ ਆਪਣੇ ਵਿਆਹ ਤੋਂ ਬਾਅਦ ਮਹਾਰਾਜਾ ਆਪਣੀ ਰਾਣੀ ਕੈਮਿਲਾ ਨਾਲ ਉੱਥੇ ਰਹਿ ਰਹੇ ਹਨ। ਪਰ ਉਹ ਅਦਲਾ ਬਦਲੀ ਨਹੀਂ ਕਰਨਾ ਚਾਹੁੰਦੇ। ਇਸ ਤੋਂ ਇਲਾਵਾ ਕੁਝ ਸੁਰੱਖਿਆ ਚਿੰਤਾਵਾਂ ਵੀ ਸਨ। ਜੇਕਰ ਮਹਾਰਾਜਾ ਬਕਿੰਘਮ ਪੈਲੇਸ ਵਿੱਚ ਰਹਿੰਦੇ ਹਨ, ਤਾਂ ਉੱਥੇ ਆਉਣ ਵਾਲੇ ਸੈਲਾਨੀਆਂ ਦੀ ਗਿਣਤੀ ਅਤੇ ਉਨ੍ਹਾਂ ਦੇ ਦੇਖਣ ਵਾਲੇ ਹਿੱਸਿਆਂ ‘ਤੇ ਪਾਬੰਦੀਆਂ ਲੱਗ ਸਕਦੀਆਂ ਸਨ। ਹੁਣ ਇਸ ਇਤਿਹਾਸਕ ਇਮਾਰਤ ਨੂੰ ਲੰਬੇ ਸਮੇਂ ਲਈ ਖੋਲ੍ਹਿਆ ਜਾ ਸਕੇਗਾ, ਜਿਸ ਨਾਲ ਵਧੇਰੇ ਕਮਾਈ ਹੋਵੇਗੀ। ਫਿਲਹਾਲ ਇਹ ਮਹਿਲ ਹਰ ਗਰਮੀਆਂ ਵਿੱਚ ਅਤੇ ਸਾਲ ਦੇ ਕੁਝ ਖਾਸ ਦਿਨਾਂ ਵਿੱਚ ਜਨਤਾ ਲਈ ਖੋਲ੍ਹਿਆ ਜਾਂਦਾ ਹੈ, ਜਿਸ ਦੀ ਕਮਾਈ ‘ਰੋਇਲ ਕਲੈਕਸ਼ਨ ਟ੍ਰਸਟ’ ਨੂੰ ਜਾਂਦੀ ਹੈ, ਜੋ ਕਿ ਸ਼ਾਹੀ ਕਲਾ ਦੇ ਰੱਖ-ਰਖਾਅ ਲਈ ਇੱਕ ਚੈਰਿਟੀ ਹੈ। ਹਾਲਾਂਕਿ, ਮਹਾਰਾਜਾ ਚਾਰਲਸ ਮਹਿਲ ਵਿੱਚ ਰਾਜਸੀ ਦਾਅਵਤਾਂ, ਗਾਰਡਨ ਪਾਰਟੀਆਂ, ਅਤੇ ਪ੍ਰਧਾਨ ਮੰਤਰੀ ਤੇ ਨਵੇਂ ਰਾਜਦੂਤਾਂ ਨਾਲ ਮੁਲਾਕਾਤਾਂ ਵਰਗੇ ਅਧਿਕਾਰਤ ਪ੍ਰੋਗਰਾਮਾਂ ਦੀ ਮੇਜ਼ਬਾਨੀ ਕਰਦੇ ਰਹਿਣਗੇ।
