ਪਲੈਟਸਬਰਗ ਨੇੜੇ ਤਿੰਨ ਵਾਹਨਾਂ ਦੀ ਟੱਕਰ ਤੋਂ ਬਾਅਦ ਨਿਊਯਾਰਕ ਸਟੇਟ ਪੁਲਿਸ ਦੀ ਗੱਡੀ ਅੱਗ ਦੀ ਲਪੇਟ ‘ਚ, 2 ਟਰੂਪਰ ਜ਼ਖ਼ਮੀ
ਅਜੀਤ ਡੈਸਕ
16-07-2026
ਪੁਲਿਸ ਮੁਤਾਬਕ ਸਵੇਰੇ ਕਰੀਬ 7 ਵਜੇ ਸਟੇਟ ਰੂਟ 374 ‘ਤੇ ਦੋ ਨਿਸ਼ਾਨਜ਼ਦਾ ਪੁਲਿਸ ਗੱਡੀਆਂ ਟ੍ਰੈਫਿਕ ਹੌਲੀ ਹੋਣ ਕਾਰਨ ਰੁਕੀਆਂ ਹੋਈਆਂ ਸਨ। ਇਸ ਦੌਰਾਨ ਪਿੱਛੇ ਤੋਂ ਆ ਰਹੀ ਇੱਕ ਜੀਪ ਚੇਰੋਕੀ ਸਮੇਂ ਸਿਰ ਰਫ਼ਤਾਰ ਘਟਾ ਨਾ ਸਕੀ ਅਤੇ ਪੁਲਿਸ ਦੀ ਪਿਛਲੀ ਗੱਡੀ ਨਾਲ ਜਾ ਟਕਰਾਈ। ਟੱਕਰ ਦਾ ਜ਼ੋਰ ਇੰਨਾ ਵੱਧ ਸੀ ਕਿ ਉਹ ਗੱਡੀ ਅੱਗੇ ਖੜ੍ਹੀ ਦੂਜੀ ਪੁਲਿਸ ਕਾਰ ਨਾਲ ਵੀ ਜਾ ਭਿੜੀ।
ਟੱਕਰ ਮਗਰੋਂ ਇੱਕ ਪੁਲਿਸ ਵਾਹਨ ਨੂੰ ਅੱਗ ਲੱਗ ਗਈ ਅਤੇ ਕੁਝ ਹੀ ਪਲਾਂ ਵਿੱਚ ਲਪਟਾਂ ਨੇ ਪੂਰੀ ਗੱਡੀ ਨੂੰ ਆਪਣੀ ਚਪੇਟ ਵਿੱਚ ਲੈ ਲਿਆ। ਮੌਕੇ ‘ਤੇ ਪਹੁੰਚੀਆਂ ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਨੇ ਅੱਗ ‘ਤੇ ਕਾਬੂ ਪਾਇਆ।
ਹਾਦਸੇ ਵਿੱਚ ਜ਼ਖ਼ਮੀ ਹੋਏ ਦੋਵੇਂ ਟਰੂਪਰਾਂ ਨੂੰ ਤੁਰੰਤ ਚੈਂਪਲੇਨ ਵੈਲੀ ਫਿਜ਼ੀਸ਼ਨਜ਼ ਹਸਪਤਾਲ ਲਿਜਾਇਆ ਗਿਆ। ਦੂਜੇ ਪਾਸੇ ਜੀਪ ਚਲਾ ਰਹੀ ਮਹਿਲਾ ਦੀ ਮੌਕੇ ‘ਤੇ ਜਾਂਚ ਕੀਤੀ ਗਈ, ਪਰ ਉਸ ਨੇ ਹੋਰ ਇਲਾਜ ਕਰਵਾਉਣ ਤੋਂ ਇਨਕਾਰ ਕਰ ਦਿੱਤਾ।
ਨਿਊਯਾਰਕ ਸਟੇਟ ਪੁਲਿਸ ਨੇ ਦੱਸਿਆ ਕਿ ਹਾਦਸੇ ਦੇ ਅਸਲ ਕਾਰਨਾਂ ਦੀ ਜਾਂਚ ਜਾਰੀ ਹੈ।
