ਇਰਾਨ ਨੂੰ ਸੰਵੇਦਨਸ਼ੀਲ ਤਕਨਾਲੋਜੀ ਭੇਜਣ ਦੇ ਮਾਮਲੇ ’ਚ ਅਮਰੀਕੀ ਨਾਗਰਿਕ ਦੋਸ਼ੀ ਕਰਾਰ, ਫੈਡਰਲ ਅਦਾਲਤ ਦਾ ਵੱਡਾ ਫੈਸਲਾ
ਅਜੀਤ ਡੈਸਕ
14-07-2026
ਅਦਾਲਤੀ ਕਾਰਵਾਈ ਦੌਰਾਨ ਸਰਕਾਰੀ ਵਕੀਲਾਂ ਨੇ ਦਲੀਲ ਦਿੱਤੀ ਕਿ ਮਹਦੀ ਮੁਹੰਮਦ ਸਾਦੇਗੀ ਨੇ ਆਪਣੇ ਇੱਕ ਇਰਾਨੀ ਸਾਥੀ ਨਾਲ ਮਿਲ ਕੇ ਅਮਰੀਕੀ ਨਿਰਯਾਤ ਪਾਬੰਦੀਆਂ ਨੂੰ ਚਕਮਾ ਦੇਣ ਦੀ ਕੋਸ਼ਿਸ਼ ਕੀਤੀ। ਦੋਸ਼ ਹੈ ਕਿ ਇਸ ਯੋਜਨਾ ਤਹਿਤ ਉਹ ਇਲੈਕਟ੍ਰਾਨਿਕ ਪੁਰਜ਼ੇ ਇਰਾਨ ਤੱਕ ਪਹੁੰਚਾਉਣਾ ਚਾਹੁੰਦੇ ਸਨ, ਜਿਨ੍ਹਾਂ ਦੀ ਵਰਤੋਂ ਫੌਜੀ ਡਰੋਨ ਨੈਵੀਗੇਸ਼ਨ ਪ੍ਰਣਾਲੀਆਂ ਵਿੱਚ ਹੋ ਸਕਦੀ ਸੀ। ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਲੈਣ-ਦੇਣ ਨੂੰ ਲੁਕਾਉਣ ਲਈ ਸਵਿਟਜ਼ਰਲੈਂਡ ਵਿੱਚ ਇੱਕ ਫਰੰਟ ਕੰਪਨੀ ਦੀ ਵਰਤੋਂ ਕੀਤੀ ਗਈ।
ਜੂਰੀ ਨੇ ਸਾਦੇਗੀ ਨੂੰ ਪੰਜ ਵਿੱਚੋਂ ਤਿੰਨ ਦੋਸ਼ਾਂ ਵਿੱਚ ਦੋਸ਼ੀ ਕਰਾਰ ਦਿੱਤਾ। ਸਜ਼ਾ ਦਾ ਐਲਾਨ 13 ਅਕਤੂਬਰ ਨੂੰ ਹੋਵੇਗਾ। ਉਦੋਂ ਤੱਕ ਉਹ ਜ਼ਮਾਨਤ ‘ਤੇ ਬਾਹਰ ਰਹੇਗਾ।
ਮਾਮਲੇ ਦਾ ਦੂਜਾ ਮੁਲਜ਼ਮ, ਜੋ ਇਰਾਨ ਵਿੱਚ ਹੋਣ ਦਾ ਅਨੁਮਾਨ ਹੈ, ਅਦਾਲਤ ਵਿੱਚ ਪੇਸ਼ ਨਹੀਂ ਹੋਇਆ। ਅਮਰੀਕੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਹ ਪਹਿਲਾਂ ਇੱਕ ਕੈਦੀ ਅਦਲਾ-ਬਦਲੀ ਤੋਂ ਬਾਅਦ ਇਰਾਨ ਵਾਪਸ ਚਲਾ ਗਿਆ ਸੀ।
ਇਹ ਕੇਸ ਉਸ ਸਮੇਂ ਹੋਰ ਵੀ ਮਹੱਤਵਪੂਰਨ ਬਣ ਗਿਆ ਹੈ ਜਦੋਂ ਅਮਰੀਕਾ ਅਤੇ ਇਰਾਨ ਵਿਚਾਲੇ ਤਣਾਅ ਜਾਰੀ ਹੈ। ਅਮਰੀਕੀ ਸਰਕਾਰ ਨੇ ਸਪੱਸ਼ਟ ਕੀਤਾ ਹੈ ਕਿ ਰਾਸ਼ਟਰੀ ਸੁਰੱਖਿਆ ਨਾਲ ਜੁੜੀ ਤਕਨਾਲੋਜੀ ਨੂੰ ਪਾਬੰਦੀਸ਼ੁਦਾ ਦੇਸ਼ਾਂ ਤੱਕ ਪਹੁੰਚਾਉਣ ਦੀ ਕਿਸੇ ਵੀ ਕੋਸ਼ਿਸ਼ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ ਅਤੇ ਅਜਿਹੇ ਮਾਮਲਿਆਂ ਵਿੱਚ ਸਖ਼ਤ ਕਾਨੂੰਨੀ ਕਾਰਵਾਈ ਜਾਰੀ ਰਹੇਗੀ।
